Səpəla'a Njir Isra'ila ana Mwali Kənda
7
1 Dəhə sakanda yo gwa'a mbandə njir Isra'ila ti,səpəla'a Ifərem kwa ɗa tə babal,
ya səpəla'a njir Samariya kwa chabiyadza.
Aka ndo mər sə ɗimi,
njir həl ku ki nji i'i,
ya ndo fa'alaku,
2 kəl ja, a da nda zəndə ənda kwa zəndə
ya dəhə sə ɗimi inda ndo mər wa.
Səpla'a kənda ɓandə nda ti,
ya kwa la'a ya dəhəu.
3 <<Təl kwa ngatə məsəɗakəkur na sə ɗimi nda ndo məra,
njirawawa'a kwa mər hirgyaɗi na gəzhi nda ndo tla.
4 Njir mər kasali nda dəhə nda,
nda kwa ngi wi hahir tsa gwazhilakəu
nda pa'a ndər tsa gwazhilakə kwa gwaɗa,
fwatə tə bəjir zəkwa, ba'a tə bəji nda cha kwa bu ti.
5 Pəshir ladər təl kəea,
zər təl kwa wi na bitir anapəu,
ba'a cha daɓətəkər kə'i njir gyaɗi həyatəvi.
6 Ɗufwa nda kwa ngi nda wi hahir tsa gwazhilakəu,
huɗatla kənda kwa gəɗə həm hanyi
a ba mbudla tsə'u naɓənaɓə wi kyara hu'u.
7 Dəhə nda kwakwaɗə wi hahir tsa gwazhəlakəu,
ndo kuɗə njirawawa'a kənda i'i.
Dəhə təl kənda tə kuɗa,
ya mada zhang kənda da nga ɗa wa.>>
8 Ifərem tə daɓətəkər ka alənya hə'i,
jan cha wi waina kəla sakəda.
9 Nji shilishili kwa shishiɓə dunama nyi,
ya a da cho ngabiya wa.
Shishi nyi sha tə pərtəu,
ya a da cho ngabiya wa.
10 Kəla ngatə ndərkur njir Isra'ila, a wula nda ti,
dəhə ka ənga,
a da nda sha shili da Tlakəu, Hyel kənda,
ndara nda gwa'a nyi wa.
11 Ifərem wi mbətla cha nda kəla dəma,
kusə tanyi nja shandə nyi kər,
cha təra gwa Masar
ana Asiriya ki gwa'a vala tsa nda.
12 Ma ndo təra, yo ngəya nda ləbam ɗa,
yo fa'aya nda səya hu'i, wi nda nja kwa mər nə eak inda kwa fəl biya hudamələm,
Ma ndo fəl dəhə nda,
yo səya nda.
13 Sər təhuɗə na nda,
aka nda shata nda tsa ya!
Ndo kuɗa,
aka nda tləmwali na'a!
Madangə yo i ya dləuya nda,
dəhə ka əngə tsə'uta ndo nəu ɗa na gəzhi.
14 A nda kwa pətlənya na'a tsa'anyata wa,
kəl ja, a tə sərpiya kənda tanyi nda kwa tiwi.
Ndo tsəmdzə ka sərsuma ana taɗər ɓitir anapəu,
nda ɗa ka njir tləmwali na'a.
15 Ya dlədləɓətə nda ga mərtə nda na dunama,
dəhə ka ənga nda biya ma na mər ɗimikur na'a.
16 A da nda sha ya da Ndər Gyalkur wa,
wi laga səwasəwa nda.
Njo kuɗənda njirawawa'a kənda na katsakər,
aka ndo pə ɓwanya bu kərnənda.
Aka ənga, ndo ɗa ka sər gwa'a gyaɗi
nə njir Masar.