Tsaubar nə Njir Isra'ila Təkəra Nəu Katəu
8
1 <<Mbəɗiya tələmaka wi ngə tə ambləm, əngə ndər dawa kwa səya kəra ki Tlakəu,
aka nji ɗa ɓəlnda tə mbandər ɗa
ga tləmwali nə gadlagadla ɗa.
2 Njir Isra'ila kwa tiwi na'a.
Ndo na, <Yawa Hyel kəea, kwa zəndə nghə ea!>
3 Kəl ja, njir Isra'ila ngyar tə sə nda mənakəu,
ndər dawa kwa gədlə nda.
4 Nda fiya təl i'i a da na zəndəkur ɗa wa,
ngə nda ɗəmtsə njirawawa'a, a da na ikur ɗa wa.
Ana azurfa ana bəjingha kənda,
nda fətəbiya nyi katə i'i nə kərnənda
aka kuɗə kərnənda.
5 Nahi njir Samariya! A ngyar tə ya katə səlirma daləu kəhi nga.
Huɗa ya tlatə tsa nda gagaɗa.
Ba'a sakamanə ndo ngyar mər sər həɗə inga?
6 Katə səlirma daləu ina,
ndər tlər chi ngə tə batlə vu Isra'ila,
a da Hyel ngə wa.
Njo huhuɓənda katə səlirma daləu nə
Samariya kəcha'akəcha'a.
7 <<Nda tləkanda gyang,
aka ənga ndo məriya majigwal,
sə uhiuhi inda tə həa, a da kwa biyakər wa,
a da kwa pəuli wa.
Mada cha pəuli ma'a,
nji shilshili ingə kwa mbərsa ni.
8 A kura tə nji njir Isra'ila,
sakana a ɗatə nda ku huɗa jul nji inda
wi sə kəla sakəda.
9 Aka nda təra gwa Asiriya
wi kwara takə nda kwa zhuli zhangta nyi.
Ifərem tə kinda kwaba nə njir Asiriya ka nda ɓəlatə nyi.
10 Madangə a kinda nyi tə nda kwaba nə alenya jul nji,
sakana yo tsəmtə nda tə mbwar zhang.
Huɗatla kənda kwa ɗa 'ual'ual
aka ɓwaɓwatə nda təl kənda kwa nə nda.
11 <<Ifərem tə hərtə dzəgana ɗang ka hatəmachi nə hənda səpəla'a,
ngə tə ɗa ka dzəgana mər səpəla'a.
12 Ya tsəfətə nda sə ɗang gagaɗə təkəra gadlagadla ɗa,
kəl ja, nda hətə ka mihiɓir sə tanyi.
13 Ndo hatəmachi na'a
ndo ɗə kumkumnyi,
kəl ja, Tlakə da kwa ngatə məsəɗakə na nda wa.
Sakana Tlakə kwa ɗənghatə na ɗimikur kənda,
ya cho ɓu nda ka səpəla'a kənda.
Ndo ɓəl gwa Masar.
14 Njir Isra'ila far tə Ndər Ɓatlə nda,
ga hərtə patla i'i,
Yahuda tə hərtə mələm inda na ɓangtili.
Kəl ja, yo pəkər hu'u səya təkəra patla kənda i'i
nda kwa nginda mələm kənda inda na ɓangtili.>>