Mikaya tə Takər təkəra Ahab
22
1 Nja mər kwa ɗa fa makərəu, a pah da zhaka ɗa ku pama njir Aram ana njir Isra'ila wa. 2 Kəl ja, ku Makərkunya fa, Jehoshafat təl Yahuda tə təra ka cha səya usar təl Isra'ila. 3 Təl Isra'ila tə nar nyi nə Njirawawa'a nyi bəra, <<A da hya zəndə Ramot Giliyad nəkəmən ngə ma? Dəhə ka ənga sə da məna mər ka ga məna dləuya tsa təl Aram wa.>>4 Aka ənga, cha jau Jehoshafat bəra, <<Ko ma'i tsa'a na ya ki dla'a Ramot Giliyad ya?>>
Ngə Jehoshafat tə ɓəlakə nyi nə təl Isra'ila bəra, <<Naya ana naka, nji zhang ma, nji ɗa tsəu, nji nghə inga, ya taku ɗa i'i taku nghə inga.>> 5 Kəl ja, Jehoshafat tə nar nyi nə təl Isra'ila, <<Tangərma ka ghəya gwa'a jigadəmar Tlakəu.>>
6 Ngə təl Isra'ila tə tsəmtə njir mətakər, nji kwa ɗa 400 ga jau nda, <<Ya ma'i ki dla'a njir Ramot Giliyad zəma, aa ya ngyari?>>
Ngə nda wuma, <<Ma'i, aka Tlakə kwa gwa'atə təl kwa kura.>>
7 Kəl ja, Jehoshafat tə jawa, <<A vanya ndər mətakər Tlakə da tangnə nda məno jawar ma?>>
8 Ngə təl Isra'ila tə na, <<Tsəutanyi ndə zhang nda məno nau gwa'a jigadəmar Tlakə təwa nyi, kəl ja, a da yo i nyi wa, aka a da cha taa takər sə manakə təkəraya ya wa, kəl nda sə ɗimi. Tləm nyi Mikaya zər Imla.>>
Ngə Jehoshafat tə ɓəlakə nyi, <<Ngwa təl da ɓwanya əngə wa.>>
9 Aka ənga, ngə təl Isra'ila tə nga zhang ku huɗa njirawawa'a nyi ga nar nyi, <<Ma'i ki shili na Mikaya zər Imla sakana.>>
10 Ngə təl Isra'ila ana Jehoshafat təl Yahuda tə pəndzə dzaki təlkur kənda, ga ngyata nda ku dzəga təlkur tə lar a nya lakur gu mələm Samariya, ana dəhə njir mətakər inda kwa takər huɗən nda. 11 Kəl zhang ku huɗa nda na tləm nyi Zedekiya zər Kena'ana tə ɓatlətə tələm lyang ga na, <<Janə sə nda Tlakə tə na, <Ana tələm ina ko dzədzavənda njir Aram kəl nda kuɗa.> >>
12 Dəhə alenya njir mətakər inda kwa takər wi nda tanyi. Ndo na, <<Ma'i ki dla'a njir Ramot Giliyad ka kura nda, aka Tlakə kwa nə nghə nda ku cha ka.>>
13 Ngə changhabal nda tə ma'i ka ki nga Mikaya nda tə nar nyi nə Mikaya, <<La'a, dəhə alenya njir mətakər kwa takər ana kurakə zhang ənda təl kwa kura. Nakə ma'a bəliya takər nghə ɗa sə zhang na nəkənda.>>
14 Kəl ja, Mikaya tə na, <<Səmnda tə fəla na tləmər Tlakəu, sə nda Tlakə tə nar ɗa yo dəkar nyi.>>
15 Nda cha dzəva, ngə təl tə jau nyi, <<Mikaya, ea ki dla'a njir Ramot Giliyad zəma, aa ea ngyari?>>
Ngə cha wuma, <<Ma'i ki dla'a ka kura, aka Tlakə kwa nə nghə nda ku cha ka.>> 16 Ngə təl tə nar nyi, <<Zhaka yiɗawa yo gədi nghə ka səmnda fəla na tləmər Tlaka?>>
17 Ngə Mikaya tə wuma, <<Ya la'a njir Isra'ila tangər wi kətəng kəla ndər ɓəla, ya Tlakə tə na, <A ndər nəu na nji inə da wa. Ngyar kala ndə cha ɓəl kyo ki na piyarɗufəu.> >>
18 Ngə təl Isra'ila tə nar nyi nə Jehoshafat, <<A ya nar nghə a cha taa takər vanya sə mənakə təkəra ya wa kəl sə ɗimi ma?>>
19 Ngə Mikaya biyama na ɓwanya bəra, <<Aka ənga ngatə, ɓwanya Tlakəu, ya la'a Tlakə tə ngya ku dzəga təlkur nyi, ana dəhə njir huɗamələm tə ta'i dzə nyi təwa chisəma cha ana matsala cha. 20 Ngə Tlakə tə na, <Wa kwa shandə nyi kər nə Ahab cha ki dla'a njir Ramot Giliyad ga nja tsəya nyi hinda?>
<<Kəl ngə a ɗa, nga nar nənyi nga nar nənyi. 21 A tə bata, vanya shanguɗə tə zəbiya ta'itanyi mar Tlakə ga na, <Yo shandə nyi kər.> >>
22 Ngə Tlakə tə jawa, <<Təwa bara?>>
Ngə cha na, <<Yo ɗa ka shanguɗə gəzhi ku nya dəhə njir mətakər nyi.>>
Ngə Tlakə tə na, <<Vəlvəl ko shandə nyi kər. Ma'i ka ki mərti.
