Absalom tə Tliya nyi Mwali nə Dauda
15
1 Ahir ənga, Absalom tə uya nyi charkaina taku ana taku i'i nə kərnyi, ana nji tufəkumnyi inda kwa ma'i biyama nyi. 2 Cho maka hya'atə kaɗə mbudla cho ta'i tanyi nya lakur gu ta mələm. Ma kala ndə kwa shili na nəuma huɗə təl, Absalom kwa nga nyi ba'a jau nyi, <<Hya'atə ku mələm man ka?>> Kəl cho wuma, <<Hya'atə ku zhang ku huɗa mələm nə nyavi njir Isra'ila nə mava ngha.>> 3 Kəl Absalom kwa nar nyi, <<Wula nghə nə manakəu ya tsa'atsa'a, kəl ja, a ndə da tə dəbar təl pəlakər səhimi da kə wa.>> 4 Kəl Absalom kwa tsakətə na, <<Macha ndər nəuma ya ku hə'i na, kala ndə nda na huhuni ndara wula kwa shili da ya, ya yo mbadzə kəl ya tlanda nyi nəuma jiri.>> 5 Ətsə'u, kala bəji nda kala ndə tə yi ka cho uzhi huɗə nyi, Absalom kwa ha cha cha, cho gəziya nyi ba'a gaɓətə nyi. 6 Əngə Absalom tə mər nə dəhə njir Isra'ila inda tə shili da təl ka nəuma, ana ənga Absalom tə gwa'atə njir Isra'ila kwa ngatə mənakə na cha gagaɗa. 7 Ahir fa fwaɗəu, Absalom tə nar nyi nə təl, <<Alvari, əngwa ya yi Hebron ya yi nyabiya alkawal nda ya mər nə Tlakəu. 8 Ku bəji nda ya ngya vu Geshur ku Suriya, ya mər alkawal ənda, <Ma Tlakə tə mərtə ya ɓəl gwa Urshalima, yo hətə nyi səli vu Hebron.> >> 9 Ngə təl tə nar nyi, <<Ma'i ku piyarɗufəu.>> Ngə cha təra yi Hebron. 10 Kəl ngə Absalom tə sə changhabal tə ɗəwa ya da dəhə nyavi njir Isra'ila nda na bəra, <<Ma hya ngatə nja mbəɗiya papam, kəl ba hya na, <Absalom ngə təl vu Hebron.> >> 11 Nji 200 inda Absalom gədiya ka nda lə nyi hya'atə vu Urshalima, nda təra tsa'a kə'i cha na ɗufwa nda zhang, a da nda na zəndə sə nda cha ɓatliya wa. 12 Ku bəji nda Absalom kwa hatəmachi, cha sə yi Gilo nja ngar nyi Ahitofel ndər Gilo ndər dəkə dəma nə Dauda. Ɗimikur nda cha ɓatliya tə ɗa na dunama, ya njir nəu Absalom tsə'u kəl tsakə ndo tsakə na ɗangkur.Dauda tə Hwibiya vu Urshalima
13 Kəl ngə vanya changhabal tə nar nyi nə Dauda, <<Ɗufwa njir Isra'ila ɓəl tə yakəra Absalom.>> 14 Ngə Dauda tə nar nyi nə dəhə njirawawa'a nyi inda kə'i cha vu Urshalima, <<Mən hwi, ma əngə wa mada zhang ku huɗa mən do mbəɗə tsa Absalom wa. Mən kusa məna hwibiya tsa cha da shili həya mən tangnə cha kura mən cha kuɗənda dəhə nji ku mələm.>> 15 Ngə njirawawa'a təl tə wum nə nyi, <<Alvari, mavi'i nghə ɓatliya tə ka mər kala sə nda təl tə la'a tə ɗa tsa'atsa'a.>> 16 Ngə təl tə biya dəhə ka njir ki nyi, kəl ja, cha ngyar kwatəra i'i kuma ka nda ɓəla patla. 