Sheba tə Tlə Mwali nə Dauda
20
1 Vanya ndər tabwal da na tləm nyi Sheba zər Bikri, ndər nyavi Banyami. Cha mbəɗiya tələm ga na, <<A sə da wendə mən na Dauda wa, a sə da məno gwa'a tsa zər Jesi ngə wa! njir Isra'ila, kala ndə təra kyo madləɓa nyi!>> 2 Kəl dəhə njir Isra'ila tə ngyar Dauda ga nəu Sheba zər Bikri. kəl ja, njir nyavi Yahuda tə ngya tsa'a ka təl kənda, fwatə vu Urdən tsa'a vu Urshalima. 3 Nda Dauda tə dzəva tə patla nyi vu Urshalima, cha fa'atə kwatəra kumə nyi inda cha ngyar ka nda tsamartə patla nda, ga pəu nda ku vanya ki ga fəkə nda ndər ɓəla. Cho nə nda dəhə sə nda ndo gwa'a, kəl ja, a da cha piya na nda wa. Nja ngya nda nanda səkənda nda ngya wi mahi'i inda shili kənda tə kuɗa, tsa'a tə pəchir tə kənda. 4 Ngə təl tə nar nyi nə Amasa, <<Tsəmtə njir Yahuda nda shili ku hanyi makərəu, nakə ma'a ka shili tsa'a kə'i nda.>> 5 Kəl ja, nda Amasa təra ka ki tsəm njir Yahuda, cha finda bəji ndiya matsa bəji nda təl tə nə nyi. 6 Ngə təl tə nar nyi nə Abishai, <<Sheba zər Bikri kwa takasiya mən ndiya matsa ənda Absalom tə məra. Fa'atə nji ɗa ka gədlə nyi, ma əngə wa cho kwasə mələm inda na ɓangtili ya cho mbəɗə tanyi tsa mən.>> 7 Aka ənga, Joab kə'i nji nyi ana njir tsakəra təl, ana dəhə njir nau pah ana Abishai kwa nəu na nda, nda ngyar Urshalima ka gədlə Sheba zər Bikri. 8 Manda nda gya tə mə dəgal vu Gibeyon, ngə Amasa tə shili həya nda. Joab tə pəndzə kar pah, cha mbabiya sara cha na gyarakən ana katsakər ku kiki nyi mbambanyi tə gyarakən nda. Nda cha tsaɗardzə biyama, ngə katsakər nda təɗa. 9 Ngə Joab tə nar nyi nə Amasa, <<Aman ɗakə zamə ɗa?>> Ngə Joab tə ha chisəma cha ga gəzəya təngha Amasa ka cha gaɓətə nyi. 10 Jigadəmar Amasa da təkəra katsakər nda ku matsala Joab nda wa. Ngə Joab tə dzvəya nyi tə ta cha, ngə halya cha pə səya hu'i ngə cha tah. Ngə Joab nanda na Abishai zamə nyi, tə nəu hir Sheba. 11 Kəl zhang ku huɗa ləvaləva Joab tə ta'i tanyi dza gundəɓər dza Amasa nda, ga na, <<Dəhə ndə nda biyahir Joab ana Dauda cha nəu Joab!>> 12 Gundəɓər dza Amasa bəraɓə ku mashi nyi ku ghadar laku. Nda ləvaləva Joab tə la'a ənda dəhə nji tə ta'i ghərdzəkəu, ngə cha təɗənda gundəɓər dza Amasa nda ku laku ga tulkər sərtul təkəri. 13 Ahir nda nja hənda gundəɓər dza Amasa ku laku, ngə dəhə nji tə nəu Joab ki gədlə Sheba zər Bikri. 14 Ngə Sheba tə zhultə dəhə nyavi njir Isra'ila ga shili ku mələm Abel Bet Ma'aka, ngə dəhə njir nyavi Bikri tə tsəmətədzə ga nəu nyi gu ta mələm nda. 15 Dəhə ləvaləva inda tsa'a na Joab tə shili ɓandə Sheba vu Abel Bet Ma'aka. Nda ɓundzə nyi hə'i nə ɓangtili mələm nda məlməl na dzəgamkura cha, alenya nji tsə'u kwa wazə ɓangtili nda. 16 Kəl vanya mala nda na dəma ku mələm nda tə na na kurakə dzəgamdzəgam bəra, <<Ngatə ma! Ngatə ma! Nar nyi ma nə Joab cha shili tangnə ea ɓwanya.>> 17 Ngə Joab tə ya da cha, ngə mala nda jawa, <<Nakə ngə Joab ya?>> Ngə Joab tə wuma <<Ah naya nga.>> Ngə mala nda na, <<Səhimi da sə nda mava nghə kwa dəka.>> Ngə Joab tə na, <<Janə yo səhimi.>> 18 Ngə cha na, <<Nji kwa na haaɗa bəra, <Gwa'a dəma vu Abel təkəra sə nda wendə ngha,> ya nacha ngə sə nda nji kwa məra. 19 Naea njir Isra'ila inda na piyarɗufəu ana jirikur ea. Ko gwa'a ka wazənda mələm nda na səli vu Isra'ila. Mya gwa'atə ko gwa'a ka ndasənya sərfa'aki Tlaka?>> 20 Ngə Joab tə na, <<Ga Hyella kanda! A da yo səwandə ndara ya wazənda mələm kəhi wa! 21 A da pa'a wa. Vanya ndə da na tləm nyi Sheba zər Bikri, hya'atə ku hə'i dəgəl nə Ifərem, cho gwa'a tlə mwali nə təl Dauda. Ma hya wur na'a nyi, yo ma'i ta ɗa ba'a ngyar mələm kəhi.>> Ngə mala nda nar nyi nə Joab, <<Njo vakəbiya nghə kəra cha təwa kəra ɓangtili.>> 22 Ngə mala nda təra kya da dəhə njir mələm nda na ɓwanyi dəma nyi, ngə nda tlanda kəra Sheba zər Bikri ga vakətənyi nə Joab. Ngə Joab tə mbəɗiya tələm, ngə nji nyi tə ngyar mələm nda ga ɓələu, kala ndə tə təra kyo ki nyi. Ngə Joab tə ɓəl yada təl vu Urshalima. 23 Joab ngə təkəra dəhə ləvaləva Isra'ila, Benaiya zər Jehoyada tsə'u, nacha ngə gau nə njir tsakəra təl. 24 Adoniram ngə gau njir mər tlər tuku, Jehoshafat zər Ahilud tsə'u, nacha ngə ndər tsəfə labar. 25 Sheva ngə ndər tsəfa, Zadok ana Abiyatar ingə pərist. 26 Ira ndər Jayir tsə'u, nacha ngə pərist nə Dauda.