Tər Ahaziya
1
1 Ahir tər Ahab, njir Mowab tə tlə mwali nə njir Isra'ila. 2 Vanya pəchi Ahaziya təl Isra'ila tə təɗə təwa kagapə nə vi nyi nda kya tə kəra vanyi, ga takasə 'ual'ualəu. Aka ənga cha sə changhabal bəra, <<Ma'i ma hya ki jawar Ba'alzabul, katə nə Ekron, ndara kwa mbə ya na takasə na.>> 3 Kəl ja, chama Tlakə tə nar nyi nə Iliya ndər Tishbi bəra, <<Ma'i ka ki ɓə na changhabal təl Samariya ka jawar nda bəra, <Aka a Hyel da vu Isra'ila wa na gwa'atə hyo ma'i ki jau Ba'alzabul, katə nə Ekron ya?> 4 Janə sə nda Tlakə tə na ja, <A da ko ngyar gangər ngə ka piya tə ngə wa. Ko tah!> >> Ngə Iliya təra. 5 Nda changhabal inda ɓəl yada təl, cha jau nda, <<Mya gwa'atə hya ɓəla?>> 6 Ngə nda ɓəlakənyi, <<Ea ɓə na vanya ndəu, ngə cha nar ea, <Ɓəl ma yada təl nda sə hi hya yi nar nyi, <<Janə sə nda Tlakə tə na: Aka a Hyel da vu Isra'ila wa na gwa'atə hyo ma'i ki jau Ba'alzabul, katə nə Ekron ya? Aka ənga, a da ko ngyar gangər ngə ka piya tə ngə wa. Ko tah!>> > >> 7 Ngə Təl tə jau nda, <<Chul ndə manə ngə hya ɓə kə'iri tə nar sə nga?>> 8 Ngə nda wum nə nyi bəra, <<Vanya ndə na ləkutə nda nja mər na shishi sərshishi ana gyarakəl ku sara cha.>> Ngə təl tə na, <<Iliya nga, ndər Tishbi.>> 9 Ngə cha sətə nyi gau ləvaləva ana ləvaləva tufəkumnyi nə Iliya. Ngə gau ləvaləva nda təra gya da Iliya nda na ngya kyatə dəgəl, ga gi nar nyi, <<Ndəkə Hyel, tə tə na ka səya.>> 10 Ngə Iliya tə wum nə gau ləvaləva nda bəra, <<Macha ndəkə Hyel ya, əngwa hu'u səya kya huɗamələm cha ngunda hi dəhə hi ka nji tufəkumnyi nghə inga!>> Kəl hu'u tə səya kya huɗamələm ga nginda gau ləvaləva nda ana nji nyi. 11 Ngə təl tə ɓəla sə vanya gau ləvaləva ana nji tufəkumnyi. Ngə gau ləvaləva nda nar nyi, <<Ndəkə Hyel, janə sə nda təl tə na, <Səya sakana!> >> 12 Ngə Iliya wuma, <<Macha ndəkə Hyel ya, əngwa hu'u səya kya huɗamələm cha səya nginda ngha, ana nji tufəkumnyi nghə inga!>> Kəl hu'u tə səya kya huɗamələm ga səya nginda nyi ana nji tufəkumnyi inda. 13 Ngə təl tə sə makərkunya gau ləvaləva ana nji nyi tufəkumnyi. Makərkunya gau ləvaləva na gi uzhi na undya cha hu'i huɗə Iliya. Cha gədi bəra, <<Maki ndəkə Hyel, yo gədi nghə ka la'a səlir pya ya ana pya nji tufəkumnyi ina, ngyar mavi'i nghə na pi! 14 La'a, hu'u tə səya kya huɗamələm ga nginda gau ləvaləva mətlə inda tangərma inda, ana dəhə nji kənda. Kəl ja, ka la'u səlir pya ya sakana!>> 15 Ngə chama Tlakə tə nar nyi nə Iliya, <<Ma'i səya tsa'a na cha, ngwa ka da ləvər wa.>> Aka ənga Iliya tə hya'atə ga təra tsa'a na cha səya da təl. 16 Ngə cha səya nar nyi nə təl bəra, <<Janə sə nda Tlakə tə na, <<Aka a Hyel da vu Isra'ila ka ko jawar nyi wa nga gwa'atə ka sə nja jawar Ba'alzabul katə njir Ekron ya? Aka sə ngə ka mər nga a da ko hya'atə tə gangər ngə kə tə piya tə ngə wa. Vəlvəl ko tah!>> 17 Aka ənga cha tah, wi nda ɓwanya Tlakə nda tə shili təwa Iliya tə na. Aka a zərszl da tsa Ahaziya wa, Joram tə dləutsə cha cha ga ɗa ka təl aku mətləkunya far Jehoram zər Jehoshafat təl Yahuda. 18 Həyadzər alenya sə inda tə ɗa ku bəjir təlkur Ahaziya ana dləhə sə inda cha məra, nja tsəfəbiya ku likatəkatə labar ka təl ka təl nə Isra'ila.