Nja Hətə Iliya shi Huɗamələm
2
1 Nda Tlakə kaɗə hənda Iliya shi huɗamələm ku majigwal, ka Iliya na Elisha ku lakur ma'i hya'atə vu Gilgal. 2 Ngə Iliya tə nar nyi nə Elisha, <<Ngya tangna, Tlakə tə sə ɗa yi Betel.>> Kəl ja, Elisha tə na, <<Səmnda tə fəla tləmər Tlakə nda na pi, ana pya ka, a da yo ngya nghə wa.>> Aka ənga nda təra səya Betel. 3 Ngə daɓdzə njir mətakə nda vu Betel tə shili da Elisha ga jau nyi, <<A zəndə tə ka nda Tlakə kwa hənda tlakə nghə tsa kə ənya?>> Ngə Elisha tə wuma, <<Ah, a zəndə tə ya, kəl ja ngwa hya ɓwanya təkər wa.>> 4 Ngə Iliya tə nar nyi nə Elisha, <<Ngya tangna, Tləkə tə sə ɗa yi Jeriko.>> Ngə cha wuma, <<Səmnda tə fəla tləmər Tlakə nda na pi, ana pya ka, a da yo ngya nghə wa.>> Aka ənga nda təra yi Jeriko. 5 Ngə daɓdzə njir mətakə nda vu Jeriko tə shili da Elisha ga jau nyi, <<A zəndə tə ka nda Tlakə kwa hənda tlakə nghə tsa kə ənya?>> Ngə Elisha tə wuma, <<Ah, a zəndə tə ya, kəl ja ngwa hya ɓwanya təkər wa.>> 6 Ngə Iliya tə nar nyi nə Elisha, <<Ngya tangna, Tlakə tə sə ɗa gwa Urdən.>> Ngə Elisha tə wuma, <<Səmnda tə fəla tləmər Tlakə nda na pi, ana pya ka, a da yo ngya nghə wa.>> Aka ənga kya'anda tə təra. 7 Ngə njir mətakə tufəkumnyi tə zəbiya ga ta'ita nda naɗəu, ndo ndzam mbwa nda ka Iliya na Elisha tə ta'i tə nya Urdən nda. 8 Ngə Iliya tə səɗənda ləkutə nyi ga pəɗəti, ga dəgəya ɓiti ni, ngə ɓiti nda təkə tatsəu, manyi təwa chisəm, manyi təwa matsal, ngə kya'akura nda tə dləgəlbiya tə hə'i 'ul'ula. 9 Nda nda dləgəlbiya, ngə Iliya tə nar nyi nə Elisha, <<Par ɗa, mi ko i ya mərtə nghə təvi njo hənda ɗa?>> Ngə Elisha wuma, <<Ngya ɗa ya fa'atə ki na shanguɗə nghə zhaka mətləu.>> 10 Ngə Iliya tə na, <<Sə nda dza'u ngə ka gədi, dəhə ka ənga, ma ka la'a ɗa ku bəji nda njo hənda ɗa tsa ka, cho nau ɗa nə ngha ndara tsə'u a da wa.>> 11 Nda ndo ma'i ndo ɓwanya kya'anda, gəɗə tanyi kəl charkaina taku nə hu'u, ana taku i'i nə hu'u tə chabiyadza ga təkəbiya pama nda, ngə Iliya təra shi huɗamələm ku majigwal. 12 Elisha tsə'u la'a ti, ngə cha lələ ga na, <<Ada ɗa! Ada ɗa! Charkaina taku ka njir dlə taku nə Isra'ila!>> Ya Elisha da ɓəla la'a nyi səkə wa.Ngə Elisha tə gəziya ləkutə dzə nyi ga tətanda. 13 Ngə cha hətə ləkutə nda təɗə tsa Iliya nda ga ɓəl ga yi ta'ita nyi nya Urdən. 14 Ngə hətə ləkutə nda ga dəgəya ɓiti ni. Ngə cha jawa, <<Amanə Tlakəu, Hyel nə Iliya ja?>> Nda cha dəgəya ɓiti na ləkutə nda ngə ɓiti tə təkəbiyadzə təwa chisəm ana matsal, ngə cha dləgəlbiya biya. 15 Kəl daɓədzər njir mətakər hya'atə vu Jariko inda kwa ndzam nyi nda tə, <<Shanguɗə Iliya səyatə təkəra Elisha.>> Ngə nda biya ka nda ɓə na cha, nda uzhi səya hu'i a huɗə nyi. 16 Nda na <<La'a, nji da tsa naea mavi'i nghə tufəkumnyi. Əngwa nda ki gwa'a tlakə ngha. Ndara tsə'u Shanguɗə Tlakə hətə nyi ga ki fiya nyi kya tə vanya dəgəl ndara dakəu.>> Ngə Elisha tə wuma, <<A'a ngwa hya sə nda wa.>> 17 Kəl ja, nda biyama na gədi tə nda ɗa tsə'u cho nau ngyar wa. Aka ənga cha na, <<Sə nda>> Ngə nda sə nji tufəkumnyi, nda ki gwa'a nyi hanyi makərəu, kəl ja, a da nda uya nyi wa. 18 Nda nda ɓəl shili da Elisha, nda na ngya vu Jariko, cha nar nda, <<A da ya nar hi ngwa hya ma'i wa ma?>>Səshinshin nə Elisha
19 Njir mələm tə nar nyi nə Elisha, <<Tlakən ea, ndzama, mələm nə mənakə gagaɗa, kəl ja, ɓitir mələm nə ɗimiɗimi, kwa katə ma'a hə'i tsa mər sakəda.>> 20 Ngə Elisha tə na, <<Shili na ɗa ma taɗər shala hya pəu wunə kwa. Aka ənga nda shili na nyi. 21 Ngə cha təra biya nya tsədzəɗə ɓiti ga biya uchətə wunə nda gwa ti cho na, <<Janə sə nda Tlakə tə na, <A mbandə tə ya ɓiti na. A tsə'u cho tsakətə gwa'atə nji kwa kuɗə ndara cha mərtə hə'i kəla sakəda wa.> >> 22 Fwatə tə bəji nda, ɓiti nda tə ɗa mənakəu, wi ɓwanya nda Elisha tə pə nda. 23 Hya'atə tangnda Elisha tə təra gi Betel. Nda cho ma'i ku laku, kəl alenya nguli tlakala tə zəbiya ku ta mələm ndo pə kurakə kəra cha ndo na, <<Təra ndə dəɗədəɗə kər! Təra ndə dəɗədəɗə kər!>> 24 Ngə cha sha ga ndzamar nda ga nga shi'u səya kəra nda ku tləmər Tlakəu. Kəl ngə alenya ku takə tsa'a mətlə tə zəbiya ku lya wu ga zəbiya kutlanda nji fwaɗəkumnyi parnya mətlə ku huɗa nguli tlakala inda. 25 Ngə cha təra gya tə Dəgəl Karmel hya'atə kinda tsə'u cha ɓəl gwa Samariya.