Nja Mbandə Hə'i Njir Shunam
8
1 Elisha tə nar nyi nə mala nda cha mbandə zər nyi nda bəra, Ma'i ma kə'i njir ki ngha hya ki ngyata hi nə bəji kushi'u tangnda hyo nawu, aka Tlakə kwa sətə huɓə shili tə hə'i na, fa məɗəfa.>> 2 Ngə mala nda tə mər wi nda ndəkə Hyel tə na. Cha təra nanda kə'i njir ki nyi ga gwa ngya fa məɗəfə tə hə'i njir Filisti. 3 A tə udiyar fa məɗəfə nə huɓə nda, cha ɓəl shili hya'atə tə hə'i njir Filisti ga yi gədi təl nja ɓəlandə nyi ki nyi ana hə'i. 4 Ma cha yi kəl janə təl kwa ɓwanya na Gehazi, kadakaliya ndəkə Hyel cho na, <<Par ɗa labar dəhə səshinshin inda Elisha tə məra.>> 5 Tang tə bəji nda Gehazi kwa dəkə ənda Elisha tə hya'andə ndə tətah, mala nda Elisha tə hya'andə zər nyi nda tə shili ka gədi təl ka ga nja ɓəlandə nyi ki nyi ana hə'i nyi. Ngə Gehazi tə na, <<Janə mala nda ma'a ja tlakə ɗa tələu, ya janə zər nyi nda Elisha tə hya'andə nda.>> 6 Ngə təl tə jau mala nda təkəra təkəɗər sə nda tə ɗa, ngə mala dəkar nyi. Ngə təl tə nga zhang ku huɗa njirawawa'a ləvaləva ga nar nyi, <<Ɓəlandə nyi dəhə sə nda nənyi, dəhə zhar nda nja uya tə fa nyi fwatə tə bəji nda cha ngyar hə'i na, tsa'a tə pəchi nə ənya na.>>Hazael tə Tsəya Ben Hadad
7 Elisha tə təra gwa Damaskus, ya Ben Hadad təl Aram da yiying wa. Nda nja nar nyi nə təl ənda, <<Ndəkə Hyel shili tə tangna,>> 8 ngə cha nar nyi nə Hazael bəra, <<Gwa'arə ga'a ka təra yada ndəkə Hyel. Jawar Tlakə təwa nyi, jawar nyi bəra, <Kwa mbə ya na shiləkə nə ya?> >> 9 Ngə Hazael tə təra yada Elisha, ana dləgwam fwaɗəkumnyi ana sə dəhə chul sə gumaguma nə Damaskus ka ga'a. Cha yi ga yi ta'i biyama nyi ga na, <<Zər nghə Ben Hadad təl Aram tə sə ɗa bəra, <Kwa mbə ya na shiləkə nə ya?> >> 10 Ngə Elisha tə wuma, <<Ma'i ka yi nar nyi, <Kəpal da wa ko mbəa> kəl ja Tlakə chabiya ɗa tə cho tah.>> 11 Elisha tə pəkə li cho ndzam Hazael, tə nda ɗa Hazael kw ngatə kuzhi. Ngə ndəkə Hyel tə ghəya tiwi. 12 Ngə Hazael tə jawa, <<Mya gwa'atə tlakə ɗa kwa tiwa?>> ngə cha wuma, <<Aka a zəndətə ya chul ɗimikur nda ko mərtə nyi nə njir Isra'ila. Ko hakəu hu'u ku mələm kənda inda na ɓangtili, ko kuɗənda nguli shili kənda na katsakər, ko huhuɓəya kəra ngilisha'a kənda ba'a titiya ta mahi'i huɗə kənda na katsakər.>> 13 Ngə Hazael tə na, <<Aman mava ngha, nda a da ndiya həya wa, kwa nau mərtə chul sə wi nga?>> Ngə Elisha tə wuma, <<Tlakə char ɗa tə ənda ko ɗa ka təl njir Aram.>> 14 Ngə Hazael tə ngyar Elisha ga ɓəl yada tlakə nyi. Nda Ben Hadad tə jawa, <<Mi Elisha tə nar ngha?>> Ngə Hazael tə wuma, <<Char nar ɗa kəpal da wa ko mbəa.>> 15 Kəl ja vanya zəkəu Hazael tə hətə sərtula ga chiu ku ɓiti, ga tuləu nyi ku huɗəma təl ngə cha tah. Ngə Hazael tə dləutsə cha cha ga ɗa ka təl.
Jehoram Təl Yahuda
16 Aku tufəkunya far təlkur Joram zər Ahab təl Isra'ila, ku bəji nda Jehoshafat ngə təl Yahuda, ngə Joram zər Jehoshafat tə ghəya səm təlkur Yahuda. 17 Fa nyi makərkumnyi parnya mətləu ma cha ɗa ka təl, cha səm təlkur vu Urshalima fa chisəu. 18 Cha nəu dərpər təl i'i nə Isra'ila, wi nda njir ki Ahab tə məra, aka cha hə kwar Ahab ka mala nyi. Cha mər sə ɗimi tə lya Tlakəu. 19 Dəhə ka ənga, aka mava nyi Dauda, Tlakə da i cha wazənda Yahuda wa. Aka cha mərtə nyi alkawal ənda ba'anawa, a təkəsə təlkur do tə ku nyavi Dauda wa. 20 Aku bəjir Jehoram, njir Edom tə tlə mwali nə njir Yahuda ga fiya təl kənda. 21 Aka ənga Jehoram tə yada Zayir ana dəhə charkaina taku nyi. Ngə njir Edom tə ɓandə nyi dəhə ka njir dlə charkaina taku nyi inda, kəl ja, cha hya'atə əvu'i ga hwibiya, ngə ləvaləva nyi i'i tə wiɗə kyo ki kənda. 22 Ba'a ənya na njir Edom kwa tlə mwali nə njir Yahuda. Aku bəji ngə tsə'u njir Libna tə tlə mwali nə njir Yahuda. 23 Dəhə alenya sə inda tə ɗa ku bəjir təlku Jehoram, ana dəhə sə nda cha məra, nja tsəfəbiya ku likatəkatə labar ka təl ka təl nə Yahuda. 24 Jehora tə tah, ngə nja haɗɨya nyi ka jival nyi ku mələm Dauda. Ngə zər nyi Ahaziya tə dləutsə cha cha ga ɗa ka təl.
Ahaziya Təl Yahuda
25 Aku kwabə mətləkunya far Jehoram zər Ahab təl Isra'ila ku təlkur, Ahaziya zər Jehoram təl Yahuda tə ghəya təlkur. 26 Fa Ahaziya mətləkumnyi parnya mətləu ma cha ɗa ka təl, cha səm təlkur vu Urshalima fa zhang. Tləmər ama nyi Ataliya, ajinya Omri təl Isra'ila. 27 Cha nəu dərpər njir ki Ahab ga mər sə ɗimi tə lya Tlakəu, wi nda njir ki Ahab tə məra, aka sələkənya njir ki Ahab cha. 28 Ahaziya tə daɓtəkər na Joram zər Ahab ka nda pah Hazael təl Aram vu Ramot Gileyad. Ngə njir Aram tə takasiya Joram. 29 Aka ənga Joram tə ɓəl yi Jezrel ga cha mbə na takas nda njir Aram tə takasiya nyi vu Ramot ku bəjir pah kənda ka Hazael təl Aram nda. Ngə Ahaziya zər Jehoram təl Yahuda tə təra yi Jazrel yada Joram zər Ahab, aka nja takasiya nyi.