Dauda ana Ziba
16
1 Nda Dauda tə təranda gachikəɗa dəgəl nda kushiu, kəl jan Ziba, kadakaliya Mefiboshet tə ɓə na cha. Cha shili na kwara mətlə ɓatləɓatlənyi mənakə ka ma'i, ana gwazhilakə takwara 200, kaɓəkaɓər yayar anap ululə 100, taɗər yayar wu 100 ana slakam chaɓə na ɓitir anapəu a tə ya kwara inda. 2 Ngə təl tə jau Ziba, <<Mya gwa'atə ka shili na sə ina?>> Ngə Ziba tə wuma, <<Kwara inga aka njir ki təl dlə ngani, gwazhilakə inga ana yayar wu inga ka ga nji nghə səm ngani, ɓitir anap ngə tsəu, ka ga nda sa ma nda həɗa ku dadil takəu.>> 3 Ngə təl tə jau tsəu, <<Amanə ajinya tlakə ngha? Ngə Ziba tə nar nyi, <<A kwa Urshalima cha aka cho har bəra, <Ənya njir Isra'ila kwa ɓəlandə ɗa təlkur aji ɗa.> >> 4 Kəl ngə təl tə nar nyi nə Ziba, <<Dəhə sə nda nə Mesfiboshet sakana nə nghə nga.>> Ngə Ziba tə na, <<Yo uzhi huɗə nghə na həyakər, ga ya uya kwambiyakur tə lya tlakə ɗa, təl ɗa.>>Shimai tə Ngəl Dauda
5 Nda təl Dauda kwa ɗa ləhə dza mələm Bahurim, kəl janə vanya ndə na tləm nyi Shimai, zər Gera, hya'atə ku huɗa njir ki Saul, kwa biya cho ngəl Dauda. 6 Cho vakə Dauda ana dəhə njirawawa'a nyi na hangu, madangə dəhə ləvaləva ana njir tsakəra təl tə ɓandə nyi mada təwabari. 7 Shimai kwa ngəl Dauda cho na, <<Təra, təra, ndər tsa ndəu, ndə pəla'apəla'a! 8 Tlakə kibiya tə səkur nji inda ka kuɗənda ku huɗa njir ki Saul, ka dləuya təlkur tsa cha. Sakana, janə Tlakə nə nyi tə təlkur nə zər nghə Absalom. Sakana ba nə nghə wurti, ndər tsa ndəu. 9 Kəl Abishai zər Zeruya tə nar nyi nə təl, <<Mya gwa'atə həya tətə nə kwa ngəl tlakə ɗa təla? Əngwa ya yi tlanda kəra cha.>> 10 Kəl ja, təl tə na, <<Nguli Zeruya, nəkəhi da kwa wa. Macha Tlakə nga nar nyi cha ngəl ɗa ya, wa nji ka nar nyi <Mya gwa'atə ko mər ənga?> >> 11 Kəl Dauda tə nar nyi nə Abishai ana dəhə njirawawa'a nyi, <<Janə ma'a zər ta ya kwa gwa'a həyatə ya, abiyakata ndər nyavi Banyami na? Ngya nyi ma cha ngəla, aka Tlakə ngə tə nar nyi cha mər ənga. 12 Kustanyi Tlakə kwa la'a ɓwaɓwatə ɗa cho kinda ɗa na mənakəkur aka ngəl nə Shimai tə ngəl ɗa ənya na.>> 13 Kəl Dauda kə'i nji nyi tə biyama na ma'i kənda ku laku, ba'a Shimai kwa ma'i təwa dəgəl gang na Dauda cho ngəl nyi cho vakə nyi na hangu cho ɗəzə bərbər ya kəra cha. 14 Ngə təl ana dəhə nji inda kə'i cha tə dzəva tə mbwa nda ndo yi tə nda, a həɗa tə nda gagaɗa. Ngə nda ɓəliyasar tangnda.
Absalom a vu Urshalima
15 Ahir ənga, Absalom ana dəhə njir Isra'ila tə dzəva Urshalima, Ahitofel tsə'u tsa'a kə'i nda. 16 Kəl Hushai ndər Arki, bazhinya Dauda, tə yi nar nyi nə Absalom, <<Alvari, Hyella təɗar pya ka! Hyella təɗar pya ka, alvari!>> 17 Ngə Absalom tə jau Hushai, <<Chul nyida nda ko char nyi nə bazhi nghə Dauda nə ja? Mya gwa'atə a da ka nəu bazhi nghə wa?>> 18 Ngə Hushai tə nar nyi nə Absalom, <<A'a, naya yo ɗa ka nə ndə nda Tlakəu ana nji ana dəhə njir Isra'ila tə tabiya. Yo ngya tsa'a na ka. 19 Matsa ənga ma'a ya, a nə wa yo kina mər tlər macha a da a nə zər tlakə ɗa wa? Wi nda ya mər tlər nə ada ngha, əngə yo mər tlər nə nghə sakana.>> 20 Ngə Absalom tə nar nyi nə Ahitofel, <<Dəkar ea dəma, mi eo kina məra?>> 21 Ngə Ahitofel tə wuma, <<Ma'i ka gwa piya na kwatəra ingə ada nghə tə ngya nda ka nda tsamartə patla nga. Təwa ənga kala ndə vu Isra'ila kwa zəndə ənda dawa ku pama hi na ada ngha. Dəhə njir chihi nə nghə tsə'u, kwa ɗa na tsəɗufəu.>> 22 Kəl ngə cha liya nyi madləɓa nə Absalom kyo kərapakə nə patla nda, angə cha piya na kwatəra ada nyi inda tə lya dəhə njir Isra'ila. 23 Kala dəma nda Ahitofel tə dəkə ku bəji nda, kəl njo dləukər wi ɓwanya Hyel. Dauda ana Absalom kya'nda kwa nəu sə nda Ahitofel tə na.