Miya Dauda nə Kura
22
1 Dauda nar nyi miya nənna, nə Tlakəu, nda Tlakə tə dləuya nyi ku cha dəhə njir dawa nyi ana ku cha Saul. 2 Cha na, <<Tlakə ngə mbəgulmə ɗa, ɓangtili ɗa ana ndər dləuya ɗa. 3 Hyel ɗa nacha ngə mbəgulmə ɗa, tangnda yo mbuta ɗa ti, ləgə ɗa mbəɗə ɗa. Nacha ngə tləl ɗa, mbwar mbu ɗa ana dləuya ɗa, ka dləuya ɗa tsa njir tlə pah. 4 Ya nga Tlakəu, nda nji ka njo fal nyi, cha dləuya ɗa tsa njir dawa ɗa. 5 Dəl səyasəya nə tah, tə ɓandə ɗa, səyar dəl nə tah tə ndəɗə dunama ɗa. 6 Təmachi nə tah tə mbiya ɗa, ngə hwa tə ngəya ɗa ləbam. 7 Aku ɓwaɓwatə ɗa ya nga Tlakəu, ya nga Hyel ɗa. Hya'atə ku mbwa'alə nyi cha ngatə kuraka ya, tiwi ɗa tə go hima cha. 8 Dunəya tə dzədzi, pa'akura huɗamələm tə dzədzi, aka huɗa Hyel tla ti. 9 Ear tə biya ku chira cha, ngə hu'u gəɗəgɗə ana hahir gəɗəgəɗa, tə biya ku nya cha. 10 Cha mbəɗiya huɗamələm ga səya, ana kutlə kyakyar da kiɗa hya cha. 11 Cha gi tanyi tə ya səpipi nda na babəkəu, ga fəla, cha ma'i tə babəka səpipi nda, tə gyang. 12 Cha mbuya kərnyi na kutla, kutlə ləmbəkə kyakyar nda tə piya ɓiti. 13 Zəbiya ku nghənghəɗi nda huɗə ngha, hu'u tə hya'atə ku hahir kwa gəɗa. 14 Kəl ngə Tlakə tə ɓwanya səya kya huɗamələm wi dəradlər par, kuraka kə nga, Hyelləu, nakə nda dəgal matsa alenya hyel. 15 Cha ha hafa i'i, ngə a wiɗənda njir dawa, cha sə tə nghənghəɗi, ngə a wiɗənda nda. 16 Ndəla fa'a tə chabiyadza, ya ngə ghəyar hə'i tə ɗa tə babal təwa dunamar tsə nda Tlakə tə tsəa, təwa səpi hya'atə ku chira cha. 17 Hya'atə kya huɗamələm ka ha cha ka ga hətə ɗa shi, hya'atə kyo ndəla ɓiti cha həbiya ɗa zəbiya. 18 Cha dləuya ɗa tsa njir dawa ɗa inda na dunama, cha dləuya ɗa tsa njir ngya ɗa inda ndiya dunama ɗa. 19 Ku bəji nda ya ku təmachi nda pah ɗa, kəl ja, Tlakə tə kanda ɗa. 20 Cha dləuya ɗa tsa təmachi, cha dləuya ɗa aka cha ngatə məsəɗakə na ya. 21 Tlakə tə na'a wazəba aka ya mər sə nda tsa'atsa'a, cha səkə ɗa papa'akur aka bikə ɗa da wa. 22 A ɓəlatə tə ya gadlagadla Tlakəu, a da ya shata ɗa tsa Hyel ɗa wa. 23 A ɓəlatə tə ya dəhə gadlagadla nyi, a da ya ngyar nəu tsaubar nyi wa. 24 Ndə kəla bikə ya huɗə nyi, ya a ɓəlatə tə ya kərɗa tsa səpəla'a. 25 Aka ənga cha na'a wazəba aka tsa'atsa'akur ɗa, məlməl na chamkura ya tə lya cha. 26 Nakə Tlakəu, ndər jiri ka nə nji inda na jiri, ya ndə mənakə ka nə nji kəla bikəu. 27 Karti ka nə nji karti, kəl ja, ko mər dawa na nji pəla'a. 28 Ko dləuya njir həyakər, kəl ja, ko tashiya njir hə kəra kərnənda. 29 Nakə ngə vi cham ɗa Tlakəu, ka shandə kutlə ɗa tə ɗa ka vi cham. 30 Ka na'a dunamar pah njir dawa ɗa, ana gyalkur wazənda ɓangtili mələm kənda. 31 Kəl nda Hyel nənyi, dəhə sə nda cho məra, tsa'atsa'a tanyi, nacha ngə ləgə nji inda kwa gwa'a mbwar mbu da cha. 32 Tlakə zhang tanyi ngə Hyel, ya nacha ngə mbwar mbu kəmən. 33 Hyel nacha ngə mbwar mbu ɗa nda na dunama, ya cho ɓəlatə ɗa ku laku nda yo ma'i kwa. 34 Ma yo ma'i ku lya məa, cho ɓəlatə ɗa sə do uya ɗa wa, ya a da yo tləhi wa wi kanyaɗəu. 35 Cha dlədləɓətə ɗa ənda yo pah, cha ya kwa nau ma'ubiya laga ndzəa. 36 Ka ɓəlatə ɗa ga mbəɗandə ɗa, vala ngha tə gwa'atə ya ɗa na səli. 37 Ka kanda tsa njo səya ɗa, ya a ya taa dla pa'a wa. 38 Ya gədlə njir dawa ɗa ga kura nda, a da ya ɓəl wa kəl nda ya kuɗənda nda. 39 Ya dərɓiya nda, a da nda nau hya'atə wa, a tə piya nda da kiɗa hya ya. 40 Ka na'a dunama ka pah, ana kura təkəra njir dawa ɗa. 41 Ka mərtə njir dawa ɗa tə təra na hwi tsa ya, ya kuɗənda nji inda kwa ngya ɗa. 42 Nda gwa'a vala, kəl ja, a ndər dləuya nda da wa, nda nga Tlakəu, ya a da cha wum wa. 43 Ya dərɓənda nda tə nda ɗa kəl kəɓətə kuranda wi bərbər, ya dərəɓənda nda wi tsabəu ku laku. 44 Ka mbəɗandə ɗa tsa njir gwa'a ɗa na pah, ga ngya ɗa na təlkur təkəra jul nji. Nji inda pa'a yo zəndə tə ɗa da kiɗa ya. 45 Nji shilishili kwa uzhi huɗə ɗa, ma nda wur ngatə ɗa, ndo nəu nya ya. 46 Ləvər kwa səya nda, ndo tsamətlaɗə ku mbwar mbu kənda. 47 Tlakəu, ana pi ka! Yo fal ngha! Bəzə ma dəgalkur Hyel nda na dunama ndər dləuya ɗa! 48 Nacha gwa'atə ya kura njir dawa ɗa, cha mərtə jul nji tə ɗa da kiɗa ya, 49 ga mbəɗandə ɗa tsa njir dawa ɗa, Tlakəu, ka mərtə ya kura njir dawa ɗa, ga dləuya ɗa tsa njir gwa'a pah. 50 Aka ənga, yo fal nghə ku huɗa jul nji, yo na miya fal nə ngha. 51 Hyel tə nə nyi kura nə təl nda cha tabiya, cha char nyi nyida kəla wur nə ndə nda cha tabiya, a nə Dauda ana nyandəla cha ba'anawa.