17
1 Ahitofel tə nar nyi nə Absalom, <<Yo ɗəmtsə nji 12,000 eo gədlə Dauda əvu'i na. 2 Yo pah nyi a ku bəji nda həɗa tə cha ya ɗufwa cha tsəya tə dza, yo ləvərandə nyi, ya dəhə nji inda kə'i cha kwa təra na hwi. Kəl təl zhang tanyi yo tsəya 3 ba'a ɓəl na dəhə nji shili da ka. Pya ndə zhang tanyi ngə ko gwa'a, sə do tsəkar həyadzər alenya nji wa.>> 4 Ngəna ɓwanya ɗa tə mənakə nə Absalom ana a nə dəhə njrawawa'a Isra'ila. 5 Kəl ja, Absalom tə na, <<Nga nji Hushai ndər Arki, ga məna ngatə ndara mi cho na.>> 6 Nda Hushai tə shili da cha, ngə Absalom tə na, <<Ahitofel par tə nənyi na dəma. Məna mər sə nə cha na nə zəma aa a da wa? Macha a do ɗa wa, dəkar ea nə nghə na jigadəma.>> 7 Ngə Hushai tə wum nə Absalom, <<Dəma ngə Ahitofel tə pə nga a da mənakə ku bəji nə wa. 8 A zəndə tə ka, ənda ada nghə Dauda ana nji nyi, njir pah inga, ya huɗa nda tlatla nyi wi mapəla'u nda nja fa'atə nguli nyi kwa takəu. Matsa ngə ma'a ada nghə ndər nau pah cha, a da cho hanyi ka ləvaləva tə mbwarzhang wa. 9 Wi nə mo ndər nə ma'a, kustanyi a mbutanyi tə cha ku tləl ma'a əngəwa a tə vanya mbwa. Ma cha ghəya pah nji nghə tangərma, kala ndə nda ngatə kwa na, <A kuɗənda tə nji nji ɗang ku huɗa ləvaləva Absalom.> 10 Mada ləvaləva kwalkwal nda na ɗufwa cha wi nə ləvari, kəlnda ləvər tə səya nyi, aka dəhə njir Isra'ila zəndə tə ənda ada ngha ndər nau pah cha ya nji inda kə'i cha tsə'u nji kwalkwal nda. 11 Aka ənga, dəma nda yo par ngha, nacha nga: Tsəmtə nghə nji dəhə njir Isra'ila fwatə vu Dan tsa'a vu Biyersheba, ɗangkura nda wi mishishi'ua nya fa'a. Nakə na kərngha ka nəu na nda ki pah nga. 12 Məno ki gwa'a Dauda tə dəhə mbwa nda cha ti, məno mbuya nyi na pah wi ngə tə kuchikəpa kwa haɗiya hə'i. Mada nacha ndara nji inda kə'i cha da kwa mbəɗə na pi mada zhang wa. 13 Ma cha təra na hwi gu ta mələm, kəl dəhə njir Isra'ila kwa dləɗətə ɓangtili mələm nda na sə'i, ba'a təɗətə nyi gwa tə dakə nda a mada hangu zhang da kwa həyadzə təkəra vanyi wa.>> 14 Ngə Absalom ana dəhə njir Isra'ila tə na, <<Mənakə ɓwanya Hushai ndər Arki ngə tsa nə Ahitofel.>> Aka ənga, sə nda Tlakə tə i nga, cha mərtə ɓwanya Ahitofel ka sə ɓwa'atanyi, ga cha shili na təmachi təkəra Absalom. 15 Ngə Hushai tə par nyi nənyi na dəma nə pərist i'i, ka Zadok ana Abiyatar, ana dəma nda Ahitofel tə dəkə nə Absalom ana njirawawa'a Isra'ila. 16 Ngə Hushai tə ɓəla na, <<Sə mafakə yada Dauda sakana, nja nar nyi əngwa cha da hanyi tə mbwa nda nji kwa ndəɗəbiya dəl biya nya dadil takə ngə wa, ma əngə wa, təl ana dəhə nji inda kə'i cha kwa kuɗa. 17 Jonatan ana Ahimaz kwa səkə vu Enrogel. Vanya kwatəra kənda da kwa maka yi na nda mafakə sə nda kwa ɗa, nanda tsə'u ba'a nda yi par nyi nə təl Dauda, tsa nja da la'a nda ənda ndo gu ta mələm. 18 Kəl ja, vanya tlakala tə la'a nda ga nar nyi nə Absalom. Aka ənga kya'anda nda hwita nda kuskus yo ki vanya ndə vu Bahurim. Ka'ur ɓiti da ku ta ki nyi, ngə nda gwata nda kwa. 19 Ngə mala ndə nda hətə sər haɗə nya ka'ur ɓiti nda ga haɗiya nya cha ni, ga hyanda uhi tə tsa nji da ngabiya ənda vanya sə da tangnda. 20 Nda njir patla Absalom tə shili da mala nda ku ki nda, nda jau nyi, <<Amanə ka Ahimaz ana Jonatana?>> Ngə mala nda wum ga na, <<Ənya nda dləgəlbiya dəl wa.>> Nji inda gwa'a ka Ahimaz ana Jonatan, kəl ja, a da nda uya nda wa, ngə nda ɓəlta nda gwa Urshalima. 21 Ahir nji inda təra, ngə nda biya ku ka'ur ɓiti nda ga ki nar nyi sə nda Ahitofel tə haɓətə nya ndəla təl Dauda. Ngə nda nar nyi, <<Kusa, ka dləgəlbiya dəl ngə kuskusəu.>> 22 Ngə Dauda ana dəhə nji inda kə'i cha tə dləgəlbiya Urdən. Təvi vu'i wura, a ndə da həyadzə nda kəla dləgəlbiya Urdən wa. 23 Nda Ahitofel tə la'a a da nja nəu ɓwanya nyi wa, ngə cha sətə lifarəu tə ya kwara nyi ga ɓəl kyo mələm nyi. Ahir cha pənda ənda njo ɗa na kar nyi ana njir ki nyi, ngə cha hakəya kərnyi, ngə cha tah nja haɗiya nyi ku hu ada nyi.24 Ngə Dauda tə təra yi Mahanayim, Absalom ka dəhə njir Isra'ila tsə'u tə dləgləlbiya Urdən. 25 Ngə Absalom tə fiya Amasa ka gau ləvaləva a təvira Joab. Amasa zər vanya ndə ngə na tləm nyi Jeta, ndər Isra'ila nda hə Abigel, kwar Nahash, kwamənya Zeruya amanya Joab. 26 Njir Isra'ila ana Absalom tə tsəmtədzə tə hə'i Gileyad. 27 Nda Dauda tə shili Mahanayim, Shobi zər Nahash hya'atə vu Raba hə'i njir Amon, ana Makir zər Amiyel hya'atə vu Lodebar, ana Barzilai ndər Gileyad hya'atə vu Rogelim 28 tə shili na gangər i'i, ka shala, ka təm ka alkama, ka bale ka upwa, ka uhi tsatsa, ka tsər pampaməu, 29 mwamwa chiɗi ana 'ua, kətəng, 'ua tla nə Dauda kə'i nji nyi ka nda səma. Aka nda na, <<Nji kwa ngatə huɓə ana həɗa ana hili tə dadil takəu.>>