Jehoahaz Təl Isra'ila
13
1 Aku mətləkumnyi parnya makərkunya far Joash zər Ahaziya ku təlkur Yahuda, Jehoahaz zər Jehu tə ɗa ka təl Isra'ila vu Samariya, cha səm təlkur fa kwabəməɗəfa. 2 Cha mər sə ɗimi tə lya Tlakə təwa mər səpəla'a chul nə Jerobam zər Nebat, cha gwa'atə njir Isra'ila tə mər tsəu, a da cha sha tsa səpəla'a inda wa. 3 Aka ənga huɗa Tlakə tə tla tsa njir Isra'ila, fa ɗanghəu cha tləɗanda nda nə Hazel təl Aram ana zər nyi Ben Hadad. 4 Ngə Jehoahaz tə gədi kwambiyakur Tlakəu, ngə Tlakə tə səhimi da cha, aka a la'atə cha ɓwa'ɓwatə ɗimiɗimi nda təl Aram kwa nə nyi nə njir Isra'ila. 5 Aka ənga, Tlakə nə nyi ndər dləuya nə njir Isra'ila, ngə nda mbəɗə tsa gyalkur njir Aram. Əngə njir Isra'ila tə ngya ku ki kənda i'i wi nda haaɗa. 6 Kəl ja, a da nda sha tsa səpəla'a inda Jeroboam tə gwa'atə njir Isra'ila tə mər nda wa. Ətsəu, malamalar katə Ashera tə ngya vu Samariya. 7 ləvaləva Jehoahaz nda həyadzə a da ndiya, njir dlə taku tufəkumnyi, charkaina taku kuma ana ləvaləva ma'i na hi 10,000, aka təl Aram kuɗənda tə ga shandə nda wi bərbər. 8 Həyadzər sə inda tə ɗa ku bəjir təlkur Jehoahaz, sə inda cha məra ana sə inda cha uya, nja tsəfbiya ku likatəkatə labar ka tə ka təl nə Isra'ila. 9 Jehoahaz tə tah, nja haɗiya nyi vu Samariya. ngə zər nyi Jehowash tə dləutsə cha cha ga ɗa ka təl.Jehowash Təl Isra'ila
10 Aku makərkumnyi parnya məɗəfəkunya far Joash ku təlkur Yahuda, Jehowash zər Jehoahaz tə ɗa ka təl njir Isra'ila a vu Samariya, cha səm təlkur fa kwabəkwah. 11 Cha mər sə ɗimi tə lya Tlakəu, ya a da cha sha tsa kala səpəla'a nə Jeroboam zər Nebat nda cha gwa'atə njir Isra'ila tə mər nda wa, cha biyama na məra. 12 Həyadzər sə inda tə ɗa ku bəjir təlkur Jehowash, ana sə inda məra ana sə inda cha uya, nda tə həu ma'a pah nda cha pah Amaziya təl Yahuda nda, nja tsəfəbiya ku likatəkatə labar ka təl ka təl nə nji Isra'ila. 13 Jehowash tə tah, ngə nja haɗiya nyi ku hu nji təltəl nə Isra'ila, ngə Jeroboam tə dləutsə cha cha ga ɗa ka təl.
Tər Elisha Ndər Mətakər
14 Shiləkə nda tə yi na Elisha nya hu tə səya nyi. Joash təl Isra'ila tə səya tiwi təkəra cha cho na, <<Ada ɗa! Ada ɗa! Charkaina taku ana njir dlə taku nə Isra'ila!>> 15 Ngə Elisha tə na, <<Hətə laga ana hafa,>> ngə cha mər ənda. 16 <<Təɗəbiya laga nga,>>nda cha ndəɗabiya laga nda ngə Elisha tə fiya cha cha tə kəra təl. 17 Ngə cha na, <<Mbəɗiya kagapə ngə təwa zədərpəchi nga,>> ngə Elisha mbəɗiya. Ngə cha nar nyi <<Handa!>> Ngə cha handa. Ngə Elisha na, <<Hafə kura nə Tlakəu, hafə kura Aram! A kəpal da wa ko kuɗənda njir Aram vu Afek.>> 18 Ngə Elisha ɓəla na, <<Fa'atə hafə inga,>> ngə təl tə fa'ati. Ngə Elisha tə nar nyi, <<Həya hə'i na hafə nga.>> Ngə cha həya hə'i zhaka makər ga ta'i. 19 Ngə huɗa Elisha tə tla tsa cha ga na, <<Ma ka nda həya hə'i zhaka tufə ndara kwah, ko nda kura njir Aram pa'apa'a. Kəl ja, zhaka makər tanyi ko kura saka nga.>> 20 Elisha tə tah, ngə nja haɗiya nyi. Ləvaləva njir Mowab kwa maka dla'a hə'i nda ku kala səyar jwamən. 21 Vanya pəchi njo haɗə ndəu, kəl ngə nja la'a ləvaləva inda, ngə nja vakəu ndə tətə nda go hu Elisha. Nda ndə tətə nda tə tsəkar ɗihi Elisha, ngə ndə nda shivər ga hya'atə tə hya cha. 22 Haziel təl Aram tə nə nyi ɓwaɓwatə nə njir Isra'ila ku dəhə bəjir təlkur Jehoaza. 23 Kəl ja, Tlakə tə ɗa na ɗanghali nə nda ga ngatə təhuɗə kənda ga ɗənghatə na nda aka mbandə kənda na Ibrahim, Ishaku ana Jakop. Ba'a tə bəji na, a da cho i kuɗənda nda ndara cha gədlənda nda tə lya cha wa. 24 Haziel təl Aram tə tah, ngə zər nyi Ben Hadad tə dləutsə cha cha ga ɗa ka təl 25 Ngə Jehoash zər Jehoaza tə kura Ben Hadad zər Haziel ga ɓəla dləuya mələm inda Ben Hadad tə dləuya ku bəjir təlkur ada nyi Jehoaza. Jehoash tə kura nyi zhaka makərəu, ga ɓəlandə mələm inda nə njir Isra'ila.