Nja Kuɗənda Njir Ki Ahab
10
1 Nguli shili Ahab da məɗəfəkumnyi inda na ngya vu Samariya. Ngə Ahab tə tsəfətə kainau ga lətə gwa Samariya nə njirawawa'a Jezreel bəra, 2 <<Tərkus kainau nə kwa həya nghə ma'a nakə ngə na nguli tlakə ngha, ya charkaina taku ana taku ana mələm nda ku ɓangtili ana kar pah da tsa ka, 3 tabiya ndə nda ndiya mənakəu ya nji tə cha ka fəu nyi ku dzəga təlkur ada nyi. Ətsəu ka kanda nyi tsa njir dawa.>> 4 Kəl ja, ləvər tə səya nda ngə nda na, <<Macha a təl mətlə da kwa nau pah na cha wa ya, aman eo ɗana nauwa?>> 5 Aka ənga ngə gau nə ki nda, gwamna mələm nda, njirawawa'a ka nji nda təkəra nguli təl tə sətə nyi mafakə nə Jehu bəra, <<Naea mavi'i nghə ea ya eo mər kala sə nda ka na. A da eo fə madawa ka təl wa, mər sə nda ka la'a tə ɗa mənakə nə ngha.>> 6 Ngə Jehu tə tsəfətə mətləkunya kainau bəra, <<Macha a biyahi ɗa hi ya hyo nəu nya ya, tlanda ɗa ma kəra nguli tlakən hi hya shili həya ɗa nə vu Jezreel saka nənnə zəkəu.>> Nguli təl məɗəfəkumnyi inda, ku cha njirawawa'a mələm nda, inda kwa ɓəla nda. 7 Nda kainau nda dzəva, nji inda fa'atə nguli təl inda ga kuɗənda nda dəhə nda məɗəfəkumnyi nda. Nda pəu kəra nda ku tsəla ga lətə nyi nə Jehu vu Jezreel. 8 Nda changhabal tə dzəva, ga nar nyi nə Jehu, <<A shilitə nda na kəra nguli təl inda.>> Ngə Jehu tə na, <<Ɓutə nda ma biya ku lakur gu mələm kəl vu'i tə wura.>> 9 Vanya zəkə əmbudla Jehu tə biya. Cha ta'i mar dəhə nji ga na, <<A bikə da tsa hi wa. Naya nga mərtə nyi kwakunakur nə tlakə ɗa ga tsəya nyi, kəl ja ya, wa na kuɗənda dəhə nji ina? 10 Hya zəndi, a vanya ɓwanya da nda Tlakə tə pə təkəra ki Ahab da kəla kwa nyabiyadzə wa. Tlakə mərtə tə sə nda cha mər alkawal təwa mava nyi Iliya.>> 11 Aka ənga Jehu tə kuɗənda kala njir ki Ahab nda tə həyadzə vu Jezreel, dəhə ka njirawawa'a nyi, bazhi katə nyi i'i ana pərist nyi i'i, a ndə da cha ngyar na pi wa. 12 Ngə Jehu tə biya təra gwa təwa Samariya. A tə vanya mbwa nda njo nga Bet Eked nə njir ɓəla sərshishi, 13 cha ɓə ka alenya njikə Ahaziya təl Yahuda ga jawa, <<Nahi wa hya?>> Ngə nda na, <<Naea njikə Ahaziya ea, ea shili ka ga ea usar njir ki təl ana amanya təl na.>> 14 Ngə Jehu tə nar nyi nə nji nyi, <<Səya nda ma na pi!>> Aka ənga nda səya nda ga kuɗənda nda nya ka'ur ɓiti nə Bet Eked nanda fwaɗəkumnyi parnya mətləu. A ndə da cha ngyar na pi wa. 15 Ahir cha ngyar mbwa nda, cha shili təkəra Jehonadab zər Rekab, nda tə shili ka lali nyi. ngə Jehu tə usa nyi ga na, <<Ɗufwa kə dləukər na ya wi na'a nə ya?>> Ngə cha wuma, <<Naya Jehonadab na.>> Ngə Jehu tə na, <<Macha ənga, na'a cha ka.>> Ngə cha lətə nyi cha cha, ngə Jehu tə təɗəu nyi gyo charkaina taku. 16 Ngə Jehu tə na, <<Anda ka la'a ənda ya nə kərɗa nə Tlakəu.>> ngə nda təra ku charkaina taku nyi nda. 17 Nda Jehu tə shili vu Samariya, cha kuɗənda dəhə njir ki Ahab inda həyadzə hinda, cha kuɗənda nda məlməl na ɓwanya Tlakə nda Iliya tə pəa.Nja Kuɗənda Njir Həsəli nə Ba'al
