Nja Dzəviya Jehu ka Təl Isra'ila
9
1 Ngə Elisha ndər mətakər tə nga vanya ndə ku huɗa dzuku njir mətakər ga nar nyi, <<Shikəu ləkutə gu gyarakən ngha, hatə təkə mal nə ka təra yi Ramot Gileyad. 2 Ma ka yi nda, ka gwa'a Jehu zər Jehoshafat, zər Nimshi. Ka yada cha ka yi nganda nyi tsa ka bazhi ma'i nyi ka təra na cha go vi da gwa. 3 Kəl ba'a ka pəu nyi mal ku kəra cha ka bəziya bəra, <Janə sə nda Tlakə tə na, a dzəviya tə ya ka təl təkəra njir Isra'ila.> Kəl ba'a ka mbəɗiya nyavi ka kusa təra na hwi. 4 Aka ənga zər tlakala nda ndər mətakər, tə təra yi Ramot Gileyad. 5 Nda cha dzəva, cha shili həya njirawawa'a ləvaləva ku tsəmdza, ngə cha na, <<Alvari, mafakə da tsa ya nə ngha,>> Ngə Jehu tə wuma, <<Wa ngə ko ɓwanya nə lya ea?>> Ngə cha ɓəlakə nyi, <<Nakə alvari.>> 6 Ngə Jehu tə hya'atə ga təra go ki. Ngə ndər mətakər tə pəu nyi mal ku kəra cha ga bəziya bəra, <<Janə sə nda Tlakəu, Hyel njir Isra'ila tə na, <A dzəviya nghə tə ya ka təl təkəra nji nda nə Tlakəu, njir Isra'ila. 7 Ka kuɗənda njir ki tlakə nghə Ahab, ya yo kinda səkur pənda mashi mava ɗa ndər mətakər ana mashi dəhə mavi'i Tlakə nda Jezebel tə pənda. 8 Dəhə njir ki Ahab kwa kuɗa. Yo kuɗənda kala nguli shili ki Ahab vu Isra'ila, mada mava ndara dimu. 9 Yo mərtə ki Ahab wi nda ya mərtə ki Jeroboam zər Nebat nda, ana wi ki Ba'asha zər Ahija. 10 Jezebel nənyi, həya i'i kwa ɗinya nyi aku mətla hə'i Jezreel, ya a ndə do haɗə nyi wa.> >> Ngə cha mbədiya nyavi ga təra na hwi. 11 Nda Jehu tə biya da kuvanyi njirawawa'a ləvaləva inda, zhang ku huɗa nda tə jau nyi, <<Dəhə sə tsa'atsa'a? Mi na shili na ndər məlləm nə da ka?>> Ngə Jehu təɓəlakə nyi bəra, <<Kwa zəndə hi chul ndə nga, ana ɓwanya nyi.>> 12 Ngə nda na, <<Gəzhi ka! Dəkar ea sə nda cha pəa.>> Ngə Jehu tə na, <<Janə sə nda cha nar ɗa, <Janə sə nda Tlakə tə na, a dzəviya nghə tə ya ka təl təkəra njir Isra'ila.> >> 13 Kəl ngə nda kusa səɗənda ləkutə kənda tə mbwar fə hi nə vi nda ga Jehu ma'i ti. Ngə nda mbəɗiya papam ga har kuraka nda ga na, <<Jehu ngə təl!>>Jehu tə Kuɗənda ka Joram ana Ahaziya
14 Ngə Jehu zər Jehoshafat, ajinya Nimshi tə ngəya nyi ləbam nə Joram. Aku bəji nda Joram kə'i njir Isra'ila kwa ɓəla Ramot Gileyad tsa Haziyel təl Aram da gwa na pah, 15 kəl ja, Joram ɓəltə shili Jezreel ka cha shili shilikə kəti takasə nda njir Aram tə takasiya nyi ku paha nda. Ngə Jehu tə nar nyi nə kuvanyi wawa'ar ləvaləva, <<Macha tsa'a hi na ya, ngwa hya da ngyar madawa həlbiyakər ku mələm na, cha təra gwa Jezreel cha gwa dəkar sənə ya ɓatliya nə wa.>> 16 Ngə cha gwata nyi ku charkaina taku nyi ga təra gwa Jezreel, aka Joram kwa ɓəlsar ku nda ya Ahaziya təl Yahuda təratə gwa da cha. 17 Nda ndər ɓəla mələm nda ta'i kyo jigəɗə vu Jezreel tə la'a ləvaləva Jehu kwa shili, ngə cha na, <<Ya la'a ləvaləva kwa shili.>> Ngə Joram tə na, <<Gwa'a ndər dlə taku ka sə nyi cha yi jawar nda bəra, <Aka piyarɗufə nə shili hi ja?> >> 18 Ngə ndər dlə taku nda təra yada Jehu ga yi nar nyi, <<Janə sə nda təl tə na, <Aka piyarɗufə nə shili hi ja?> >>Ngə Jehu tə ɓəlakə nyi, <<Mi ko mər na piyarɗufwa? Ma'i gwa hi ɗa.>> Ngə ndər ɓəla mələm nda nar nyi nə təl, <<Changhabal nda yi tə həya nda, kəl ja, a da cha ɓəl shili wa.