Nəuma Təkəra Isra'ila ana Yahuda
5
1 <<Ngatə ma, pərist i'i!Səya ma himi, njir Isra'ila!
Ki təl, ngatə ma ja!
Nəuma na, a təkəra hi nani:
Hya ɗa ka ləbam vu Mispa,
hya ɗa ka hiɗi nda nja waliya kyatə Dəgəl Tabor.
2 Hya labiya ka'u ndzuɗakəu aka nda a vu Shitim.
Vəlvəl yo tlanda hi nəuma.
3 Kwa zəndə ya sə dəhə təkəra Ifərem,
ya Isra'ila da ɗəwaɗəwa nyi tsa ya wa.
Ifərem, a shata nghə tə kə ka zawar,
Isra'ila səwa ti.
4 <<Sə nda məra nda tsəu, a da kwa nənda laku
ka nda ɓəl shili da Hyel wa.
Mwaɓur zawarkur ngə ku ɗufwa nda,
a tsə'u ndo zəndə Tlakə wa.>>
5 Bukər Isra'ila chabiya tə dza,
ya njir Isra'ila ana ma'a njir Ifərem tə tləhi, aka səpəla'a kənda,
ma'a Yahuda tə tləhi kə'i nda.
6 Mada nda ma'i na kətəng kə'i tla
ki gwa'a kwambiyakur tsa Tlakəu,
a da ndo uya nyi wa,
aka a ngya nda tə cha.
7 Aka a da nda tsa'atsa'a mar Tlakə wa,
nda yah ngulisha'a wi nguli mazagwa.
Ladər kənda nə taɗər hya
kwa səwandə nda, dəhə ka fa kənda.
8 <<Mbəɗiya ma papam vu Gibiya,
tələm tsə'u vu Rama.
Hya'andə ma kurakər pah vu Bet Aven;
Banyami, ɗa ka gavərma kənda.
9 Ifərem kwa ɗa ka huɗəfi
pəshir nəuma.
A bəziya tə ya təkəɗər sə ndo ɗa,
ku pama nyavi njir Isra'ila.>>
10 Njirawawa'a Yahuda wi nji inda
kwa tsaɗə hangu gəl nda.
Huɗatla ɗa kwa səya təkəra nda
wi ɓiti hwihwi.
11 Nja nə nyi ɓwaɓwatə nə Ifərem ga dərɓiya nyi
ku vi nəuma,
aka nda fəu kərnənda ku nəu katə i'i.
12 Aka ənga, wi vuyavuya ya nə Ifərem,
wi kətla nə njir Yahuda.
13 <<Nda Ifərem tə la'a shiləkə nyi,
Yahuda tsə'u tə zəndə kəti nyi,
kəl ngə Ifərem tə sha ya təkəra Asiriya
ga sə ka gwa'a vala tsa təl kənda.
Kəl ja, a da cha uya mbə tsa nda wa,
ya a kəti nyi da wur wa.>>
14 Aka yo ɗa wi ləvari nə Ifərem,
a nə Yahuda tsə'u wi ləvari dəgaləu,
Yo tətau nda kuchiɗəkuchiɗəu, ba'a tərata ɗa,
yo fa'anda nda, ya a ndər dləuya nda da wa.
15 Kəl ba'a ya ɓəlta ɗa kya tə mbwa ɗa,
kəl sakanda nda dləukər na bikə kənda.
Ga gwa'a ɗa;
a ku ɓwaɓwatə kənda, tsa'anyata ndo gwa'a ɗa.