Mal Malatəsal
4
1 Mala vanya ndə ku dzuku nə njir mətakər tə har kuraka cha ga nar nyi nə Elisha, <<Mava nghə sal ɗa tə ti, ya zəndə tə ka ndər ləvər Tlakə cha. Kəl ja, vanya ndə nda kwa nəu nyi məl kwa gwa'a cha shili fa'atə nguli shili ɗa inda mətlə inda ka mavi'i nyi.>> 2 Ngə Elisha tə ɓəlakə nyi, <<Təwabar yo vala ngha? Dəkar ɗa, mi sə nda ts kə hyo ki ngha?>> Ngə cha na, <<A sə da tsa mava nghə hinda pa'a wa, kəl zər mal kushiu.>> 3 Ngə Elisha tə na, <<Ma'i kya da dəhə təwul nghə i'i ka ki gəditsə shikəmal jwajwa i'i. Ngwa ka da gəditsə shikəmal yiɗau tanyi wa. 4 Kəl ba'a ka gwata nghə ku vi ka haɗəkər nyavi təkəra ka ana nguli shili ngha. Ka ghəya pə mal gu dəhə shikəmal inda, ma kala zhang tə nyi ka fiya bangətiti.>> 5 Ngə mala nda təra kyo ki ka nguli shili nyi inda, ngə cha həɗəkənda nyavi. Ngə shili na nyi shikəmal inda ngə cha ghəya pə mal gwa kwa. 6 Nda dəhə shikəmal inda tə nyi, ngə cha nar nyi nə zər nyi, <<Anda na ɗa vanyi.>> Kəl ja, cha wuma, <<A shikəmal da tə həyadzə wa.>> Kəl mal nda tə ngyar hwi. 7 Ngə cha təra ga yi nar nyi nə ndəkə Hyel, ngə ndəkə Hyel tə na, Ma'i, ka ki ɗəlnda ka kinda məl nda ni. Sə nda həyadzə tsə'u hya səm ka nguli ngha.>>Elisha ana Vanya Mala vu Shunem
8 Vanya pəchi Elisha tə yi Shunem. Vanya mala nda na gəna da hinda, nda tə mbabiyadzər gədi nyi ka səm sərsuma. Aka nga, kala biji nda cho tərabiya banda, cho ta'i ka səm sərsuma.
9 Cha nar nyi nə sal nyi, <<A zəndə təya ndə nə kwa maka shil tərabiya na ndə karti nə Hyel na. 10 Mi ɓatlətə nyi zər vi kushiu kyatə kərapakəu, ma fəu gangər ana tyaɓər, hwakəu ana təkəsəu. Ga cha ngya kwa kala sakanda cha shili da ma.>>
11 Vanya pəchi nda Elisha tə shili, ngə cha təra gyo vinyi ga gi piya tanyi. 12 Ngə cha nar nyi nə kadakaliya nyi Gehazi, <<Ngar ɗa mala mələm shunem nga.>> Ngə cha nga nyi, ngə cha səgwa ta'i tanyi biyama nyi. 13 Ngə Eliaha tə nar nyi nə Gehazi, <<Nar nyi nə mala ngə bəra, <Ka mər dəhə chul nəna sə ka ea. Sakan ja ya, mi ko i nja mərtə ngha? Ea ɓwanya tə dəbar nghə nə təl ndara gau ləvaləva ya?> >>
Ngə cha wuma ga na, <<Ki da tsa ya ku huɗa njikə ea.>>
14 Ngə elisha tə jau Gehazi, <<Mi njo kina mərtə nya?>>
Ngə Gehazi tə na, <<A zər da tsa cha wa, ya sal nyi halti.>>
15 Ngə Elisha tə na, <<nga nyi.>> Kəl ngə cha nga nyi, ngə cha shili ta'i tanyi ku nyavi. 16 Ngə Elisha tə na, <<Tang tə biji nənnə pəta, ko hətə zər mar hatla ka.>>
Ngə cha na, <<A'a tlakə ɗa, ngwa ka da tla gəzhi nə mava nghə, ndəkə Hyel wa!>>
17 Kəl ja, mala nda tə hətə huɗəu, ya tang tə biji nda vanya fa cha yiyah zərsal, tang wi nda Elisha tə nar nyi. 18 Zər nda tə həa, vanya pəchi cha yada ada nyi hya dza njir mər zə zwazwa. 19 Cha na, <<Kəraya! Kəraya!>> Ngə ada nyi tə nar nyi nə vanya kadakaliya, <<Hətə nyi gwa da ama nyi.>> 20 Ahir kadakaliya nda tə hətə nyi ga təra na cha gwa da ama nyi, ngə zər nda ngyata nyi tə dza ama nyi kəl nda pəchi tə gi tangkər, ngə cha tah. 21 Ngə cha gwa pinda nyi tə gangər ndəkə Hyel, ngə cha haɗiya nyavi ga təra biya. 22 Ngə cha nga sal nyi ga na, <<Maki sətə ɗa kadakaliya zhang ana kwara ya kusa yada ndəkə Hyel ga ya shili.>> 23 Ngə cha jawa, <<Mya gwa'atə ko yada cha ənya? Ya janə a da taɗər hya ndara pəchir ngyaməngya nə ənya wa.>> Ngə cha na, <<Ngwa ka ɗəngha wa.>> 24 Ngə ɓatlətə kwara ga nar nyi nə kadakaliya nyi, <<Ma'i na ma, ngwa ka da ta'i wa kəl ma ya nar ngha.