Elisha Timbiya Myalang Kəm ku Ɓiti
6
1 Dzuku njir mətakər tə nar nyi nə Elisha, <<La'a, mbwa nə məna ɓə tə nə kushi gagaɗə nə mən. 2 Mən təra gwa Urdən, tangnda kala ndə ku huɗamən kwa uya udzəm, məna hərtə mbwa kunda ka məna ngya.>> Ngə cha na, <<Ma'i ma.>> 3 Ngə zhang ku huɗa nda tə na, <<A da ko ma'i kə'i mavi'i nghə ma?>> Ngə Elisha wuma, <<Yo ma'i.>> 4 Ngə cha təra kə'i nda. Nda təra gwa Urdən ga ghəya gəga wu i'i. 5 Nda zhang ku huɗa nda kwa gəga wua, ngə myalang kəm tə təɗə gu ɓiti. Ngə cha lələ ga na, <<Saru nə həya ya ni!>> 6 Ngə ndəkə Hyel tə jawa, <<Tangmanə təɗə cha?>> Nda cha char nyi mbwambwa nyi, ngə Elisha gəgəya wu ga vakətə gwa tangnda, ngə mərtə myalang kəm nda tə zədə təkəra ɓiti. 7 Ngə cha na, <<Həbiya zəbiya.>> Ngə ndə nda ha cha cha ga həti.Elisha ana Njir Aram
8 Nda njir Aram kwa pah ka njir Isra'ila, ngə cha ɓwanya nə njirawawa'a ləvaləva nyi bəra, <<Yo fiya mbwar dzəmdzə ɗa tə mbwa kada na mbwa kada.>> 9 Ngə ndəkə Hyel sə mafakə nə təl Isra'ila bəra, <<Gəla na tərabiya tə mbwa nga, aka njir Aram mbuya tə mwabu tanga.>> 10 Aka ənga ngə təl Isra'ila tə ndzamtə mbwa nda ndəkə Hyel tə cha nda. Zhaka ɗang tanyi Elisha kwa təɗəhimi nə təl, tsa'aka cho ngya na ɓəla tə mbwa wi inda. 11 Sə ngə tə tliya huɗa təl Aram. Ngə cha nga njirawawa'a ləvaləva nyi i'i ga jau nda bəra <<A da hyo nar ɗa ndara wa ngə ku huɗamən kwa chi hi nə təl Isra'ila ma?>> 12 Ngə zhang ku huɗa njirawawa'a ləvaləva tə na, <<A ndə da tlkə ɗa təl wa,>> Kəl ja, Elisha nda na ngya vu Isra'ila, tə nar nyi nə təl Isra'ila ɓwanya nda ka pə ku vi hanyi ngha.>> 13 Ngə təl tə na, <<Ma'i ma hya ki gwa'a mbwa nda cha ti, tsa'aka yo sə njo ki səya nyi.>> Ngə nja nar nyi, <<Wula cha vu Dotan.>> 14 Ngə cha sə nji na taku i'i ka charkaina taku ana ləvaləva inda na dunama yi nda. Nda təra əvu'i ga yi ɓandə mələm nda. 15 Nda kadakaliya ndəkə Hyel tə hya'atə kaɗə mbudla vanya zəkəu, kəl janə ləvaləva i'i ana taku ka charkaina taku ɓandətə mələm nda. Ngə kadakaliya nda tə jawa, <<Tlakə ɗa, mi mo məra?>> 16 Ngə ndər mətakər tə nar nyi, <<Ngwa ka da ləvər wa. Nji inda kə'i ma ndiyatə nji inda kə'i nda.>> 17 Ngə Elisha tə pətlənya cha na, <<Yawa Tlakəu, mbəɗiya lya cha ga cha la'a.>> Ngə Tlakə tə mbəɗiya lya kadakaliya nda, ngə cha ndzamar ga la'a dəgəl nyitə na taku i'i ana charkaina hu'u, nda ɓandə Elisha. 18 Nda njir dawa kwa səya kəra cha, ngə Elisha tə pətlənya nə Tlakə ga na, <<Tlakəu, dəgə nji inə na shilikə wuləfəu.