Nja ɓu Njir Isra'ila
9
1 Njir Isra'ila, ngwa hya da mər hirgyaɗi ja wa,ngwa hya da jawi wi alənya hə'i wa.
Aka a da hi kəriwa nə Hyel kəhi wa,
hyo i dləu wazəba tsa zawar
tə dəhə lar tangnda hyo dəgə səuhiuhi kəhi ti.
2 Sə nda njo uya tə lar ana mbwar ɓəchi ɓitir anap kəhi da kwa nyandə nji wa,
taɗər ɓitir anap da kwa kətiya nda wa.
3 A tsə'u nda kwa ngya ku hə'i Tlakə wa,
Ifərem kwa ɓəl yi Masar
kwa yi səm sərsum hiɗahiɗa vu Asiriya.
4 Ya a tsə'u ndo hatəmachi na ɓitir anap nə Tlakəu,
ndara cha ngatə məsəɗakə na hatəmachi kənda wa.
Chul hatəmachi ngə kwa ɗa wi zhazha nə nda,
dəhə nji inda səm kwa ɗa hiɗahiɗa.
Ngəna sərsum kwa ɗa ka kərnənda tanyi,
a da kwa shili ku mbwa'alə Tlakə wa.
5 Mi hyo mər pəshir ladər kəhi
ana pəshir ladər Tlaka?
6 Mada nda mɓəɗə tsa kuɗa,
njir Masar kwa tsəmtə nda
ka nja haɗiya nda vu Memfis.
Kəl shikəɗi kwa haɗiya gəna azurfa kənda,
ya gədləla tsə'u kwa tsangərchi kəra madləɓa kənda i'i.
7 Ngwa Isra'ila zəndə ja,
bəjir ɓu nda
ana bəjir kisəkur shili ti.
Aka səpəla'a kəhi ɗatə ɗanghəu,
ya 'ual'ual hyo ɗa tsa Tlakəu,
ndər mətakər kəhi kəkənghəu,
ya cho ɓwanya wi ndər məlləm.
8 Ndər mətakər ana Hyel ɗa
ngə ndər ɓəla Ifərem,
dəhə ka ənga ləbam kwa səkə Ifərem ku dəhə laku nyi i'i,
ma'a ku ki Hyel njo mər dawa na ndər mətakər.
9 A ɗatə nda ndzuɗakə ku tar jirikur
wi nda nda mər vu Gibiya nda.
Kəl ja, Hyel do far na paha kənda wa,
ya cho tlanda nda nəuma təkəra bikə kənda i'i.
10 Tlakə tə na, <<Nda ya uya Isra'ila,
ɗufwa ya tə ɗa twasəu wi ndə nda tə uya yayar anap tə dadil takəu,
nda ya la'a adan nda,
wi ndə nda tə la'a tangərmar yayar kanda.
Kəl ja, nda nda shili vu Baal Peyor,
ngə nda ghəya həsəli nə katə i'i,
ngə nda ɗa ka sər həɗə wi katə inda ndo nyida nda.
11 Səlir Ifərem kwa fəl tanyi tsa cha wi eakəu.
Shwang yah, shwang huɗəu, ya shwang hə huɗəu.
12 Mada nda handə ngulisha'a,
yo kuɗənda nda, a da yo ngyar mada zhang na pi wa.
Sər təhuɗə na nda
ma ya shata ɗa tsa nda!
13 A la'a tə ya Ifərem gumaguma wi mələm Taya,
nda nja chiya tə mbwa mənakəu.
Kəl ja, Ifərem kwa zəbiya na
ngulisha'a kənda ka nja kuɗənda nda.>>
14 Tlakə ɗa,
mi sə nda ko nə nda?
Nə nda mbəlyah nda pa'a kwa hə huɗəu,
ana 'ua nda pa'a na 'ua kwa.
15 <<Aka paha kənda vu Gilgal,
ya ɗa tsa nda hinda.
Aka tlər səpəla'a kənda,
yo gədləbiya nda ku ki ɗa.
A tsə'u yo i nda wa,
aka dəhə njirawawa'a njir tləmwali nda.
16 Nja ɓu Ifərem,
ya ngilangha nda 'ulti,
a da nda yah
ngulisha'a wa.
Mada nda yah ngulisha'a ma'a
yo kuɗənda nyandəla nda.>>
17 Hyel ɗa kwa ngya nda
aka a da nda nəu nya cha wa,
ndo wi kəɓang ku huɗa alenya hə'i i'i.