Fa Anap Nabot
21
1 Ahir ənga, vanya sə da tə ɗa təkəra fa anap nə Nabot ndər Jezrel, nda ləhə dza patla Ahab təl Samariya. 2 Ngə Ahab tə nar nyi nə Nabot, <<Ngya ɗa na fa anap nghə nga, ka ya ɓatlətə ka ngakə səkwar, mangə cha ləhə dzər patla ɗa. Yo nə nghə fa nda ndiya mənakəu, ma əngə wa ba ya kinda nghə wi sə nda njo ki na ɗəla.>>3 Kəl ja, Nabot tə ɓəlakə nyi nə Ahab bəra, <<Ga Tlakə kanda ya nə nghə sərfa'aki jival ɗa.>>
4 Ngə Ahab tə ɓəl tanyi kyo ki na huɗatla ɗimiɗimi, aka Nabot ndər Jezrel tə na, <<A da yo nə nghə sərfa'aki jival ɗa wa.>> Cha piya tanyi tə gangər nyi cho sə'ufəu ga ngyar səm sərsuma.
5 Ngə mala nyi Jezebel tə gwa ga jau nyi, <<Mya gwa'atə ko sə'ufwa? Mya gwa'atə a da ko səm sərsum wa?>> 6 Ngə cha wuma, <<Aka ya nar nyi nə Nabot ndər Jezrel, <Ɗəlnda ɗa fa ngha, ma əngə wa, ya bəlabiya na vanyi fa, macha bəliya əngə ko i.> Kəl ja, cha na, <A da yo nə nghə fa ɗa wa.> >>
7 Ngə mala nyi Jezebel tə na, <<A nakə ngə təl njir Isra'ila ma? Hya'atə ka səm sərsuma, ngwa huɗakə da tla wa. Yo nə nghə fa Nabot ndər Jezrel.>>
8 Ngə cha tsəfətə kainau i'i ku tləmər Ahab, ga dəgətə hatimi nyi ti, ga lətə nyi nə njirawawa'a ana nji inda njo la'a səli kənda inda na ngya ku mələm zhang ka Nabot. 9 Aku kainau inda cha tsəfətə bəra,
<<Bəzəya ma səmdzən, hya nga Nabot hya fiya nyi biyamar nji tə mbwa tsəkəɗəu. 10 Kəl ja, hya fiya nji kawakawa mətlə ləhə dzə nyi, ka nda mbandzə nyi bikəu, ənda cha ngəl Hyel ana təl. Kəl ba'a hya həbiya nyi biya, hya biya vəvakənda nyi na hangu kəl na cha tah.>>
11 Aka ənga, njirawawa'a ka nji inda njo la'a səli kənda, inda na ngya ku mələm zhang na Nabot, tə mər wi nda Jezebel tə na, ku kainau inda cha tsəfətə nda inda. 12 Nda bəzəya səmdzən ga fiya Nabot biyamar nji tə mbwa tsəkəɗəu, ku pama nji. 13 Ngə nji kawakawa mətlə inda tə shili ngyata nda biyama nyi ndo ndzamdza, ngə nda ghəya mba bikə nə Nabot ndo na, <<Nabot tə ngəl Hyel ana tələu.>> Aka ənga, nda həbiya nyi biyahir mələm ga biya vəvakənda nyi na hangu kəl nda cha tah. 14 Ngə nda sətə nyi mafakə nə Jezebel bəra, <<A vəvakənda tə nji Nabot na hangu, ya a tə tə cha.>>
15 Tərkus Jezebel tə ngatə ənda vəvakənda tə nji Nabot na hagu kəl nda cha tah, ngə cha nar nyi nə Ahab, <<Hya'atə ka ki ɗa ka tlakər fa Nabot ndər Jezrel nda cha ngyar ɗəlnda nghə nda. A tsə'u cha na pi wa, tətə cha.>> 16 Nda Ahab tə ngatə ənda Nabot təti, ngə cha hya'atə ga təra ka cha ki hətə fa Nabot ndər Jezrel nda ka nənyi.
17 Ngə ɓwanya Tlakə tə shili nə Iliya ndər Tishbi bəra, 18 <<Ma'i ka səya ɓə na Ahab təl njir Isra'ila, nda kwa səm təlkur vu Samariya. Sakana a tə fa Nabot cha, cho gwa'a cha həti, a ɗa ka nənyi. 19 Ka nar nyi, <Janə sə nda Tlakə tə na. A ka tsəya ndə ga dləuya sərfa'aki nyi ma?> Ka nar nyi tsə'u, <Janə sə nda Tlakə tə na. Tə mbwa nda həya i'i tə naɗə mashi Nabot nda, həya i'i tsə'u kwa naɗə mashi ngha, ah mashi ngha!> >>
20 Ngə Ahab tə nar nyi nə Iliya, <<Ndər dawa ɗa! A uya ɗa tə kə ja wa?>>
Ngə Iliya tə nar nyi, <<Ah, uya nghə tə ya, aka ka ɗəlnda nyi kərnghə nə ɗimikur mar Tlakəu. 21 <Yo shili na təmachi təkəra ka. Yo kuɗənda nyandəla ka, ba'a kuɗənda kala zərsal nda nə Ahab, ndara mava ndara dimu inda vu Isra'ila. 22 Yo mərtə ki ngha wi nə Jeroboam zər Nebat, ana wi nə Ba'asha zər Ahija nda, aka a tliya tə kə huɗaya ga gwa'atə njir Isra'ila tə mər səpəla'a.>
23 <<A təkəra Jezebel tsə'u Tlakə tə na, <Həya i'i kwa ɗinya Jezebel vu Jezrel.>
24 <<Həya i'i kwa ɗinya nji inda nə Ahab inda tə kuɗə ku ta mələm, eakə tsə'u kwa tsaku nji inda tə kuɗə ku hə'i nda.>>
25 A vanya ndə da tə ɗəlnda nyi kərnyi nə ɗimikur tə lya Tlakə wi Ahab wa, ya mala nyi Jezebel nga tsukutə nyi. 26 Cha mər səpəla'a inda sər həɗa təwa nəu katəu, wi njir Amori inda Tlakə tə gədlənda mar njir Isra'ila inda.
27 Nda Ahab tə ngatə ɓwanya inga, cha tətanda ləkutə nyi, ga pəndzə guzhalguzhal ga səmdzən. Cha piya ku ləkutə sə'ingu, dza cha tsəyadza, cho ma'i saməu.