7
1 Ngə Elisha tə na, <<Səya ma himi da ɓwanya Tlakəu. Janə sə nda Tlakə tə na, saka nənnə əzəkəu, njo ɗəlnda upə zhizhə tasau zhang təkəra azurfa zhang, ana tasau mətlə nə səuhiuhi nda njo nga bale təkəra azurfa zhang a nya lakur gwa Samariya.>>2 Ngə gau ləvaləva nda ləhə dza təl nda tə nar nyi nə ndəkə Hyel bəra, <<La'a, mada Tlakə tə mbəɗiya kagapə huɗamələm ya, sə wi ngə kwa nau ɗa ya?>> Ngə Elisha tə wuma, <<Ko la'a na lya ka, kəl ja, a da ko səm wa!>>
Ləvər tə Səya njir Aram
3 Alenya njir bibi fwaɗə da na ngya biya nya lakur gu ta mələm. Ngə nda nar nyi nə kərnənda, <<Mya gwa'atə məno ngya tangnə kəl pəshinda məna kuɗə ta? 4 Ma məna na, <Mən təra gu ta mələm,> huɓə kunda, ya məno gwa kuɗa. Ya ma məna ngya tangnə tsəu, məno kuɗa. Aka ənga mən təra ya tə mbwar tsəmdzə njir Aram məna yi nə nda kərnəmən. Ma ngya mən na pi, ba'a məna ngya, ma nda kuɗənda mən tsəu, ba'a məna kuɗa.>> 5 Ma vi kwa ɗa zhiməu, ngə nda hya'atə ga təra ya tə mbwar tsəmdzə njir Aram. Nda nda ya nya nyachira mbwar tsəmdzə nda, a mada ndə zhang da nda wa, 6 aka Tlakə tə gwa'atə njir Aram tə ngatə kuraka hya charkaina taku ana hya taku ana ləvaləva ɗang kwa shili kəra nda, aka ənga nda nar nyi nə kərnənda, <<La'a, təl Isra'ila kinda nyi tə kwaba nə təl njir Hiti ana təl njir Masar ka nda shili pah mən!>> 7 Aka ənga nda vi tə ɗa zhim ngə hwibiya ga ngyar madləɓa kənda i'i ana taku kənda i'i ana kwara kənda i'i. Nda ngyar mbwar tsəmdzə nda wi nda cha nda ga hwibiya na pya nda. 8 Njir bibi inda ya nyachira mbwar tsəmdzə nda, ga go zhang ku huɗa madləɓa inda. Nda gwa səm ga sa, ga fa'atə azurfa, bəjingha ana ləkutə i'i, ga təra ga ki ɗəwanda. Nda ɓəl ga shili go vanya madləɓa ga gwa fa'abiya alenya sə kwa i'i tsəu, ga ga ki ɗəwanda. 9 Ngə nar nyi nə kərnənda, <<A sə tsa'atsa'a nə məno mər wa. Pəchi na, pəchir mafakə mənakə na ya nə mən da'ata mən. Ma məna səkə kəl vu'i tə wura, vanya sə ɗimiɗimi kwa uya mən. Mən təra sakana, məna yi dəkar sə nə tə patla təl.>> 10 Aka ənga nda təra ga yi nga ndər nya lakur gu mələm ga nar nyi, <<Ea yatə mbwar tsəmdzə njir Aram, a mada ndə zhang da hinda wa, ya a kuraka madami da wa, kəl taku i'i ka kwara i'i tə mba, ya ətsəu, nja ngyar madləɓa tang wi nda ənda nda.>> 11 Ngə ndər ɓəla nya lakur gu mələm nda tə bəziya mafakə nda, ngə nja gwa dəkar tə patla təl. 12 Ngə təl tə hya'atə əvu'i ga nar nyi nə njirawawa'a nyi bəra, <<Yo dəkar hi sə ngə njir Aram tə mərtə mən nga. A zəndətə nda huɓə kwa tə mən, aka ənga nda ngyar mbwar tsəmdzə ga ki mbuta nda ku lya wua, ndo har ku jigadəma kənda bəra, <Kəpal da wa ndo zəbiya, ya kəl ba'a məna fa'atə nda na pi ba'a təra gu ta mələm.> >> 13 Ngə zhang ku huɗa njirawawa'a nyi tə wuma, <<A mən sə nji nda hətə taku tufə inga həyadzə ku ta mələm nga, ma a da nda mbəɗə wa, ndo ɗa wi həyadzə njir Isra'ila inda tə kuɗa. Aka ənga, mən sə nda məna la'a.>> 14 Aka ənga, nda ɗəmtsə charkaina mətləu ana taku kənda i'i, ana njir dləa. Ngə təl tə nar nyi nə njir dlə charkaina taku inda, <<Ma'i ma hya gwa'abiya sə nda tə ɗa.>> 15 Nda nəu nda tsa'a kwa nya Urdən, kəl nda la'a dzaki kə'i kar tlər inda njir Aram tə pənda tə mbwar hwi wazaɓai ku kala laku. Aka ənga, changhabal inda tə shili na labar nə təl. 16 Ngə njir Samariya tə biya ga ga fa'aya kwazhalɓi na kar inda tə mbwar tsəmdzə njir Aram nda. Ngə nja ghəya ɗəlnda upə zhizhə tasau zhang təkəra azurfa zhang, ana tasau mətlə nə səuhiuhi nda njo nga bale təkəra azurfa zhang, tang wi nda Tlakə tə na.
17 Gau ləvaləva nda ləhə dza təl ngə təl tə fiya ka ndər ɓəla nya lakur gu ta mələm, aka ɗangkura nji, nja dərəɓnda nyi ku lakur ya nya mələm nda, ngə cha tah, tang wi nda ndəkə Hyel tə nar nyi təl pəshir cha yo ki nyi nda. 18 A ɗatə wi sə nda ndəkə Hyel tə nar nyi nə təl bəra, <<Saka nənnə zəkə, njo ɗəlnda upə zhizhə tasau zhang təkəra azurfa zhang, ana tasau mətlə nə səuhiuhi nda njo nga bale təkəra azurfa zhang a nya lakur gwa Samariya.>> 19 Gau ləvaləva tə ɗaka nar nyi nə ndəkə Hyel bəra, <<La'a, mada Tlakə tə mbəɗiya kagapə huɗamələm ya, sə wi ngə kwa nau ɗa ya?>> 20 Ya təkəɗəu, əngə sə nda tə ɗa na cha, aka nji tə tə dərəɓnda nyi nya lakur gu ta mələm, ngə cha tah.