Batəbatər Ɓwanya Dauda
23
1 Ja inə batəbatər ɓwanya Dauda:<<Zər Jesi,
ndə nda Hyel tə mərtə dəgaləu,
ndə nda Hyel nə Jakop tə dzəviya,
nacha ndər na miya tlalwa cha nə Isra'ila, cha na,
2 <<Shanguɗə Tlakə tə ɓwanya təwa ɗa;
cha fətə ɓwanya nyi tə kyara ya.
3 Hyel nə Isra'ila tə ɓwanya,
ndər ɓəla Isra'ila tə nar ɗa,
<Təl nda kwa səm təlkur ku tsa'atsa'akur,
ndə nda kwa səm təlkur na ləvər Hyel,
4 wi vi cham nə wurvi ku ləmbəkə cha, wi pəchi nda kwa mərtə sar kwa mbəla ahir par tə tsəka.>
5 <<Təwa əngə ngə Hyel kwa səkə nyi papa'akur nə nyandəla ya, aka cha mbandər nda ba'anawa na ya, mbandər nda pa'a kwa waza, alkawal nda pa'a kwa sha. Nacha ngə sə nda yo chima, nacha ngə kura ɗa, ya a zəndə tə ya təkəɗəu Hyel kwa mərti. 6 Kəl ja, nji ɗimi wi shikəɗi inda nja uchənda nda, inda a njo nau tsəkar na chi wa. 7 Kəl ja, ndə nda kwa tsəkari, kəl ana lyang ndara masəu, njo dzugwa nau nginda kəɗətsəu.>>
Ləvava Kwalkwal nə Dauda
(Lab. 11:10-41)
8 Ja'inə tləmər ləvaləva kwalkwal nə Dauda: Josheb Basshebet ndər Takemon, zhang cha ku huɗa njirawawa'a makərəu, cha ɗaka kuɗənda nji 800 ku bəji zhang ana masə nyi. 9 Mətləkunya ləvaləva kwalkwal ku huɗa nji kwalkwal makər inda nacha ngə Eliyazar zər Dodai hya'atə ku nyavi Aho. Vanya pəchi, nacha ana Dauda tə dlinyar njir Filisti inda tə tsəmtədzə ka pah vu Pas Damim. Aku bəji nda njir Isra'ila tə hwita nda, 10 kəl ja, cha ta'i ga pah njir Filisti tə nda ɗa cha cha həɗa ti, tə ɗa a tsə'u cho nau wunənda katsakər nyi wa. Tlakə tə gwa'atə kura dəgal tə ɗa pəshinda. Njir Isra'ila tə ɓəl shili da Eliyazar ka fa'a kwazhalɓi tanyi. 11 Makərkunya ləvaləva kwalkwal makər inda nacha ngə Shama zər Agi ndər Harar. Njir Filisti tə tsəmtədzə vu Lehi, tangnda vanya fa tsər da. Ngə njir Isra'ila tə hwita nda tsa njir Filisti. 12 Kəl ja, Shama tə ta'ita nyi tə ghadar fa nda. A da cha ngyar ləvaləva njir Filisti nda tsəkar tsər nda wa, cha kuɗənda nda, Tlakə tə gwa'atə kura dəgal tə ɗa. 13 A tə bəjir fwakəu, ləvaləva kwalkwal makər inda ku huɗa ləvaləva kwalkwal makərkumnyi, tə təra gya da Dauda kyo tləl Adulam, a ku bəji nda, njir Filisti tə fiya mbwar tsəmdzə kənda ku dakə Refayam. 14 A ku bəji nda Dauda ku mbwar mbua, daɓdzər ləvaləva njir Filisti tsə'u vu Baitalami. 15 Ngə hili tə tə Dauda, ngə cha na, <<Maya nda wul nghwa ja, vanya ndə shili na ɗa ɓiti hya'atə ku ka'ur ɓiti nda ləhə nya lakur gwa Baitalami nda!>> 16 Ngə ləvaləva kwalkwal makər inda tə mə na hwi ga tahəbiya mbwar tsəmdzə njir Filisti, ga gwa gətsə ɓiti ku ka'ur ɓiti nda ləhə nya lakur gwa Baitalami nda, ga shilinə nə Dauda. Kəl ja, cha ngyar sa, təvira ənga cha pənda mar Tlakəu. 17 Cha na, <<A da yo wuriya sa sənə Tlakə wa, aka cho ɗa wi mashi nji inda sənda pya nda nə yo sa!>> Aka ənga cha ngyar sa. Nacha ingə sə nda ləvaləva kwalkwal makər ingə tə məra.
18 Abishai zamənya Joab zər Zeruya ngə gau ləvaləva kwalkwal makərkumnyi inga. Cha pah nji 300 na katsakər nyi ga kuɗənda nda, ga ɗa ka ndə kwalkwal wi nji makərkumnyi inda. 19 Nacha ngə ndə nda fiya tləm nyi matsa nji kwalkwal makər inda. Cha ɗa ka gau kənda madangə a da cha fiya tləm nyi wi ləvaləva makər inda wa. 20 Benaya zər Jehoyada ndər Kabzil, vanya ləvaləva kwalkwal ngə nda tə fiya tləm nyi, cha kuɗənda ləvaləva kwalkwal nə njir Mowab mətləu. Vanya pəchi tsə'u nda mindindili tə ɗa, cha gu tləl ga gwa tsəya ləvari. 21 Ətsəu, vanya ndər Masar da ghərətəu, cha tsəya. Madangə masə ku cha ndər Masar nda, Benaya tə ya kəra cha na zəwa, cha yi dləuya masə nda ku cha ndər Masar nda ga tsəya nyi ni. 22 Nacha ingə sə inda Benaya zər Jehoyada tə məra, təwa ənga cha ɗa ka ləvaləva kwalkwala wi nji makər inda. 23 Cha fiya tləm nyi matsa nji makərkumnyi inda, kəl ja, a da nja jiga nyi ku huɗa ləvaləva kwalkwal makər inda wa. Ngə Dauda tə fiya nyi zhang ku huɗa njir tsakəra cha. 24 Alenya nji inda ku huɗa nji makərkumnyi inda, nanda ingə, Asahel zamənya Joab, Elhanan zər Dodo hya'atə vu Baitalami, 25 Shama ndər Herod, Elika ndər Herod, 26 Helez ndər Palti, Ira zər Ikesh hya'atə vu Tekowa, 27 Abiyezer hya'atə vu Anatot, Mebunai ndər Hushat, 28 Zalmon ndər Aho, Maharai ndər Netofat, 29 Heled zər Ba'ana ndər Netofat, Itai zər Ribai hya'atə vu Gibiya a vu Baitalami, 30 Benaya ndər Piraton, Hidai hya'atə nya dəl Ga'ash, 31 Abi Albon ndər Arbat, Azmavet ndər Barhum, 32 Eliyaba ndər Sha'albon, zər Jashen, Jonatan 33 zər Shama ndər Harar, Ahiyam zər Sharar ndər Harar, 34 Elifelet zər Ahasbai ndər Ma'akat, Eliyam zər Ahitofel ndər Gilon, 35 Hezro ndər Karmel, Pa'ari ndər Arbi, 36 Igal zər Natan hya'atə vu Zoba, 37 Zelek ndər Amon, Naharai ndər Birot, ndər hə ləgə Joab zər Zeruya, 38 Ira ndər Itri 39 ana Uriya ndər Hiti. Nanda makaərkumnyi parnya məɗəfə nda dəhə dəhəu.