Bikər Njir Isra'ila
4
1 Ngatə ma ɓwanya Tlakəu, njir Isra'ila,aka nəuma Tlakə da tə kəra hi,
nahi nji inda na ngya tə hə'i na,
<<A jiri da wa, nyida da wa,
a zəndə Hyel da tə hə'i nə wa.
2 Kəl shi'uvi, tsa ndəu,
həl, kasali, tar
nəu gadlagadla ana pənda mashi ana gwa nə shi ni.
3 Aka ənga, hə'i nə kwa sə'ingu,
ya dəhə nji inda kwa, kwa kuɗa,
sərshishi takəu ana eakəu,
ana kalfi kwa kuɗa.>>
4 <<Dəhə ka ənga
ngwa vanya ndə da nə nyi bikə nə vanya ndə wa,
ya ngwa vanya ndə tsə wa,
Pərist inə yo ɓwanya ni.
5 Tləhi tanyi hyo tləhi vu'i na puchi
dəhə ka njir mətakər kwa tləhi kə'i hi.
Kəl ja, yo tsəya aman hi.
6 Nji ɗa kwa kuɗa aka tar zəndi.
<<Aka hya ngyar ngabiya, naya tsə'u a ngya hi tə ya, a tsə'u da hi pərist ɗa wa,
aka hya ngyar nəu gadlagadla Hyel kəhi,
naya ma'a yo ngyar ngulisha'a kəhi.
7 Ma ɗangkura pərist kwa tsaka,
kəl səpəla'a nda ndo mər na'a kwa tsaka,
nda kwa bəla səlir Hyel kənda na sər kuzhi.
8 Ndo səm təwa səpəla'a nji ɗa,
ndo tsuku nji ka mər səpəla'a ga nda uya zhar.
9 Kəl ja, kwa nda ɗa, wi nda nji, əngə pərist i'i tsəu.
Yo ɓu nda dəhə nda aka sənda məra nda,
yo kinda nda tsa'atsa'a na sə inda nda məra.>>
10 <<Ndo səma, ya a da ndo nyi wa,
ndo mər kasali, ya a da ndo tsakə wa,
aka nda ngyar Tlakəu
ɓitir anap halhala ana taɗə nyi,
nda kwa hənda jigadəma kənda.
12 Ndo gwa'a takər tsa katə nda nja mər na wua,
ya zəwa kənda kwa wum nənda.
Mwaɓur kasalikur kənda kwa sanda nda,
a da nda na jiri nə Hyel kənda wa.
13 Ndo hatəmachi kyo kəra mə i'i
ana hatəmachi nə nginda kyatə dəgəl i'i,
a da kiɗa oak, ana popla, ana terebint,
tangnda shanguɗa mənakə ti.
Aka ənga, ku'i kəhi tə sha ka zawar i'i,
səlkə kəhi tsə'u kwa mər kasalikur.
14 <<A da yo ɓu ku'i kəhi
aka nda ɗa ka zawar
ndara səlkə kəhi
aka ndo mər kasalikur wa,
aka shili ma'a kərnənda kwa ya da zawar
nda kwa hatəmachi kə'i zawar ku mbwa'ala,
nji inda kəla na ngabiya kwa səwa!>>
15 <<Nahi njir Isra'ila! madangə kwa mər hi kasalikur ja,
ngwa bikə da ɗa təkəra njir Yahuda wa.>>
<<Ngwa hya da yi Gilgal wa,
ngwa hya da gi Bet Aven wa.
Ya ngwa hya səmfəla na tləmər Tlakə nda na pi wa.>>
16 Njir Isra'ila nji ɓaɓalkər nda,
wi mbugul nda na kəra cha ɓaɓaləu.
Aman Tlakə kwa nau ɓəla nda
wi nguli gam tə babala?
17 Nəu katə i'i zhaliya tə Ifərem,
ngya nyi nji sənyi!
18 Mada sə sasa kənda tə wura,
nda kwa biyama na zawarkur kənda,
wa'atanyi, nda kwa nyida sər kuzhi matsa sə nda na səli.
19 Majigwal kwa shili tsəkənda nda,
ya hatəmachi kənda kwa nənda sər kuzhi.