Ataliya ana Joash
11
1 Nda Ataliya amanya Ahaziya tə la'a ənda zər nyi təti, ngə cha hya'atə ga kuɗənda dəhə njir ki təl. 2 Kəl ja Jehosheba kwar təl Jehoram kwamənya Ahaziya tə hətə Joash zər Ahaziya ga həlbiya nyi ku huɗa nguli təl, nda njo gwa'a nja tsəya nyi. Cha pəu nda nanda na ndər ngya na cha ku vi hanyi ka chambunda nyi tsa Ataliya, aka ənga a da nja tsəya nyi wa. 3 Nda ngya tə mbu nanda na ndər ngya na cha nda ku mbwa'alə Tlakəu fa kwah ba'a Ataliya kwa səm təlkur tə hə'i nda. 4 Aku məɗəfkunya fa Jehoyada tə sə nja nga njirawawa'alə ləvaləva nə dzuku nji 100, njir Keret ana njir tsakəra ki təl shili ku mbwa'alə Tlakəu. Cha mbandər kə'i nda ga gwa'atə nda səmnda fəla ku mbwa'alə tlakə nda. Ngə char nda zər təl. 5 Cha tsau nda bar bəra, <<Janə sə nda hyo məra, aku dzuku makər nga hi nahi inda kwa ma'i kya nya tlər tə Pəchir Ngyaməngya, ma dzuku zhang tə wurandə tlər kənda, kəl ba'a hya təkəbiyadzə ka dzuku ka dzuku makərəu, dzuku zhang kwa ɓəla patla təl, 6 vanya dzuku kwa ɓəla nya lakur Sur, ana vanya dzuku tsə'u biyahir vanya dzuku nji inda kwa ɓəla lakur gu mbwa'ala, 7 dzuku mətlə inda pa'a kwa mər tlər Pəshir Ngyaməngya inda nda ɓəla mbwa'alə ga nda ɓəlatə təl. 8 Hya ɓandə təl, kala ndə na balmi nyi ku cha cha. Kala ndə nda ɗa ləhə dzən hi tuku hya tsəya nyi. Hya ɗa ləhə dza təl kala banda cho ma'i ti.>> 9 Njirawawa'a ləva ləva inda tə mər tang wi nda Jehoyada Pərist tə nar nda. Kala ndə tə fa'atə nji nyi, nji inda kwa ma'i kya nya tlər Pəshir Ngyaməngya ana nji indo biya ku tləra tə shili da Jehoyada pərist. 10 Ngə cha nə nyi masə nə njirawawa'a ləvaləva inda ana ləgə təl Dauda nda ku mbwa'alə Tlakə nda. 11 Ləvaləva inda kwa tsakəra təl inda, tə ɓandə təl kala ndə na balmi nyi ku cha cha ləhə dza dzəgana ana mbwa'alə nda, fwatə təwa holma tsa'a gwa təwa vwa nə mbwa'alə nda. 12 Ngə Jehoyada tə zəbiya na zər təl ga mbanda nyi kər, ga nə nyi tsəftsəfər mbandər nda ga bəziya nyi ka təl. Nda dzəviya nyi, ga tsəya nyi kapala ndo na, <<Pya ka təɗardzə tələu!>> 13 Nda Ataliya tə ngatə kurakə nda ləvaləva ka nji kwa pə nda, ngə cha yada nji inda ku mbwa'alə Tlakə nda. 14 Ma cha ndzamar kəl janə təl ta'i dza shimbal məlməl na ənda njo mər shi ku aji. Njirawawa'a ləvaləva ana njir mbəɗə papam tə ɓandə təl, dəhə njir hə'i nda kwa mər hirgyaɗi, ndo mbəɗə papam. Ngə Ataliya tanda ləkutə nyi ga səya ləla bəra, <<A dləuyatə nda təlkur tsa ya! A dləuyatə nda təlkur tsa ya!>> 15 Ngə Jehoyada pərist tə nar nyi nə njirawawa'a ləvaləva ka dzuku ka dzuku inda, <<Zəbiya ma na cha təwa pama ləvaləva hya tsəya kala ndə nda kwa nəu nyi na katsakər.>> Aka pərist natə ənda, <<Əngwa nja da tsəya nyi ku mbwa'alə Tlakə wa.>> 16 Aka ənga, nda səya nyi ga biya na cha təwa banda taku i'i kwa gwa tə patla təl ti, a tangnda nda tsəya nyi. 17 Ngə Jehoyada tə gwa'atə təl Joash ana nji nda mbandə na Tlakə ənda ndo ɗa ka nə Tlakəu. Ətsə'u cha gwa'atə təl ana nji tə mbandəra. 18 Dəhə nji tə təra yo mbwa'alə Ba'al ga yi wazənda. Nda huɓəya dzəgana i'i ana katə inda kəcha'a kəcha'a ga tsəya Matan pərist nə Ba'al a biyamar dzəgana.Ngə Jehoyada sətə njir ɓəla yo mbwa'alə Tlakə nda. 19 Ngə Jehoyada, ana njirawawa'a dzuku 100 nə ləvaləva, njir Keret, njir tsakəra təl ana dəhə njir hə'i nda, tə shili na təl hya'atə ku mbwa'alə Tlakə nda ga təra na cha səya tə patla təwa lakur gwa njir tsakəra patla. Ngə tə tə gwa ku dzəga təlkur nyi, 20 dəhə njir hə'i nda tsə'u tə mər hirgyaɗi. Mələm nda tə ɗa na piyarɗufəu ahir nja tsəya Ataliya na katskər tə patla. 21 Fa Joash məɗəfa, ma cha ghəya səm təlkur.