19
1 Nja nar nyi nə Joab ənda, <<Təl kwa tiwi ana sə'ingu.>> 2 Aka ənga, kəl ngə hirgyaɗi kura nda nda kura pəshinda nda tə ɗa ka huɗatla nə dəhə nji, aka ləvaləva ngatə tə ənda nja na, <<Təl kwa sə'ingu zər nyi.>> 3 Ngə ləvaləva inda tə təra gu ta mələm tə ɗəwa pəshinda, wi ləvaləva inda nja kura nya pah. 4 Ngə təl tə mbuya huɗəma cha ga tiwi na kurakə dzəgamdzəgaməu, cha na, <<Zər ɗa Absalom, zər ɗa!>> 5 Kəl ngə Joab tə təra gu ki gwa da təl ga gwa na, <<A nə nyi tə kə sər kuzhi nə dəhə nji nghə ənya, nji inda tə dləuya ngha ana nguli shili nghə ka ku'imahi'i ngha, ana mahi'i nghə ka kwatəra nghə i'i. 6 Aka ko nyida njir dawa ngha, ko ngyar njir nyida ngha. A char tə ka tə babal ənya ənda, njir nəu na ləvaləva ana ləvaləva ngaha, a sə da nda təkər nə nghə wa. A la'a tə ya ənda ko nda ngatə məsəɗakə ma Absalom tə nda ɗa na pi ənya, naea tsə'u kuɗə ti. 7 Aka ənga ma'i ka biya ɓwanya nə nji ngha, ka tsətə nda ɗufəu. A səmda tə ya fəla na tləmər Tlakəu, ənda ma a ka biya ɓwanya nə nda wa, təvi mbudla zəkəu, a mada ndə zhang da tsa'a na kə wa. Ya sə ngə kwa ɗa sə ɗimiɗimi ndiya matsa dəhə sə ɗimi inda tə uya nghə fwatə ku tlakalakur ngha tsa'a tə pəchi nə ənya na.>> 8 Kəl ngə təl tə hya'atə ga ngyata nyi ku lakur gu ta mələm. Nda nja nar nyi nə nji bəra, <<Wula təl biya nya lakur gu ta mələm,>> ngə dəhə nda tə shili huɗə nyi.Dauda tə Ɓəl Gwa Urshalima
Ahir ənga, ngə dəhə njir Isra'ila tə təra na hwi kyo ki kənda i'i. 9 Nji tə ghəya kəpal ku pama kərnənda ndo na, <<Təl Dauda tə dləuya mən tsa njir dawa kəmən, nacha ngə ndə nda dləuya mən tsa njir Filisti. Kəl ja, janə cha hwibiya tə ku mələm tsa Absalom. 10 Məna dzəviya Absalom ka cha səm təlkur təkəra mən, ngə nja tsəya nyi ku pah. Yau mya gwa'atə məna bəgəta mən tsa ki ɓəlandə təl shila?>> 11 Labar ɓwanya nda njir Isra'ila kwa pə nda həya tə təl Dauda. Aka ənga cha sə Zadok ana Abiyatar nda pərist i'i nda jawar njirawawa'a Yahuda bəra, <<Mya gwa'atə hya ɗa batəbatər nji ku huɗa nji inda kwa gwa'a nja ɓəlandə təl shili ku ki nya? 12 Ka zamə ɗa hi, ya mashi ɗa. Mya gwa'atə hya ɗa ka batəbatər nji inda kwa gwa'a ɓəlandə təl shila?>> 13 Nar nyi ma nə Amasa bəra, <<A da mashi ɗa kə ma? Ga Tlakə tlanda ɗa nəuma macha fwatə ənya a da nakə ngə ndər nəu na ləvaləva təvira Joab wa.>> 14 Ana ənga, Dauda tə səya tə ɗufwa dəhə njir Yahuda, nda daɓətəkər ga ɗa wi ndə zhang. Ngə nda sətə nyi kurakə nə təl bəra, <<Ɓəl shili, naka ana dəhə nji ngha.>> 15 Ngə təl tə go lakur ɓəl shili Urshalima, nda cha shili Urdən kəl janə njir Yahuda tə shili Gilgal ga ka dləu təl nda ləbiya nyi biya tə ya Dəl Urdən. 16 Shimai zər Gera, ndər nyavi Banyami hya'atə vu Bahurim, tə kusa səya kə'i njir Yahuda ka nda ɓə ka təl Dauda. 17 Nda shili kə'i njir nyavi Banyami 1,000, tsa'a na Ziba, kadakaliya njir ki Saul, nanda kə'i nguli shili nyi kwabətufəu ana mavi'i mətləkumnyi. Nda kusa ya nya Urdən ka nda ɓə kə'i təl. 18 Nda dləgəlbiya dəl nda ka ga nda biya zəbiya na njir ki təl, ka nda mərtə nyi sə nda cho chima. Nda Shimai zər Gera tə dləgəlbiya Urdən, ngə cha vakənda kərnyi huɗə təl 19 ga na, <<Ngwa tlakəɗa təl da səya ɗa na bikə wa. Ngwa ka tsə'u ɗənghatə ənda mava nghə zandə sə pəshinda tlakə ɗa təl tə ngyar Urshalima nda wa. Ngwa təl da gəzə ku jigadəma nyi pa'a wa. 20 Aka naya mava nghə zəndə tə ənda a mər tə ya səpəla'a, nacha gwa'atə ya ɗa tangərmar ndə nda tə shili ku huɗa dəhə njir ki Yusufu ənya, ka ga ya shili ɓə na tlakə ɗa təl.>> 21 Ngə Abishai zər Zeruya tə na, <<A da ki nja tsəya Shimai aka cha ngəl ndə nda Tlakə tə dzəviya ka təl ma?>> 22 Ngə Dauda tə nar nyi nə Abishai, <<Mya wendə ɗa na hi nguli shili Zeruya? Hyo gwa'a hya təɗəkə ɗa ɓwaɓwatə ya? A ndər Isra'ila da njo tsəya ənya wa, aka naya nə təl Isra'ila ənya. 23 Aka ənga ngə təl tə nar nyi nə Shimai, <<A səmnda tə ya fəla a da ko tə wa.>>
