Nyidar Hyel nə Njir Isra'ila
11
1 <<Sakanda Isra'ila tsə'u zər ya nyidatə nyi,hya'atə vu Masar ya nga zər ɗa.
2 Kəl ja, ma yo nga njir Isra'ila,
kəl hwi ndo hwi tsa ya.
Ndo hatəmachi nə Baal i'i
ana ngi sə inda kwa sh'uini kwitəkwitə nə səlirma i'i.
3 Naya ngə tə gəziya cha Ifərem
ga dlədləɓə tə nyi ma'i,
kəl ja, a da nda ɗəngatə na ya wa,
ya naya ngə tə mbandə nda.
4 Ya char nda laku ku kwya'akur
ana nyida,
ya hənda nda gang ɓwaɓwatə tə wulya nda,
ya uzhi tsə'u ga nənda sərsuma.>>
5 <<A tsə'u ndo ɓəl gwa Masar ma?
A Asiriya ngə kwa səm təlkur təkəra nda
aka nda ngyar tubi ma?
6 Njir dawa kwa səwandə mələm kənda na katsakər,
ndo ɓəlbiya sər haɗə nya lakur gu mələm
ndo kuɗənda nda aka sə ɗimi inda nda ɓatliya ku jigadəma kənda.
7 Nji ɗa ɓatliyatə ka ndo shata nda tsa ya.
Madangə ndo nga ɗa Ndə nda Ndiya na Səli,
kəl ja, a da ndo la'a səli ɗa pa'apa'a wa.
8 <<Aman yo ɗa na təkə na kə Ifəremu? Aman yo ɗa na tləɗanda hi njir Isra'ila?
Aman yo ɗa na mərtə nghə wi nda ya mərtə nyi nə Admah?
Aman yo ɗa na mər tə nghə wi nda ya mərtə nyi nə Zeboyim nda?
Kəra ya shati,
aka tuhuɗə ɗa 'ualəu.
9 A tsə'u da yo biyama na huɗatla ɗa
ndara ya sha ya kuɗənda Ifərem wa.
Aka naya Hyel ya, a da ya ndə wa,
ndə karti ya ku huɗa hi.
A da yo shili da hi ku huɗatla ɗimiɗimi wa.
10 Ndo nəu Tlakəu,
cho ghərti wi ləvari.
Ma cha ghərti,
nguli nyi kwa shili təwa təɗərpəchi ndo tsamətlaɗəu.
11 Ndo shili na tsamətlaɗəu
wi eak hya'atə vu Masar,
wi mbətla hya'atə vu Asiriya.
Ya yo fiya nda ku ki kənda i'i,>>
ənghwa ndə Tlakəu.
Səpla'a Njir Isra'ila
12 Ifərem ɓandə ɗa tə na gəzhi,
njir Isra'ila tsə'u tə ɓandə ɗa na kwakunakur,
ana Yahuda kwa tləmwali nə Hyel
ma'a təkəra nji tsa'atsa'a ana Hyel nda karti.