Kisəkur aka Njir Gibiyon
21
1 Ku bəjir təlkur Dauda, huɓə tə tlə fa tsa'atsa'a makər a tsau da wa, aka ənga Dauda tə gədi Tlakəu. Ngə Tlakə tə na, <<Bikər pənda mashi da təkəra Saul nga, aka cha kuɗənda njir Gibiyon.>> 2 Ngə təl tə tsəmətə njir Gibiyon ga ɓwanya nə nda. (Njir Gibiyon a da nda njir Isra'ila wa, njir Amori nda, njir Isra'ila tə səmnda fəla ənda a da ndo kuɗənda nda wa, kəl ja, Saul tə gwa'a cha kuɗənda nda dəhəu, aka cho i kəl njir Isra'ila ana njir Yahuda səkənda ngə kwa ngya tə hə'i nda.) 3 Ngə Dauda tə jau njir Gibiyon bəra, <<Mi sə nda yo mərtə hya? Aman yo ɗana ɓatlətə sə ɗimi inda nja mərtə hi ga hya səkə nyi papa'akur nə njikə Tlaka?>> 4 Ngə njir Gibiyon tə wum nə nyi, <<A azurfa ndara bəjingha do nau ɓatliya pama ea ka Saul ndara njir ki nyi wa. Ya a da eo i nja tsəya vanya ndə ku huɗa njir Isra'ila wa.>> Ngə Dauda tə jau nda, <<Ya mi ngə hyo i ya mərtə hya?>> 5 Saul tə kuɗə ea, cha haɓə cha kuɗənda ea dəhəu, tsa ea da ngya tsa'a kə'i njir Isra'ila mada amani ku hə'i kənda. 6 Aka ənga, nə ea nguli shili məɗəfə ku nyadəla Saul, ea hakəya nda huɗə Tlakə vu Gibeya, mələm Saul, təl nda Tlakə tə tabiya.>> Ngə təl tə na, <<Yau yo nəhi nda.>> 7 Təl tə mbəɗandə Mefiboshet zər Jonatan, zər Saul, aka səmfəla nda Dauda ana Jonatan zər Saul tə mər ku pama nda huɗə Tlakəu. 8 Kəl ja, təl tə səya Armoni ana Mefiboshet, nguli shili Saul inda nda yah na Rizpa kwar Aiya, ana nguli shili tufəu inda Merab kwamənya Saul tə yiyah nyi nə Andriyel zər Barzilai ndər Mehola. 9 Ngə cha nə nyi nda nə njir Gibiyon, ngə nda kuɗənda nda kya tə dəgəl a huɗə Tlakəu. Dəhə nda məɗəfə inda tə kuɗa, nja kuɗənda nda pəshir tangərmar pəchir mər fa uhi nda njo nga bale. 10 Ngə Rizpa kwar Aiya kwatəra Saul tə ɓatlətə shanguɗa nə kərnyi na guzhalguzhal kyo məa, tangnda gundəɓər dza nji kuɗəkuɗə inda ti, ga ngya tangnda fwatə tə bəjir ghəyar fwakəu, tsa'a tə səyar jomən, a da cha ngyar eakə tə tsəkar gundəɓər dza nji kuɗəkuɗə inda puchi ndara kum takə tsəkar əvu'i wa. 11 Nda nja nar nyi nə Dauda, sə nda Rizpa kwar Aiya kwatəra Saul tə məra, 12 ngə cha təra ga ki fa'atə ɗihi Saul ana nə zər nyi Jonatan tsa njir Jabesh vu Gileyad. (Aka nda həltə gundəɓər dza nji kuɗəkuɗə inda a tə babal a vu Bet Shan, tangnda njir Filisti tə hakəya nda ahir nda tsəya Saul vu Gilbowa.) 13 Dauda tə fa'atə ɗihi Saul ana nə Jonatan, ətsə'u cha fa'atə ɗihi nji məɗəfə inda nja hakəya inda. 14 Nda haɗiya ɗihi Saul ana nə Jonatan ku hu Kish adanya Saul, a vu Zela a ku hə'i Banyami, ga mər dəhə sə nda təl tə tsau nda bar. Ahir ənga, Hyel tə wum pətlənya a tə dəbar hə'i nda.Pah ka Njir Filisti
15 Vanya pah tə ɓəla hya'atə ku pama njir Filisti ana njir Isra'ila. Dauda tə təra səya pah njir Filisti, tə nda ɗa həɗa tə cha. 16 Ngə Ishbi Benob, zhang ku huɗa nyandəla Rafa, nda na tədəɓəkura kyara masə ndzə nyi shekel 300, cha hawulya taɗər katsakər cha na ənda cho tsəya Dauda. 17 Kəl ja, Abishai zər Zeruya tə shili dləuya Dauda, cha dəgə ndər Filisti nda ga tsəya nyi. Ngə ləvaləva Dauda tə səmnda nyi fəla nə Dauda ga na, <<A tsə'u ko tsakətə biya ka ki pah tsa'a kə'i ea wa, tsa'aka a təkəsə njir Isra'ila do tə wa.>> 18 Ahir ngə tsəu, nda ɓəla pah ka njir Filisti vu Gab. Ngə Sibekai ndər Husha tə tsəya Sifai, zhang ku huɗa nyandəla Rafa. 19 Aku vanyi pah ka njir Filisti vu Gab, Elhanan zər Ja'are-Oregim ndər Baitalami tə tsəya Goliyat ndər Giti, nda na gəda masə nyi wi zəwa ndzur. 20 Ngə pah ɓəla hya'atə vu Gat, a vu nda vanya ndə da ghərətəu, nda kwa i pah, ana ku'ir cha cha kwah chisəm na matsal, əngə ku'ir hya cha tsə'u kwah kya'a, hya'atə ku nyandəla nji kwalkwala. 21 Nda cha həyatə njir Ira'ila, ngə Jonatan zər Shimeya zamənya Dauda tə tsəya nyi. 22 Nji fwaɗə ingə Dauda kə'i nji nyi tə kuɗənda inga, nyandəla nji kwalkwal nə Gat nda.