Pah ku Pama Isra'ila ana Mowab
3
1 Joram zər Ahab tə ɗa ka təl Isra'ila vu Samariya a ku kwabəchiskunya far Jehoshafat təl Yahuda, cha səm təlkur fa kwabəmətləu. 2 Cha mər sə ɗimi tə lya Tlakəu, kəl ja, a da wi nda ka ada nyi ana ama nyi tə mər wa. Cha hənda hangu həsəli nə Ba'al inda ada nyi tə ɓatləti. 3 Dəhə ka ənga a da cha təkə səpəla'a Jeroboam zər Nebat wa, cha fəu njir Isra'ila ku mər chul ndana səpəla'a, a da cha ngyar wa. 4 Mesha təl Mowab ndər ɓəla kətəng cha, kala fa cho maka nə nyi gam 100,000 ana pa'ua 100,000. 5 Kəl ja, ahir Ahab tə tah, ngə təl Mowab tə tliya nyi mwali nə təl Isra'ila. 6 Aka ənga, a ku bəji nda, təl Joram tə ngyar Samariya ga tsəmtə dəhə njir Isra'ila. 7 Cha sətə nyi mafakə nənnə nə Jehoshafat təl Yahuda, <<Janə təl Mowab tliya da tə mwali. Amana, ko ma'i tsa'a na ya ki pah njir Mowab ya?>> Ngə ɓəlakə nyi, <<Yo ma'i tsa'a na ka, naya ma'a wi nakə nda, nji ɗa tsə'u wi nji nghə inga, ya taku ɗa i'i wi nənghə inga.>> 8 Ngə cha jawa, <<Təwabari mo gwa pah nda ja?>> Ngə cha wuma, <<Təwa dadil takə Edom.>> 9 Aka ənga təl Isra'ila ana təl Yahuda tə təra. Ahir nda hanyi məɗəfa ndo ma'i, ngə nda shili tə mbwa nda a ɓiti da ka ləvaləva i'i ana sərshishi kənda wa. 10 Ngə təl Isra'ila tə na na kurakə dzəgamdzəgaməu, <<Mi na! Tlakə tə nga mən namən ka təl ka təl makər ina, ga cha tləɗanda mən nə njir Mowab ya?>> 11 Kəl ja, Jehoshafat tə jawa, <<A ndər mətakər Tlakə da tangna, nda məno jawar Tlakə təwa nyi ma?>> Ngə dəgalər ləvaləva nə təl Isra'ila tə wuma, <<Elisha zər Shafat tangna. Nacha ngə ndər gə ɓiti nɨ Iliya ɗakaɗa.>> 12 Ngə Jehoshafat tə na, <<Ɓwanya Tlakə tsa'a na cha.>> Aka ənga ngə təl Isra'ila ana Jehoshafat ana təl Edom tə təra səya da cha. 13 Ngə Elisha tə nar nyi nə təl Isra'ila, <<Mi ku pama ma na ka? Ma'i kya da ndər mətakər ada ngha ana ndər mətakər ama ngha.>> Ngə təl Isra'ila tə wuma, <<A'a, aka Tlakə nə tə nga ea naea ka təl ka təl makər ina ka cha tləɗanda ea nə njir Mowab.>> 14 Ngə Elisha tə na, <<A səmnda tə fəla na tləmər Tlakə Ndər Gyalkur nda pi, ana nda yo həsəli nə nyi, macha aka yo la'a səlir Jehoshafat təl Yahuda wa, a da yo nda ndzam hi ndara ya səhimi da hi wa. 15 Kəl ja, shili ma na ndər dəgə zəmbəl na'a.>> Nda ndər dəgə zəmbə kwa dəga, ngə cha Tlakə səya təkəra Elisha 16 ngə cha na, <<Janə sə nda Tlakə tə na, fatləbiya ma məsha ku dakə na. 17 Aka janə sə nda Tlakə tə na, a da hyo la'a gyang ndara par wa, dəhə ka ənga dakə nə kwa nyi na ɓiti, ya nahi, tla kəhi i'i ana alenya sərshishi kəhi kwa sa. 18 Ngəng nga sə kus ngə tə lya Tlakəu, ətsəu, cho nə hi njir Mowab ku cha hi. 19 Hyo kura kala mələm nda ku ɓangtili ana kala mələm wawa'a. Hyo gəganda kala wu mənakəu, hyo ta'ində dəhə tsədzəɗəu, ba'a səwandə kala fa inda mənakə na hangu i'i.>> 20 Əmbudla vanya zəkəu, a tə bəjir hatəmachi, kəl janə ɓiti kwa hwi hya'atə təwa Edom! Ngə hə'i nda nyi na ɓiti. 21 Njir Mowab ngatə tə ənda ka təl ka təl inda shili tə ka pah nda, aka ənga nja nga kala ndəu, ngulisha'a ka nji halhala inda kwa nau hətə kar pah, ga tsəmiya nda tə ɓəlkər hə'i kənda. 22 Nda na hya'atə kaɗə mbudla, kəl janə pəchi kwa mbəl tə ɓiti. Njir Mowab kwa la'a ɓiti nda man nda dəzə jwang wi mashi. 23 Ngə na, <<Mashi nga! Ka tə ingə nga pah ga kuɗənda kərnənda. Kwazhalɓi ɗatə nə njir Mowab! 24 Kəl ja, nda njir Mowab tə shili tə mbwar tsəmdzə njir Isra'ila, njir Isra'ila tə hya'atə ga pah nda kəlnda nda hwi. Njir Isra'ila tsə'u tə nəu njir Mowab ndo kuɗə nda. 25 Nda səwandə mələm nda, kala ndə tsə'u kwa vakə hangu ya tə kala mbwa nda mənakəu, kəl nda kəra hə'i tə sa na hangu inda. Nda ta'ində dəhə tsədzəɗəu ga gəganda kala wu mənakəu.Kəl Kir Hareset ngə nja ngyari ana hangu nyi tə mbwar ngya nyi, kəl ja, nji inda na gavərdəng tə ɓandə ga pah nda tsəu. 26 Manda təl Mowab tə la'a njo gwa'a kura nyi ku pah nda, ngə cha fa'atə njir katsakər 700 ga cha gwa təwa təl Edom, kəl ja, a da nda nau wa. 27 Ngə təl Mowab tə hətə zə'ualə nyi nda kwa nda dləu cha cha na təlkur, ga handa təmachi nə kya tə ɓangtili mələm nda. Ngə ləvər tə səya njir Isra'ila ngə nda ngyar pah nda ga ɓəl ta nda kya tə hə'i kənda.