>> 19 Ngə təl tə ɓəla sə mətləkunya ndər dlə taku. Nda cha yi ngə cha yi nar nda, <<Janə sə nda təl tə na, <Aka piyarɗufə nə shili hi ja?> >> Ngə Jehu tə ɓəlakə nyi, <<Mi ko mər na piyarɗufwa? Ma'i gwa hi ɗa.>> 20 Ngə ndər ɓəla mələm nda nar nyi nə təl bəra, <<A yitə cha dzən nda, kəl ja, a da cha ɓəl shili wa. Kəl ja, ndər nəu na dzuku kunyi kwa dlə charkaina taku wi ndər məlləm, tang wi nə Jehu zər Nimshi!>> 21 Ngə Joram tə na, <<Ɓatliya ɗa ma charkaina taku.>> Nda nja ɓatliya charkaina taku nda, ngə Joram təl Isra'ila ana Ahaziya təl Yahuda tə biya təra, kala ndə ku charkaina taku nyi, ka nda yi ɓə na Jehu. Nda həya nyi tə babal nabot ndə Jezreel. 22 Nda Joram tə la'a Jehu ngə cha jau nyi, <<Aku piyarɗufə nə shili kə zəma?>> Ngə Jehu tə ɓəlakə nyi, <<Aman piyarɗufə kwa ɗa, ba'a zawarkur ana mutiyakur ama nghə Jezebel ɗatə ɗangha?>> 23 Kəl ngə Joram tə shata nyi ga təra na hwi cho na nə Ahaziya bəra, <<Ahaziya, ləbam na!>> 24 Ngə Jehu tə ma'ubiya laga ga həya Joram na hafə dzər patləka cha. Ngə hafə nda dzaviya ɗufwa cha ngə dla ku ta charkaina taku nyi nda. 25 Ngə Jehu tə nar nyi nə Bidkar ndər dlə charkaina taku nyi bəra, <<Hətə gundəɓər dza cha vakənda tə babal Nabat ndər Jezreel nga. Ɗənghatə ənda naya ana nakə tə gədlə ada nyi Ahab na charkaina taku nda Tlakə pə nəna takər təkəra cha: 26 <Ənə ya la'a mashi nabot ana mashi zər nyi, ənghwandə Tlakəu.> Sakan ja, hətə nyi ka vakənda nyi tə babal nga, wi sə nda ɓwanya Tlakə tə na.>> 27 Nda Ahaziya tə la'a təl Yahuda tə la'a sə nda ɗa, ngə cha təra na hwi ku charkaina taku nyi təwa lakur yi Bet Hagan. Jehu tə gədlə nyi cho na, <<Tsəya nyi ma'a nacha!>> Nda takasiya nyi ku charkaina taku nyi ku lakur gi Gur ləhə dza Iblim, kəl ja, cha hwita nyi yi Magido ga yi tə hinda. 28 Ngə kadakaliya nyi i'i tə hətə nyi ku charkaina taku nyi gwa Urshalima ga gwa haɗiya nyi ku hu nji təltəl ku mələm Dauda. 29 Ahaziya tə ɗa ka ku kwaabəzhangkunya far Joram zər Ahab ku təlkur, Ahaziya tə ɗa ka təl Yahuda.
Nja Tsəya Jezebel
30 Nda Jezebel tə ngatə ənda Jehu dzəva tə vu Jezreel, ngə cha təu pinari ku lya cha, ga ləmnda kəra cha cho ndzam laku təwa kagapəu. 31 Nda Jehu tə gwa nya patla, ngə Jezebel tə nar nyi, <<Aku piyarɗufə nə ka shili ndər tsa ndə ya? Tang wi Zimri ka, nda tsəya tlakə nyi!>> 32 Ngə cha ndzamar gi təwa kagapə nda ga na, <<Wa biya hi ɗa?>> Ngə mətlə ndara makər inda a kiɗa nda da wa tə ndzamar nyi səya. 33 Ngə Jehu tə nar nda, <<Mbəliya nyi ma səya.>> Aka ənga nda mbəliya nyi səya, ngə mashi nyi tə pə dza bangu ana a dzər taku inda dərɓənda nyi inda. 34 Ngə Jehu tə təra go ki ga gwa səm ga sa. Ngə cha na, <<Zəndə ma nda hyo ɗa na mala shi'ushi'u nga, hya haɗiya nyi, aka kwar təl nga.>> 35 Kəl ja, nda nda biya ka ki haɗə nyi, a nda biya uya gundəɓər dza cha wa kə pəpənghər kəra cha ana ɗihir cha cha ana hya cha. 36 Ngə nda ɓəl ga gwa nar nyi nə Jehu, nda nar nda bəra, <<Janə sə nda Tlakə tə na təwa nya mava nyi Iliya ndər Tishbi: A tə babal vu Jezreel həya kwa ɗinya kumur dza Jezebel. 37 Njo wiɗənda kumur dza Jezebel wi kuɓə a hu'i tə babal vu Jezreel, tsa'aka a vanya ndə da kwa nau na, <Jezebel nə wa,> >>