Nja Mbandə na Bibi
5
1 Na'aman gau nə ləvaləva təl njir suriya cha. Ndə dəlga cha tə lya tlakə nyi, ya njo la'a səli nyi 'ual'ualəu, aka təwa ngə Tlakə tə gwa'atə njir Aram tə kura. Ləvaləva kwalkeal cha gagaɗa, kəl ja, ndər bibi cha. 2 Aku vanya pah, njir suriya tə səya vanya zər kwapəlekə vu Israila ka mava, ga fiya nyi ka kadakaliya mala Na'aman. 3 Vanya pəchi ngə cha nar nyi nə tlakə nyi, <<Macha tlakə ɗo i cho kina la'a ndər mətakər nda na ngya vu Samariya! Cho mbandə nyi na bibi nga.>> 4 Ngə Na'aman tə təra yada tlakə nyi, ga yi nar nyi sə nda kwa nda tə na. 5 Ngə təl tə Aram ɓəlakə nyi, <<Mada aman cha, ma'i, yo lətə nyi kainau nə təl Isra'ila.>> Aka əngə Na'aman tə gəzəya laku, cha hətə talent nə azurfa kuma, shekel nə bəjingha 6,000, ana dzaki pampam kuma. 6 Kainau nda cha nə nyi nə Na'aman nda tə na, <<Ana kainau na janə yo sətə nghə kadakaliya ɗa Na'aman tsaka ko mbandə nyi na bibi nga.>> 7 Nda təl Israila tə kəratsəntə kainau nda, ngə cha tanda lukutə nyi ga na, << Naya Hyel ya? Kwa nau tsəya ndə ya ɓəla fəu nyi pi səkə ya? Mya gwa'atə ndə na kwa sətə ɗa vanya ndə ka ya mabandə nyi na bibi nya? la'a ma ənda cho gwa'a ɗa na gughi!>> 8 Nda Elisha ndəkə Hyel tə ngatə ənda təl Isra'ila tə tanda lukutə nyi, ngə cha sətə nyi mafakə bəra, <<Mya gwa'atə ka tanda lukutə ngha? nar nyi nə ndə ngə cha shili da ya, cho zəndə ənda ndər mətakər da vu Israila.>> 9 Aka ənga Na'aman tə hya'atə na taku nyi i'i ka charkaina taku nyi i'i ga yi ta'i nya nyaki Elisha. 10 Ngə Elisha tə sətə nyi changhabal nja nar nyi, << Ma'i, ka gwa waɗə ku dəl Urdən zhaka məɗəfa, dzaka kwa ɓəla shili ya ko ɗa chichi nyi.>>11 Kəl ja, Na'aman tə ma'i tanyi na huɗatla cha na, <<Ya har cho nda zəbəya ta'i ba'a nga tləmər Tlakəu, Hyel nyi, cho shashi dza ya na cha cha cho mbandə ɗa na bibi na. 12 A dəl Abana ana Farfar vu Damaskus da ndiya ndəl inə vu Israila nə ma? A da yo nau waɗə kwa ya mbə ma?>> Aka nga cha sha ga təra na huɗatla.
13 Ngə kadakaliya Na'aman tə yada cha ga na, <<Ada ɗa, ma ndər mətakər ngə tə nda nar nghə ka mər sə dəgal matsa ngə ya, a da ko nda mər ma? Abiyakat nə cha nar nghə bəra, <Waɗə ka mbə na?>> 14 Aka ənga cha səya ga gwa chiya kər zhaka məɗəfa ku dəl Urdən, wi nda ndəkə Hyel tə nar nyi, ngə kumər dza cha tə ɓəla shili ga ɗa wi dza zər kushiu. 15 Kəl ngə Na'aman ana dəhə kadakaliya nyi i'i tə ɓəl yada ndəkə Hyel. Cha ta'i biyama nyi ga na, <<Sakan ja, a zəndətə ya ənda a vanya Hyel da ku dəhə dunəya wa, kəl vu Isra'ila. Maki dləutsə ga'a hya'atə tsa mava ngha.>> 16 Ngə ndər mətakər tə wuma, <<Səmnda tə fəla na tləmər Tlakə nda na pi, ndə nda yo həsəli nə nyi, a da yo dləu sə tsa kə wa.>> Mada nda Na'aman tə mbabiyadzər gədi nyi, a cha dləu wa. 17 Ngə Na'aman tə na, <<Macha a ko dləu wa, maki əngwa nə nyi sə nda alfadari mətlə kwa hə nə mava ngha, aka a biyama a tsə'u mava nghə da kwa hatəmachi nə nginda ndara lə ga'a nə kala katə wa, kəl a nə Tlakəu. 18 Kəl ja, ga Tlakə farbikə ɗa təkəra sə zhang. Ma tlakə ɗa tə go mbwa'alə Rimon ka cha uzhi ya cha dəhəndzə ɗa dza, naya ma'a yo uzhi ku mbwa'alə Rimon nda, ga Tlakə farbikər mava təkəra nga.>> 19 Ngə Elisha tə na, <<Ma'i ku piyarɗufəu. Ahir Na'aman təratə naɗəu, 20 ngə Gehazi kadakaliya Elisha tə na ku ɗufwa cha, <<Tlakə ɗa tə ɗa kwya'a gagaɗə nə Na'aman, ndər Aram na, təwa ngyar dləu sə inda cha shili ni. Səmnda tə fəla na tləmər Tlakə nda na pi, yo gədlə nyi ba'a dləutsə vanya sə tsa cha.>> 21 Aka ənga Gehazi tə kusa gədlə Na'aman. Nda Na'aman tə la'a cho hwi shili kəra cha, ngə cha səya kyo charkaina taku ka nda ɓə na cha. Ngə jawa, <<Dəhə sə tsa'atsa'aa?>> 22 Ngə Gehazi tə wuma, <<Dəhə sə tsa'atsa'a, tlakə ɗa tə sə ɗa ya nar ngha, <Nguli tlakala hya'atə ku dzuku njir mətakər tə shili da ya hya'atə kyatə dəgə Ifərem. Maki nə nda talent zhang nə azurfa ana dzaki tsa'amətləu.> >> 23 Ngə Na'aman tə na, <<Dəhə ənda cha ɗa, hətə talent mətləu.>> Cha gədi Gehazi cha dləutsi, ngə mbau talent mətlə nə azurfa nda ku mbəl mətləu, ana dzaki tsa'amətləu. Ngə cha həkə nyi nə mətlə ku huɗa kadakaliya nyi, ngə nda dləutsə laku mar Gehazi. 24 Nda Gehazi tə shili tə dəgəl, ngə cha dləutsə sə inda tsa kadakaliya inda ga piya ku ki. Ngə cha səu nji inda ku laku ngə nda təra. 25 Ngə cha təra ga gwa ta'i tanyi mar tlakə nyi Elisha. Ngə Elisha jawa, <<Abar ka ma'i Gehazi?>> Ngə Gehazi tə wuma, <<Kadakaliya nghə da ma'i mada abar wa.>> 26 Kəl ja, Elisha tə nar nyi, <<A mambəl ɗa da tsa'a nakə ku bəji nda ndə nda səya kyo charkaina taku ka cha ɓə nakə nda ma? Bəjir dləu kwaba, ndara dzaki, yayar zaitun, fa anapəu, kətəng, tla, mavi'i ndara kwatəra nə ja? 27 Bibi Na'aman nda kwa sha ya kəra ka, ana nyandəla ka ba'anawa.>> Ngə Gehazi tə biya təra ga ngyar Elisha, ya ngə bibi tə səya nyi, ga pərtə wi mindindili.