12
1 Dəhə sə inda Ifərem kwa məra, sə kəla sakəda tanyi,pa'apəchi cho gədlə gyang zədərpichi,
ana tla gəzhi ana tləmwali.
Cha mbandər na Asiriya
ana cho lə mal zaitun yi Masar.
2 Tlakə shili tə na nəuma təkəra Yahuda,
cho tlanda nyi nəuma nə Jakop tsa'atsa'a na laku nyi,
ana sə inda cha məra.
3 Cha səya mətətəka zamə nyi ku mbəlyah,
cha ɓəgadla na Hyel wi ndəu.
4 Cha ɓəgadla na chama Hyel ga kura nyi,
cha tiwi ga gədi kwambiyakur.
Ngə Hyel tə shili da cha vu Betel
ga ndər na cha hinda,
5 Hyel Tlakə Ndər Gyalkur,
tləm nyi Tlakəu.
6 Kəl ja, tuku ka ɓəl shili da Hyel ngha,
ga ka ɓəlatə nyida ngha ana jiri ngha,
ana ka səkə Hyel nghə wa'atanyi.
7 Ndər shafəli kwa dəkə sə na kətasə dlərəpəu,
aka cho i ɗiya nji.
8 Ifərem kwa bu kərnyi, cho na,
<<Sər chi da tsaya nyaɓəu, a ɗa tə ya ka ndər gəna.
Aka gəna ɗa da 'ual gagaɗa,
aka ənga, a da njo uya ɗa na bikə ndara səpəla'a wa.>>
9 <<Naya ngə Tlakəu, Hyel ngha,
naya nga zəbiya nakə vu Masar,
yo mərtə ko ngya ku madləɓa səkəu.
Wi nda hyo maka mər tə bəjir ladər kəhi.
10 Ya ɓwanya nə njir mətakər,
ya nənda takər ɗanghəu
ana ya dəkə karapəu i'i təwan nda.>>
11 Njir Giliyad njir paha nda gagaɗa,
nji kəla sakəda.
Ndo hatəmachi na gyal tla vu Gilgal,
kəl ja, dzəgana kənda kwa ɗa wi hangu inda nja ɓunda biya nyachira fa kuɓəkuɓa.
12 Jakop tə hwibiya yatə hə'i Aram,
Isra'ila tə mər tlər ka ga cha uya mala,
ana ka cha kinda gəna gadla təwa ɓəla kətəng.
13 Tlakə tə mər tlər na ndər mətakər ka cha həbiya njir Isra'ila zəbiya vu Masar,
aka ana ndər mətakər Tlakə tə ɓəlatə nda.
14 Kəl ja, Ifərem tə tləya huɗa cha gagaɗa,
Tlakə kwa tlanda nda nəuma,
cho kinda nyi məlməl na sə nda məra cha.