24 Ngə Mefiboshet ajinya Saul tə təra səya ka nda səya ɓə na təl. Fwatə pəshir təl təra, tsa'a tə pəshinda təl tə ɓəl shili, Mefiboshet da zhaka chi hya cha, ndara cha ɓatlə huɗəma cha, ndara cha chinda ləkutə nyi i'i wa. 25 Nda Mefiboshet tə shili hya'atə vu Urshalima ka cha ɓə na təl, ngə təl tə jau nyi, <<Mya gwa'atə a da ka ma'i tsa'a na ya za Mefiboshet wa?>> 26 Ngə Mefiboshet tə wuma, <<Tlakə ɗa tələu, wi nda ka zəndə ənda ndər gadal ya, ya nar nyi nə mava ɗa Ziba <Sətə ɗa lifarəu tə ya kwara ɗa, ka ga ya ma'i tsa'a na təl.> Kəl ja, cha shandə ɗa kər ga ma'i tanyi. 27 Ngə cha shili səwandə tləm ɗa nə ngha. Tlakə ɗa tələu, wi chama Hyel ka, aka ənga mər sə nda tə ɗa tsa'atsa'a nə ngha. 28 Dəhə nyandəla njival ɗa sə da ndo ki nə matsa tə alvari wa, kəl ja, ka nə nyi mbwa nə mava nghə ku huɗa nji ndo səm sərsum kə'i ka. A laku da tsa ya nda yo ɓəla gədi vanya kwambiyakur tsa təl səkə wa.>> 29 Ngə təl tə nar nyi, <<A da kəl ka ɓəla pə vanya ɓwanya səkə wa, a wurtə ya na naka ana Ziba, hya təkəya kar Saul məlmələu.>> 30 Ngə Mefiboshet tə nar nyi nə təl, <<Alvari, ngya nyi nji na dəhə sə nə Ziba, mana tlakə ɗa təl shili tə ku ki yiyinghəu.
31 Ngə Barzilai ndər Gileyad tə shili tsə'u hya'atə vu Rogelim ka cha ləbiya təl biya tə ya dəl Urdən. 32 Barzilai ndə halhal cha gagaɗa, fa nyi chisəkumnyi. Cha vala təl ku bəji nda cha vu Mahanayim, aka ndər gəna cha. 33 Ngə təl tə nar nyi nə Barzilai, Anda ma təra gwa Urshalima, yo gwa tsamartə ngha.>> 34 Kəl ja, Barzilai tə wum nə təl bəra, <<Ma ko na ma təra gwa Urshalima ngə ya, wi fa yiɗawa tə həya ɗa dza? 35 Sakana fa ɗa chisəkumnyi. Kwa nau ya təkəbiya sə nda mənakə ana sə nda ɗimi ya? Mava nghə kwa ngatə cha məsəɗakəkura sə nda cho səma ana sə nda cho sa ya? Tsə'uta ɗa kwa ngatə mənakəkura kuraka njir na miya ya? Alvari, kəl nda ya ɗa ka sə nda kwa tsakətə nghə tləra. 36 Mava nghə kwa ləbiya nghə tsau tanyi, a da yo ki na chul ngəna wazəba wa. 37 Ngyar mava nghə cha ɓələu, ga ya ki tah, ku mələm kəea ləhə dza hu ada ɗa ana ama ɗa. Kəl ja Alvari, janə Kimham mava ɗa cha ma'i tsa'a na ka. Mərtə nyi sə nda ɗa mənakə nə ngha.>> 38 Ngə təl tə na, <<Kimham kwa ma'i tsa'a na ya, ya yo mərtə nyi sə nda kwa ɗa mənakə nə ngha. Ya kala sə nda ko gwa'a yo mərtə ngha tsə'u.>> 39 Ngə dəhə nji tə dləgəlbiya Urdən, təl tsə'u tə dləgəlbiya. Ngə təl tə gaɓətə Barzilai ga səkə nyi papa'akur, ngə Barzilai tə ɓəl kyo ki nyi. 40 Ahir nda dləgəlbiya dəl nda, Kimham tə ma'i tsa'a na təl, dəhə ləvaləva Yahuda ana mar ləvaləva alenya nyavi Isra'ila tə ləbiya təl yi Gilgal. 41 Ngə dəhə njir Isra'ila tə yada təl ga yi nar nyi, <<Mya gwa'atə zamən ea njir nyavi Yahuda tə hənda təl tsa ea ga zəbiya na cha ana njir ki nyi ana dəhə nji, ga shili na nda zəbiya tə ya Urdəna?>> 42 Ngə dəhə njir Yahuda tə wum nə njir Isra'ila bəra, <<Ea mər ənga aka njikənjikə ea lələhə ka təl. Mya gwa'atə huɗa hya tla təkəra ənga? Vanya sər təl da ea səmnya ya? Vanya sə da ea fa'atə ka kərnəea ya?>> 43 Ngə njir Isra'ila tə wum nə njir Yahuda, nyavi kum tsa ea ku təlkur na, a ndiya hi tə ea gyalkur fiya Dauda ka təl! Mya gwa'atə hya həyatə ea, ya naea nga ghəya pə nyar bəlandə təl shila?>>
Kəl ja, bəliya ɓwanya nda njir Yahuda tə pə nda, kwa təa, matsa nə njir Isra'ila.