23 <<Aka ənga, Tlakə pəu tə shanguɗə gəzhi ku nya njir mətakər nghə ina. Tlakə wurta ɓatliya təmachi aka ka.>>
24 Ngə Zedekiya zər Kena'ana tə zhau nyi chi nə Mikaya ku judla cha. Ngə cha jau nyi, <<Sakaman ngə shanguɗə Tlakə tə ngya ɗa, ga yi ndər nə ngha?>>
25 Ngə Mikaya tə wuma, <<Ko ngabiya ma pəshinda ka hwi ga ki mbuta nghə ku vi nda da gwa.>>
26 Ngə təl Isra'ila tə na, <<Səya ma Mikaya, hya təra na cha yada Amon gau nə mələm, ana Joash zər təl, 27 hya nar nyi, <Janə sə nda təl tə na, fəu ndə nə ku jarum, ngwa nə nyi mada mi wa, kəl gwazhilakəu ana ɓiti, kəl pəshinda ya shili hya'atə tə mbwar dla'a yiyinghəu.> >>
28 Ngə Mikaya tə na, <<Ma ka ɓəl shili yiyinghəu, a Tlakə da ɓwanya təwa ɗa ndan wa.>> Ngə cha tsakətə na, <<Nahi dəhə nji, hya fəu ɓwanya ɗa ngə ku kəra hi!>>
Nja Tsəya Ahab vu Ramot Giliyad
29 Ka təl Isra'ila ana Jehoshafat təl Yahuda tə təra gi Ramot Giliyad. 30 Ngə təl Isra'ila tə nar nyi nə Jehoshafat, <<Ma yo ya tə mbwar dla'a nga, yo mərtə kərɗa wi da naya wa, kəl ja, naka ka pəndzə dzaki təlkur ngha.>> Aka ənga, təl Isra'ila tə mərtə kərnyi wi da nacha wa, ga təra ki dla'a.
31 Təl Aram wurta nar nyi nə nji makərkumnyi parnya mətlə inda kwa nəu na charkaina taku nyi inda bəra, <<Ngwa hya pah kala ndə mada aman dəgalkura cha ndara kushikura cha wa, kəl təl Isra'ila sənyi.>> 32 Nda njir nəu na charkaina taku inda tə la'a Jehoshafat, nda har ənda nacha ngə təl Isra'ila. Aka ənga ngə nda ghəya pah nyi, kəl ja, nda Jehoshafat tə səya ləla, 33 kəl njir nəu na chakaina inda tə zəndə ənda a da təl Isra'ila nda wa, ngə nda ngyar gədlə nyi.