17 Əngə təl tə biya cho ma'i ana dəhə nji nda kwa nəu nyi, ngə nda ta'i biya tiya mələm tangnda batəbatər ki ti. 18 Dəhə njrawawa'a nyi tə ndəɗiya nyi, tsa'a na njir Keret ana Pelet, njir Giti 600 inda tə ləbiya nyi hya'atə vu Gat nda tsə'u tə tərabiya biyama nyi. 19 Ngə təl tə nar nyi nə Itai ndər Giti, <<Mya gwa'atə ko ma'i tsa'a kə'i ea? Ɓəl yada təl Absalom. Ndə shilishili ka, ndə nda nja gədləbiya tsa mələm nyi. 20 Ənə tanyi nə shili ka. Aka əngə mya gwa'atə yo ngya nghə ko hwi kə'i ea, ba'a a da ya zəndə ba nda yo ma'i tə wa? Nga njir hə'i nghə hya ɓələu. Ga mənakəkur ana tsa'atsa'aku cha ngya tsa'a na hi.>> 21 Kəl ja, Itai tə ɓəlakə nyi nə təl, <<Səmnda tə ya fəla na tləmər Tlakə nda na pi, yo ma'i tsa'a na ka mada abar ma'i ka, mada cha ɗa ka tah ndara pi.>> 22 Ngə Dauda tə nar nyi nə Itai, <<Yau, təra biyama ja.>> Əngə Itai ndər Giti tə ma'i dəhə nda kə'i nji nyi ana njir ki kənda inda kə'i nda. 23 Nda dəhə nji kwa təra kəl dəhə njir hə'i nda tə tiwi na kurakə dzəgamdzəgaməu. Təl tsə'u tə dləgəlbiya dakə Kidron, ngə dəhə nji tə təra gwa təwa dadil takəu. 24 Zadok Pərist tsə'u tangnda, dəhə njir Levi inda tsa'a na cha tsə'u kwa hə Gwarara Mbandər Tlakəu. Ngə nda fiya Gwarara nda hu'i ngə Abiyatar pərist tə ha təmachi kəl nda dəhə nji tə ngyar mələm nda. 25 Kəl ngə təl tə nar nyi nə Zadok, <<Ɓəl na gwarara Hyel ngə gu mələm. Ma ya uya kwambiyakur tə lya Tlakəu, cho ɓəl na ya shili, yo shili la'a mbwa nda gwarara nda na ngya ti səkəu. 26 Kəl nda macha na, <<A da ya ngatə mənakə na kə wa,>> yau, kəl ba'a cha mər sə nda mənakə nə nyi.>> 27 Ngə təl tsə'u tə nar nyi nə Zadok pərist, <<La'a, hətə zər nghə Ahimaz ana Jonatan zər Abiyatar hya ɓəl go mələm ku piyarɗufəu. 28 Yo səkə nya dadil takəu, kəl bəji nda ya uya labar tə tsa ka.>> 29 Aka ənga Zadok ana Abiyatar tə ɓəl na gwarara Hyel gwa Urshalima ga gwa ngya ta nda ku nda. 30 Kəl ja, Dauda tə biyama na ma'i gya tə Dəgəl Zaitun, cho tiwi ku lakur ma'i nda, cha mbuya kəra cha, ya ɓiɓi do hya cha wa. Dəhə nji inda kə'i cha tə mbuya kəra nda tsə'u ndo tiwi ma'a nanda. 31 Ngə nja nar nyi nə Dauda bəra, <<Ahitofel ku huɗa njir tlə mwali nə Absalom cha.>> Ngə Dauda tə pətlənya, <<Yawa Tlakəu, shandə ɓwanya Ahitofel ka sə ɓwa'atanyi.>> 32 Nda Dauda tə gyo dəgəl nda, tangnda njo həsəli nə Hyel ti, Hushai ndər Arki tə shili kinda ka cha lali nyi, ana ləkutə tata dzə nyi, ana bərbər ku kəra cha. 33 Ngə Dauda tə nar nyi, <<Ma ka ma'i tsa'a na ya, ko ɗa ka ɓwaɓwatə na'a. 34 Kəl ja, ma ka ɓəl gu mələm ga gwa nar nyi nə Absalom, <Yo ɗa ka mava nghə alvari, ɗəɗəm ma'a mava jival nghə ya, kəl ja, sakana yo ɗa ka mava ngha,> ma ka mər ənga ko vala ɗa təwa wazənda ɓwanya Ahitofel. 35 A ka Zadok ana Abiyatar pərist ingə hi nda ma? Dəkar nda dəhə sə inda ka ngatə tə patla təl. 36 Nguli shili kənda mətlə inga, Ahimaz zər Zadok ana Jonatan zər Abiyatar hi nda kə'i nda. Sə nda na kala sə nda ka ngati.>> 37 Aka ənga bazhinya Dauda Hushai tə dzəva vu Urshalima tsa'a na bəji nda Absalom kwa gu mələm.