>> 25 Aka ənga cha go laku ga shili da ndəkə Hyel kyatə Dəgəl Karmel. Nda ndəkə Hyel tə la'a nyi naɗəu, ngə cha nar nyi nə Gehazi kadakaliya nyi bəra, <<La'a! Wula mala mələm Shunem nda! 26 Hwi ka biya ɓə na cha ka jawar nyi bəra, <Yiying ka? Sal nghə yiying tanyi ja? Zər nghə tsə'u yiyinghəu?> >> Ngə cha wuma, <<Kala sə tsa'atsa'a tanyi.>> 27 Nda cha dzəva dza ndəkə Hyel kya tə dəgəl, ngə cha gəziya hya cha. Ngə Gehazi tə shili ka cho mbəlanda nyi, kəl ja, ndəkə Hyel tə na, <<Ngya nyi sənyi! A tə huɗatla ɗimiɗimi ngə cha, kəl ja, Tlakə tə ɗəwanda tsa ya, ga ngyar dəkar ɗa ndara mya gwa'ati.>> 28 Ngə mala nda nar nyi, <<Tlakə ɗa, ya gədi zər tsa kə ndanə ya? A da ya nar nghə bəra <Ngwa ka hya'andə chim ɗa wa ma>?>> 29 Ngə Elisha tə nar nyi nə Gehazi, <<Kaɓətə ləkutə nghə ka mbiya na gyarakən, hətə zəwa ɗa ka hwi. Ma ka ɓə na kala ndə ku laku ngwa ka usa nyi wa, ya ma kala ndə tə usa nghə ngwa ka dləu wa. Hatə zəwa ɗa ngə ya kəra cha.>> 30 Kəl ja, amanya zər nda tə na, <<Səmnda tə fəla na tləmər Tlakə nda na pi ana naka, a da yo ngya nghə wa.>> Aka ənga cha hya'atə ga nəu nyi. 31 Gehazi tə ghəya yi, ga yi hakər zəwa nda təkəra zər nda, kəl ja, a sə da ɗa titih ndara zər nda sha wa. Aka ənga Gehazi tə ɓəl yada Elisha ga yi nar nyi, <<A zər nda da hya'atə wa.>> 32 Nda Elisha tə yo ki nda, kəl janə zər nda tə piya tə gangər nyi. 33 Ngə cha gwa, ga haɗiya nyavi təkəra nda mətləta nda ga pətlənya nə Tlakəu. 34 Ngə cha yi piya tanyi təkəra zər nda tə gangər, nya na nya, li na li chi na chi. Nda cha ndəɗanda kərnyi tə cha, ngə dza zər nda tə ɗa kwakwaɗəu. 35 Ngə Elisha tə hya'atə cho zhuli ku ta vi nda, ngə cha ɓəla gi ndəɗanda kərnyi tə cha səkəu. Ngə zər nda wachi zhaka məɗəfə ga mbəɗiya lya cha. 36 Ngə Elisha tə nga Gehazi ga nar nyi, <<Nga mala mələm Shunem nda.>> Ngə cha mər ənda. Nda mala nda səgwa, ngə cha nar nyi, <<Hə zər ngha.>> 37 Ngə cha gwa, ga gwa uzhi hu'i a huɗə nyi. Ngə cha hətə zər nyi ga təra biya.
Elisha tə mər Alenya Səshinshin Mətləu
38 Ngə Elisha tə ɓəl yi Gilgal, ku bəji nda huɓə tə tlə tə hə'i nda. Ku bəji nda dzuku njir mətakər huɗənyi, cha nar nyi nə kadakaliya nyi, <Fətə təm dəgal tə hu'u ka tagu nyi mgwayangwaya nə nji ina.>> 39 Ngə zhang ku huɗa nda tə təra gwa takəu ka cha ki gwa'arə heli, ngə cha uya anap takəu. Ngə cha ɗəntsə yayah nyi tə ləkutə nyi. Nda cha shili ni, ngə cha tsətsəɗəu gu təm mgwayangwaya nda, madangə a ndə da zəndə ndara mi inda wa. 40 Ngə nja gətsə nyi mgwayangwaya nda nə nji inda, kəl ja, nda nda ɗari, ngə nda na, <<Ndəkə Hyelləu, kəlpə ku təm na!>> A da nda nau səm wa. 41 Ngə Elisha tə na, <<Gwa'arə ɗa ma upwa.>> Ngə nja gwa'arə nyi, ngə cha pəu gu təm nda ga na, <<Nə nyi ma nə nji nda səma.>> Ma nda ɗari, a tsə'u sər takasiya ndə da kwa wa.
Elisha tə Nyandə Nji Gharəu
42 Vanya tə shili hya'atə vu Ba'al Shalisha, ga shili na nyi gwazhilakə uhi nda njo nga bale, nda nja mərya tangərma, takwara mətləkumnyi, tsa'a na zagam uhi miɗakə nyi. Ngə Elisha tə nar nyi, <<Nə nyi nə nji nda səma.>> 43 Ngə kadakaliya nyi tə jawa, <<Aman yo ɗana fiya sənə huɗə nji gharəwa?>> Kəl ja, Elisha tə wuma, <<Nə nyi nə nji nda səma. Aka janə sə nda Tlakə tə na, <Ndo səm ba'a ngyar həyadzə nyi.> >> 44 Ngə cha fiya biyamar nji inda, nda səm ga ngyar həyadzə nyi, wi sə nda ɓwanya Tlakə tə na.