>> Ənga cha dəgə nda na shilkə wuləfəu, wi nda Elisha tə gədi. 19 Ngə Elisha tə nar nda, <<A da laku nə wa ya a da mələm nda nə wa. Nəu ɗa ma yo char hi ndə ngə hyo gwa'a nga.>> Ngə cha təra na nda gwa Samariya. 20 Ahir nda gu mələm nda, ngə Elisha tə na, <<Tlakəu, mbəɗiya lya nji ina ga nda la'a səu.>> Kəl Tlakə tə mbəɗiya lya nda, ma nda ndzamri kəl janə nda vu Samariya. 21 Nda təl Isra'ila tə la'a nda, ngə cha jau Elisha, <<Ya kuɗənda nda ya, ada ɗa ya kuɗənda nda ya?>> 22 Ngə cha wuma, <<Ngwa ka kuɗənda nda wa, ka kuɗənda nji inda a da naka səya nda na dunamar katsakər ndara laga nghə wa ya? Nə nda sərsuma ana ɓiti nda səm nda sa nda təra kya da tlakən nda.>> 23 Aka ənga cha ɓatliya nda ladər dəgaləu, ahir nda wur na səma ana sa, ngə cha səu nda ku laku, ngə nda ɓəl kya da tlakən nda. Aka ənga, a njir Aram da zhaka pah njir Isra'ila wa.
Nja Ɓandə Samariya na Pah
24 Ahir ənga, Benhadad təl Aram tə tsəmtə dəhə ləvaləva nyi, nda təra ga gwa ɓandə Samariya na pah. 25 Ngə huɓə tǝ tlə ku mələm nda, pah nda tə ɗa tərkusə gagaɗa, tə nda ɗa njo ɗəlnda kəra kwara zhang təkəra azurfa chisəkumnyi, ibi mbətla tsə'u azurfa tufəu. 26 Nda təl Isra'ila kwa ma'i tə kəra ɓangtili, ngə vanya mala tə na na kurakə dzəgamdzəgaməu, <<Tlakə ɗa tələu, vala ɗa!>> 27 Ngə təl tə ɓəlakə nyi, <<Macha a Tlakə do vala nghə wa ya, aman yo ɗana vala ngha?>> 28 Ngə təl tə ɓəla jau nyi, <<Mya ɗa?>> Ngə cha wuma, <<Hanyi yiɗau inga tərabiya nga, mala ngə tə nar ɗa, <Nə ma zər hghǝ ənya ma ɗinya, ga ma ɗinya na'a əzəkəu.> 29 Ngə ea tagu zər ɗa ga ɗinya. Vanya zəkə ya nar nyi, <Nə ma zər nghə ma ɗinya,> kəl ja, cha ɗəwanda zər nyi.>> 30 Nda təl tə ngatə ɓwanya mala nda, ngə cha tanda ləkutə nyi. Nda cho ma'i kyatə kəra ɓangtili, nda nji tə ndzamari kəl nda la'a ləkutə tata dzə nyi. 31 Ngə cha na, <<Ga Tlaka tlanda ɗa nəuma ɗimiɗimi, ma a da nja tlanda kəra Elisha zər Shafat ngə ənya wa!>> 32 Elisha tə ngya ku ki nyi nanda kə'i njirawawa'a nyi. Ngə təl tə sə changhabal, təvi changhabal təl inda dzəva, ngə Elisha tǝ nar nyi nə njirawawa'a nyi, <<A da hya la'a ənda ndər tsa ndə nə tə sə vanya ndə ka chi shili tlanda kəra ya ma? Ngatə ma, ma changhabal nga shili, hya haɗənda nyavi tsa cha. A kuraka hya tlakə nyi ngə yo ngatə kwa shili hi nyi ma? 33 Tsə'uta nyi ku huɗa ɓwanya nə nda, ngə changhabal nda dzəva. Ngə təl tə na, <<Hya'atə tsa Tlakə nə təmachi na, mya gwa'atə yo səkə Tlakə ka cha vala ɗa səka?>>