34 Kəl ja, vanya ndə tə ma'ubiya laga nyi ga handa tahumabiri, ngə a yi uya təl Isra'ila təwa mədləɓə ləkutə pah nyi. Ngə təl tə nar nyi nə ndər dlə charkaina taku nyi, <<Sha, ka hwibiya naya ku mbwar pah na, a takasiya ɗa tə nji.>> 35 Pah nda tə biyama na ɗa ɗimiɗimi. Ngə nja njinda Ahab təl Isra'ila ku charkaina taku nda, ga dəhəndzə nyi dagərya cha nə dza charkaina taku nda, bama cha biya kəra njir Aram. Kəl mashi kwa biya təwa takas nda kwa ndzə ku ta charkaina taku nda, aba akə pəshinda ngə cha tah. 36 Nda pəchi kaɗə təɗa, ngə nja bəzəya nyi nə ləvaləva bəra, <<Kala ndə cha ɓəl kya tə hə'i nyi ana mələm nyi!>>
37 Təwa əngə ngə təl Ahab tə tah, ngə nja shili na cha vu Samariya ga haɗiya nyi tangnda. 38 Ngə nda chinda charkaina taku nda ku ganga vu Samariya tangnda zawar i'i kwa waɗə ti, ngə həya i'i tə naɗənya mashi nyi, wi nda ɓwanya Tlakə tə na.
39 Həyadzər sə inda tə ɗa ku bəjir təlkur Ahab, tə həu dəhə ka sə inda cha məra, patla nda cha hərtə na hira chiwar nda, ana ɓangtili nda cha fəu mələm kwa nda, nja tsəfəbiya ku likatəkatə labar ka təl ka təl nə njir Isra'ila. 40 Ahab tə ɓəliyasar kə'i jival nyi. Ngə zər nyi Ahaziya tə dləutsə cha cha ga ɗa ka təl.
Jehoshafat tə Ɗa ka Təl Yahuda
41 Jehoshafat zər Asa tə ɗa ka təl Yahuda ku fwaɗəkunya far Ahab ku təlkur Isra'ila. 42 Fa Jehoshafat makərkumnyi parnya tufəu, ma cha ɗa ka təl, cha səm təlkur vu Urshalima fa mətləkumnyi parnya tufəu. Tləmər ama nyi Azuba kwar Shilhi. 43 Aku dəhə səu, cha nəu dərpər ada nyi Asa, a da cha tyatənda wa, cha mər sə nda tsa'atsa'a tə lya Tlakəu. Madangə a da nja huhuɓənda mbwar həsəli nə katə inda kya tə dəgəl inda wa, ya nji tə biyama na hatəmachi ana ngi sə inda kwa shi'uni kwitəkwitə kinda. 44 Jehoshafat tsə'u tə mbandər ngya mənakə na təl Isra'ila.
45 Həyadzər sə inda tə ɗa ku bəjir təlkur Jehoshafat, sə inda cha uya ku dla'a, nja tsəfəbiya ku likatəkatə labar ka təl ka təl nə Yahuda. 46 Cha gədlənda shili ka mahi'i inda kwa mər zawarkur inda tə həyadzə ku bəjir təlkur ada nyi Asa. 47 A təl da vu Edom wa, ndər vala nda təl Yahuda tə tabiya ngə kwa səm təlkur.
48 Jehoshafat tə ɓatlətə param wawa'a nə shafili, ka nda maka yi Ofir nda yi shili na bəjingha, kəl ja, param wawa'a inda da ma'i wa, kəl ja, nda huhuɓə vu Eziyon Geba. 49 Aku bəji nda, Ahaziya zər Ahab tə nar nyi nə Jehoshafat, <<Ngyar nji ɗa nda ma'i kə'i nji nghə ku param wawa'a inga,>> kəl ja, Jehoshafat da i wa.
50 Ngə Jehoshafat tə tah, ngə nja haɗiya nyi tangnda nja haɗiya ka jival nyi ti, ku mələm Dauda. Ngə zər nyi Jehoram tə dləutsə cha cha, ga ɗa ka təl.
Ahaziya tə Ɗa ka Təl Isra'ila
51 Ngə Ahaziya zər Ahab tə ɗa ka təl Isra'ila a vu Samariya ku kwabə məɗəfəkunya far Jehoshafat təl Yahuda ku təlkur, cha səm təlkur təkəra njir Isra'ila fa mətləu. 52 Cha mər sə ɗimi tə lya Tlakəu, aka cha nəu dərpər ada nyi ana ama nyi, ana Jeroboam zər Nebat, nda tə gwa'atə njir Isra'ila tə mər səpəla'a. 53 Cha nəu Ba'al ga həsəli nə nyi, ga tliya nyi huɗa Tlakəu, Hyel njir Isra'ila, tang wi nda ada nyi tə məra.