Joash tə Ɓatlətə Mbwa'alə nda
12
1 Aku məɗəfəkunya far Jehu ku təlkur, Joash tə ɗa ka təl, cha səm təlkur vu Urshalima fa fwaɗəkumnyi. Tləmər ama nyi Zibiya, hya'atə vu Beyersheba cha. 2 Joash tə mər sə nda tsa'atsa'a tə lya Tlakəu ku dəhə fa inda Jehoyada pərist kwa dlədləɓə nə nyi. 3 Dəhə ka ənga, tsə'utanyi mbwar nguɗə katə inda kyatə dəgəl inda, nji tə biyama na hatəmachi ana ngi sə inda kwa shi'uni kwitəkwitə kinda. 4 Ngə Joash tə nar nyi nə pərist i'i, <<Tsəmtə ma dəhə kwaba inda nja shili nə ka ga'a nda karti ku mbwa'alə Tlakəu, kwaba tsachi nə jiga nji, kwa nda kala ndə tə səmda fəla cho kinda ana kwa nda nja shili nə na ikur kənda ku mbwa'ala. 5 Kala pərist cha dləutsə kwaba tsa zhang ku huɗa njir gəzə məɗuwa, nja mər tlər nə ka ɓatlə kala sə nda səwa ku mbwa'ala. 6 Kəl ja, aku mətləkumnyi parnya makərkunya far təl Joash ku təlkur, pərist inda da taa ɓatlətə mbwa'alə nda wa. 7 Aka ənga təl Joash tə nga Jehoyada pərist ana alenya pərist inda ga jau nda, <<Mya gwa'atə a da ɓatlətə sə nda səwa ku mbwa'alə nda wa? Ngwa hya tsəu hə kwaba səkə ku məɗəwa wa, kəl nda macha ka ɓatlə mbwa'ala.>> 8 Ngə pərist inda dləukər ənda a tsəu ndo dləu kwaba tsa nji wa, ya a tsəu ndo ɓatlə mbwa'alə nda wa. 9 Ngə Jehoyada pərist tə hətə gwarara nda nja ɓatlə na wua, ga fiya dza dzəgana, tə chisəm ma ndo gu mbwa'alə Tlakə nda. 10 Ma sakanda nda la'a ənda kwaba ɗatə 'ual ku gwarara nda, ndər tsəfə tə patla təl ana gau pərist kwa jigabiya kwaba nda nja shili nə ku mbwa'alə Tlakə nda ba'a pəu ku mbəl. 11 Ma nda zəndəbiya ɗangkura cha, ndo nə nyi nə nji inda nja ɗəmtsə ka ndzam tlər mbwa'alə nda. Ana kwaba nda ndo kinda nji inda mər tlər mbwa'alə Tlakə nda, njir fiɗə wua ana njir həra, 12 njir hər bangu ana njir dzəɗə hangu. Ndo ɗəlbiya udzəm ndo dzəɗə hangu ka ɓatlə mbwa'alə Tlakə nda, ana nda kinda dəhə kwaba alenya sə inda njo gwa'a ka ɓəla ɓatlətə mbwa'alə nda səkəu. 13 A da nja tsəya kwaba zhang ku kwaba nda nja shili nə ku mbwa'alə nda ka ɓatlə kətas i'i nə silva, sər chi təkəsəu, kətas i'i, tələm i'i ana kətas bəjingha ndara nə silva wa. 14 Nja mər tlər na dəhə kwaba nda ka ki njir mər tlər mbwa'alə nda. 15 A da nda gwa'a nji inda nda nə nda kwaba ka ki njir mər tlər inda dəkar ənda nda tsəya kwaba nda wa, aka nda mər dəhə səu na jiri. 16 Kwaba inda nja shili nə ka hatəmachi nə hənda bikəu ana səpəla'a, a da nja shili nə mbwa'alə Tlakə wa, nə pərist inda nga. 17 Aku bəji nga Haziel təl Aram tə gi pah njir Gat ga kura. Ngə sha ka pah Urshalima. 18 Kəl ja, Joash tə fa'atə dəhə sə karti inda kə'i jival nyi təl Jehoshafat, təl Jehoram ana təl Ahaziya tə dzəviya, ana ga'a inda kərnyi tə dzəviya ana dəhə bəjingha nda nja uya ku məɗəwa mbwa'alə Tlkəu ana nə patla təl, ngə cha lətə nyi nə Haziel təl Aram. Ngə Haziel tə ngyar Urshalima. 19 Alenya sə inda tə ɗa ku bəjir təlkur Joash, ana dəhə sə inda cha məra, nja tsəfəbiya ku likatəkatə labar ka təl ka təl nə Yahuda. 20 Njirawawa'a patla nyi tə ɓatliya kwakunakur ga tsəya nyi vu Bet Milo, ku lakur səya Sila. 21 Njirawawa'a inda tsəya nyi nda nanda ingə Jozabad zər Shimeyat ana Jehozabad zər Shomer. Cha tah nja haɗiya nyi ka jival nyi ku mələm Dauda. Ngə zər Ahaziya tə dləutsə cha cha ga ɗa ka təl.