Tubi Gəzhi nə Njir Isra'ila
6
1 <<Shili ma, mən ɓəl ya da Tlakəu.Cha tətau mən kuchiɗikuchiɗəu,
kəl ja, cho mbandə mən,
cha fəndzə mən tyakəm,
kəl ja, cho mbiya mən kəti kəmən.
2 Ahir hanyi mətlə cho hya'andə mən,
a tə makərkunya pəchi, cho ɓəlandə mən shili da cha,
aka ga məna ngya a huɗə nyi.
3 Mən mbabiyadzə mən zəndə Tlakəu,
a mən ka biyama ka biyama na zəndə nyi.
Aka tang wi ngə pəchi kwa zədi,
əngə cho chabiyadza,
cho shili da mən wi par səyar jwamun,
wi tsədzəɗə nda kwa ləɓətə hə'i.>>
4 Mi yo mər na hi njir Ifəreməu?
Mi yo mər na hi njir Yahuda?
Nyida kəhi wi gyang wurvi,
wi kuchikəpa mbudla nda kwa pəa.
5 Aka ənga yo tsətsəɗəu hi, nahi ka njir mətakər ɗa,
yo kuɗənda hi na ɓwanyar nya ya,
nəuma ɗa kwa shili təkəra hi wi nghənghəɗir par.
6 Aka tuhuɗə yo i, a da hatəmachi wa,
ya zəndə Hyel tsə'u, ndiya tə hatəmachi nə nginda.
7 Kəl ja, nda ɓəlnda mbandər ɗa wi nə Adamu nda,
a da nda ɗa na jiri na'a wa.
8 Giliyad mələm nji pəla'a nda,
ya njir kuɗə nji nda.
9 Wi njir fa'avi inda ku mwabu kwa səkə ndəu,
əngə dlama pərist kwa məra,
ndo kuɗə nji ku lakur Shekem,
ndo mər mwararamkur kəla kuzhi.
10 Ya la'a sər həɗə
ku ki njir Isra'ila.
Ifərem kwa mər kasali,
ya Isra'ila dyaɓəti.
11 <<Nahi tsə'u njir Yahuda,
a fiya tə ya bəji nda yo ɓu hi ti.
Bəji nda yo ɓəlandə səlir nji ɗa.>>