10
1 Isra'ila wi wur anapcha nda kwa biya ndə yayah nyi ka kərnyi.
Ma yayah nyi kwa tsaka,
cha kwa tsakə hər dzəgana i'i,
ma hə'i nyi kwa həa,
cho tsakə ɓatlə hangu hatəmachi i'i.
2 Ɗufwa nda dəmən,
ya sakana, tuku ndo sa ɓwaɓwatə ka səpəla'a kənda.
Tlakə kwa huhuɓənda dzəgana kənda i'i
ya cho wazənda hangu hatəmachi kənda i'i.
3 Kəl ndo na, <<A təl da tsa ea wa,
aka a da eo ləvər Tlakə wa.
Kəl ja, mada təl tsa ea ya, mi cho nau mərtə ea?>>
4 Ngə nda mər alkawal i'i,
ngə nda səmfəla gəzhi i'i,
ga mbandər gəzhi i'i,
aka ənga nəuma kwa shili təkəra nda
wi jigwal ɗimi nda tə tsə tə fa nda nja kuɓəya.
5 Nji inda na ngya vu Samariya kwa ləvər
katə səlirma daləu nə Bet Aven.
Nji kwa sə'ingu nyi,
pərist inda kwa həsəli nə katə kwa ləla,
aka səlir katə səlirma daləu nda təra ti.
6 Njo təra nə yi Asiriya
ka nja yi kinda tsachi nə təl dəgaləu.
Ifərem kwa ɗa ka sər kuzhi,
Isra'ila kwa ɗa ka sər kuzhi aka katə wu kənda inda.
7 Təl Samariya ana nji nyi kwa təra
wi ngə shishiɗə kwa təra təkəra ɓiti.
8 Mbwar həsəli inda kyatə dəgəl Aven kwa səwa
aka səpəla'a Isra'ila.
Shikəɗi ana jigwal kwa
haɗiya hə'i kənda,
kəl ndo nar nyi nə mə i'i, <<Haɗəya ea ma!>>
ndo nar nyi nə dəgəl i'i tsəu, <<Dla ma səya kəra ea!>>
9 Tlakə tə na, <<Fwatə tə bəji nda hya ghəya mər səpəla'a vu Gibiya
a da hya ngyar wa,
hya biyama na mər səpəla'a.
A nja kura njir mər sə ɗimi vu Gibiya ma?
10 Sakanda ya i ti, yo ɓu nda,
jul nji kwa tsəmtədzə kwa mər dawa na nda,
njo nə nda ɓwaɓwatəu aka səpəla'a ɗang inda nda məra.
11 Ifərem tla ɓuɓu cha
nda kwa i dəgə sə uhiuhi,
yo fətə nyi gang tə wulya cha nda gumaguma nda.
Yo pal Ifərem,
Yahuda tuku cho kwatsa,
Jakop tsə'u tuku cho huɓu hə'i.
12 Tləka ma tsa'atsa'akur ka kərnəhi,
ga hya məriya nyida nda pa'a kwa wura,
hya huɓiya hə'i kəla kwatsa,
aka bəjir gwa'a Tlakə na,
kəl ma cha shili
ga char hi tsa'atsa'akur.
13 Kəl ja, hya tləkanda paha
ngə hya məriya ɗimikur
ga səmnya yayar kwakunakur.
Aka hya ngya ka dunamar kərnəhi
ana ɗangkura ləvaləva kəhi
14 kurakər dla'a kwa hya'atə təkəra nji kəhi,
tsa'aka dəhə mələm kəhi inda ku bangtili njo huɓənda tang
wi nda ləvaləva Shalman tə kuɗənda njir Bet Arbel pəshir pah.
Nja huhuɓiya kəra mahi'i ka ngulisha'a.
15 Əngə kwa ɗa na hi
aka paha kəhi ɗatə 'ual'ualəu.
Tsəɗakə mbudla njo tsəya təl Isra'ila.>>