Dauda tə Jigabiya Ləvaləva
24
1 Huɗa Hyel tə ɓəla tla tsa njir Isra'ila, ngə cha tsəkutə Dauda, ga na, <<Ma'i ka yi jigabiya njir Isra'ila ana njir Yahuda.>> 2 Aka ənga, ngə təl tə nar nyi nə Joab ana njirawawa'a ləvləva inda kə'i cha bəra, <<Ma'i ma hya zhultə dəhə nyavi njir Isra'ila fwatə ku hə'i Dan tsa'a vu Biyersheba hya jigabiya ləvaləva ga ya zəndə ndara yiɗawa nda.>> 3 Kəl ja, Joab tə wum nə təl bəra, <<Ga tlakə mərtə ɗangkura ləvaləva nghə nda ɗa zhaka gharu matsa wi nə nda sakanə na, ga Hyella i tlakə ɗa təl cha la'a tsəu. Kəl ja ya, mya gwa'atə tlakə ɗa təl kwa i cha mər chul ngəna səa?>> 4 Kəl ja, ɓwanya təl tə ndiya nə Joab ana gau ləvaləva inda, ngə nda hya'atə huɗə təl ga təra ki jiga ləvaləva njir Isra'ila. 5 Ahir nda dləgəlbiya Urdən, ngə nda ngya vu Arower, mələm nda tə ghada dakəu, bətə gwa Gad tsa'a vu Jazar. 6 Nda yi Giliyad ana Kadesh ku hə'i njir Hiti. Ngə nda təra yo mələm Dan Ja'an, hya'atə ku mələm Dan Ja'an tsə'u nda təra gwa Sidon. 7 Ngə nda təra yi Taya mələm nda na ɓangtili ana dəhə hə'i njir Hivi ana hə'i njir Kan'ana. Hya'atə hinda nda təra yi Biyersheba təwa holma nə Yahuda. 8 Manda nda zhultə dəhə hə'i nda, ahir hya dləa ana hanyi mətləkumnyi, nda ɓəl shili Urshalima. 9 Ngə Joab tə nə nyi ɗangkura ləvaləva nə təl, 800,000 vu Isra'ila ana 500,000 vu Yahuda. 10 Ahir Dauda tə wurandə jiga ləvaləva inda, ngə jigadəma nyi tə char ənda a mərtə cha bikəu, ngə cha nar nyi nə Tlakəu, <<A mər tə ya səpəla'a ku sə nda ya məra. Sakan ja Tlakəu, yo gədi ngha, hənda bikər mava ngha. A mər tə ya kəkəngkur.>> 11 Təvi Dauda hya'atə mbudla, Tlakə wurtə nar nyi nə Gad ndər mətakər Dauda bəra, 12 <<Ma'i ka yi nar nyi nə Dauda bəra, <Janə sə nda Tlakə tə na, yo nə nghə sə makər ka tabiya zhang kwa nda yo mərtə ngha.> >> 13 Aka ənga Gad tə təra yada Dauda ga yi nar nyi, <<Tabiya zhang ku huɗa sə ina, ndara ko i huɓa tlə nə fa makər tə hə'i ngha, ndara njir dawa nghə dla'a nghə nə hya makərəu, ndara təmachi nə hanyi makər ku hə'i ngha. 14 Ngə Dauda tə nar nyi nə Gad, <<A gwa tə ya ku ɓwaɓwatə nya ja! Kəl ja, a da yo i nji nda tlanda ea nəuma wa, bəliya Tlakə na kərnyi cha tlanda ea nəuma, aka ndər təhuɗə cha.>> 15 Aka ənga Tlakə tə sətə təmachi təkəra Isra'ila fwatə əmbudla nda, tsa'a tə bəji nda nja ɓatliya, nji 70,000 tə kuɗə fwatə vu tə hə'i Dan tsa'a vu Biyersheba. 16 Nda chama Hyel tə ha cha cha ka cho kuɗənda njir Urshalima, ngə Tlakə tə ngatə təhuɗə kənda ga nar nyi nə chama nda, <<A nji ti! Hənda cha ka.>> Chama Hyel nda tə ta'ita nyi ləhə dza lar nə Arauna ndər Jebusi. 17 Nda Dauda tə la'a chama ndo kuɗə nji nda, ngə cha nar nyi nə Tlakəu, <<Naya nga mər səpəla'a ga mər sə nda pa'a tsa'atsa'a. Mi nji inə tə məra? Tlanda ɗa nəuma ana njir ki ɗa.>>Dauda tə Hərtə Dzəgana
18 Pəshinda tanyi, ngə Gad tə təra yada Dauda ga yi nar nyi, <<Ma'i ka ki hərtə nyi dzəgana nə Tlakə hya tə lar nə Arauna ndər Jebusi.>> 19 Aka ənga Dauda tə təra wi sə nda Tlakə na təwa Gad. 20 Nda Arauna tə la'a təl kə'i nji nyi kwa shili kəra cha, ngə cha yi uzhi huɗə təl ana huɗəma cha səya hu'i. 21 Ngə Arauna tə na, <<Mi na shili na tlakə ɗa təl, shili da mava nya?>> Ngə Dauda tə wuma, <<Ka ga ya ɗəlbiya lar ngha, ka ga ya hərtə nyi dzəgana nə Tlakəu, tsa'aka təmachi nda təkəra nji a ta'i.>> 22 Ngə Arauna tə nar nyi nə Dauda, <<Alvari, hətə ka ka lətə nyi nə Tlakəu. Janə tla ka handa təmachi ni, janə tuwa ana gang dlakə tə wulya tla, ka shilə'u. 23 Alvari, dəhə sə ina, Arauna nə nghə ti, ga Tlakə dləutsə hatəmachi ngha.>> 24 Kəl ja, təl tə ɓəlakə nyi nə Arauna bəra, <<A'a, yo ɗəlbiya yo kinda ngha. A da yo hatəmachi na sə nda pa'a ya sa ɓwaɓwatə ɓwaɓwatənyi wa.>> Aka ənga Dauda tə ɗəlbiya lar nda, ana tla nda ga kinda shekel azurfa tufəkumnyi. 25 Ngə Dauda tə hərtə dzəgana nə Tlakə tangnda, ga handa təmachi nə nginda ana nə daɓəkər. Ngə Tlakə tə wum pətlənya tə dəbar mələm nda, ngə təmachi nda tə ta'i.