18 Kəl ngə Jehu tə tsəmtə dəhə nji tə mbwarzhang ga nar nda, <<Ahab tə həsəli nə Ba'al kushiu, kəl ja, Jehu kwa həsəli 'ual'ual nə nyi. 19 Nga dəhə njir mətakər nə Ba'al, ana dəhə njir mər tlər nə Ba'al, ana pərist nyi. Ngwa mada ndə zhang da sa wa, aka yo i ya hatəmachi dəgal nə Ba'al. Kala ndə nda ngyar shili njo tsəya nyi.>> Kəl ja, dəma ngə Jehu kwa məra ga kuɗənda njir həsəli nə Ba'al. 20 Ngə Jehu tə na, <<Bəzəya ma ənda məno dzəviya pəchi ka həsəli nə Ba'al.>> Ngə nda bəzəya. 21 Ngə cha sə mafakə ku dəhə Isra'ila, ngə dəhə njir həsəli nə Ba'al tə shili, a vanya ndə da shong wa. Nda tsəmtədzə ku mbwa'alə Ba'al kəl nda a nyi fwatə na nda ba'a na nda. 22 Ngə Jehu tə nar nyi nə ndər ɓəla sər pə ləkutə həsəli, <<Zəbiya na ləkutə nə dəhə njir həsəli nə Ba'al.>> Ngə cha fa'abiya nda ləkutəu. 23 Ngə Jehu ana Jehonadab zər Rekab tə təra gu mbwa'alə Ba'al nda. Ngə Jehu tə nar nyi nə njir həsəli nə Ba'al inda, <<Ndzamar ma hya la'a a changhabal Tlakə da mada zhang tangnə kə'i hi wa kəl njir həsəli nə Ba'al.>> 24 Aka ənga nda təra gwa ka nda gwa hatəmachi ana hatəmachi nə nginda. Jehu piyatə nji chisəkumnyi ga nar nda, <<Ma kala ndə zhang lyahi tə ngya ndə zhang tə mbəɗa, pya hi təvira pya nda.>> 25 Tərkus Jehu tə wur na hatəmachi nə nginda, cha nar nyi nə njir tsakəra patla ana wawa'ar ləvaləva bəra, <<Ma'i ma gwa hya gwa kuɗənda nda, ngwa mada ndə zhang da mbəɗə wa.>> Aka ənga nda gwa gəganda nda na katsakər. Njir tsakəra patla inda ka wawa'ar ləvaləva inda tə fa'abiya gundəɓər dza nda inda ga təra gu mbwa'alə Ba'al nda gu vi nda da gwa. 26 Nda gwa zəbiya na hangu həsəli nə katə ku mbwa'alə Ba'al nda ga zəbiya nginda na hu'u. 27 Nda huhuɓənda hangu həsəli nə Ba'al nda ga wazənda mbwa'alə nyi, ngə a ɗa ka mbwa nda nji kwa nji kunyi ti. 28 Əngə Jehu tə wazənda Ba'al vu Isra'ila. 29 Madangə a da cha sha tsa mər səpəla'a chul nə Jeroboam zər Nebat wa, cha gwa'atə njir Isra'ila tə mər səpəla'a təwa həsəli nə zər dalu nə bəjingha vu Betel ana Dan. 30 Tlakə tə nar nyi nə Jehu, <<Aka ka mər sə mənakə təwa nyabiya sə nda tsa'atsa'a tə lya ya ga mərtə nyi dəhə sə nda ya har ku jigadəma ɗa yo nda mər nə njir ki Ahab, nyandəla ka kwa ngya ku dzəga təlkur Isra'ila tsa'a ku fwaɗəkunya zamin.>> 31 Kəl ja, kəra Jehu da nganda nyi cha ɓəlatə gadlagadla Tlakəu, Hyel njir Isra'ila na dəhə ɗufwa cha wa. A da sha tsa mər səpəla'a chul nə Jeroboam nda cha gwa'atə njir Isra'ila tə mər nda wa. 32 Aku hanyi inda Tlakə tə ghəya gwa'atə hə'i njir Isra'ila kwa ɗa kushi. Haziel tə ndiya dunamar njir Isra'ila ku dəhə hə'i kənda 33 fwatə təwa zədərpəchi nə Urdən ku dəhə hə'i Gileyad tsa'a vu Arower ku dakə dəl Arnon tahə Gileyad tsa'a vu Bashan. 34 Alenya sə inda tə ɗa ku bəjir təlkur Jehu, sə inda cha mər dəhəu, ana sə dəhə sə ina cha wurandi, nja tsəfəbiya ku likatəkatə labar ka təl ka təl nə Isra'ila. 35 Jehu tə tah, ngə nja haɗiya nyi vu Samariya. Ngə Ahaziya tə dləu cha cha ga ɗa ka təl. 36 Jehu tə səm təlkur vu Samariya fa mətləkumnyi parnya chisəu.