Amaziya tə Ɗa ka Təl Yahuda
14
1 Aku mətləkunya far Jehoash zər Jehoahaz təl Isra'ila, Amaziya zər Joash təl Yahuda tə ghəya səm təlkur. 2 Fa nyi mətləkumnyi parnya tufəu macha ɗa ka təl, cha səm təlkur vu Urshalima fa mətləkumnyi parnya dləa. Tləmər ama nyi Jehoaddin, hya'atə vu Urshalima cha. 3 Cha mər sə nda tsa'atsa'a tə lya Tlakəu, kəl nda a da wi nda ada nyi Dauda tə mər wa. Ku dəhə səu cha nəu dərpər ada nyi Joash. 4 Kəl ja, a da nja wazənda mbwar həsəli inda kyatə dəgəl inda wa, nji tə biyama na htəmachi ana ngi sə inda kwa shi'uni kwitəkwitəu ki nda. 5 Ahir təlkur Ahaziya tə kukuyadzə, ngə cha kuɗənda njirawawa'a patla inda tsəya ada nyi. 6 Kəl ja, a da cha kuɗənda ngulisha'a kənda wa, məlməl na sə nda tsəfətsəfənyi ku Likatəkatə Gadlagadla Musa tangnda Tlakə tə na bəra, <<A da njo tsa ada i'i təkəra səpəla'a ngulisha'a kənda, ndara nja kuɗənda ngulisha'a təkəra səpəla'a njir yan nda wa.>> 7 Amaziya ngə tə kuɗənda njir Edom 10,000 aku dakə wuna ga dləuya mələm Sela ku dla'a, ga fəndzə nyi tləm Jokteyel, əngə njo mələm nda ba'a ənya. 8 Ngə Amaziya tə sə changhabal yada Joash zər Jehoaz, zər Jehu təl Isra'ila, ana ɓwanya dlinyarvi bəra, <<Shili ma ɓə li na li.>> 9 Kəl ja, Jehoash tə ɓəlakənyi nə Amaziya təl Yahuda bəra, <<Shikəɗi sətə nyi mafakə nə seda vu Lebanon bəra, <Nə nyi kwa nghə nə zər ɗa cha həbiya ka mala nyi.> Ngə kum takə vu Lebanon tə shili dərəɓənda shikəɗə nda na hya cha. 10 Jiri a kuratə kə Edom ga ɗa na həkər. A usakutə ka ana ka kura, kəl ja, ka ngya ku ki! Mya gwa'atə ko ta bwal nda kwa gwa'atə dla ngha ana nə Yahuda?>> 11 Kəl ja, Amaziya da səhimi wa, aka ənga Jehoash təl Isra'ila tə pah nyi. Nacha ana Amaziya təl Yahuda tə pah kərnənda vu Bet Shemesh vu Yahuda. 12 Njir Isra'ila tə kura njir Yahuda, ngə kala ndə tə təra na hwi kyo ki nyi. 13 Jehoash tə səya Amaziya təl Yahuda, zər Joash, zər Ahaziya, a vu Bet Shemesh. Ngə Jehoash tə təra gwa Urshalima ga gwa huɓənda ɓangtili Urshalima fwatə nya lakur Ifrem tsa'a tə məngun nə laku nda, babal kwa ɗa hi 600. 14 Cha fa'atə dəhə bəjingha ana azurfa ana dəhə sə inda ku mbwa'alə Tlakə nda ana ku məɗəwa patla təl. Ətsə'u cha fa'atə mavi'i ga ɓəl yi Samariya. 15 Alenya sə inda tə ɗa ku bəjir təlkur Jehoash, sə inda cha məra ana sə inda cha uya, dəhə ka pah kənda na Ahaziya təl Yahuda, nja tsəfətə ku likatəkatə labar nə ka təl ka təl nə Isra'ila. 16 Jehoash tə tah ngə nja haɗiya nyi vu Samariya tangnda nja haɗiya alenya təl Isra'ila. Ngə zər nyi Jeroboam tə dləu cha cha ga ɗa ka təl. 17 Amaziya zər Jeash təl Yahuda tə ngya fa kwabətufəu ahir tər Jehoash zər Jehoahaz təl Isra'ila. 18 Alenya sə inda tə ɗa ku bəjir təlkur Ahaziya, nja tsəfətə ku likatəkatə labar nə ka təl ka təl nə Yahuda. 19 Alenya nji vu Urshalima tə ɓatliya ɗimkur nyandəla Amaziya, aka ənga cha hwita nyi Lakish, kəl ja nda nəu nyi ga yi tsəya ni hinda. 20 Nja shili na gundəɓər dza cha na taku ga shili haɗiya nyi vu Urshalim tangnda nja haɗiya kə'i jival nyi ti, ku mələm Dauda. 21 Kəl dəhə nji tə fiya Azariya zər fa kwabəkwah ka təl təvira ada nyi Amaziya. 22 Nacha ngə ndə nda tə ɓəla hərtə Elat ahir tər Amaziya, ga ɓəla ɓəlandə shili tə kiɗa Yahuda səkəu. 23 Aku kwabətufəkunya far Amaziya zər Joash təl Yahuda ku təlkur, Jeroboam zər Jehoash təl Isra'ila tə ɗa ka təl Samariya, cha səm təlkur fa fwaɗəkumnyi parnya zhang. 24 Cha mər sə ɗimi tə lya Tlakəuga ngyar sha tsa mər dəhə səpəla'a Jeroboam zər Nebat, nda cha gwa'atə njir Isra'ila tə mər nda. 25 Nacha ngə ndə nda ɓəlandə gəla Isara'ila na Lebo Hamat wi nda cha haaɗa fwatə nya Fa'a Araba, wi sə nda Tlakəu, Hyel njir Isra'ila, təwa mava nyi Jona zər Amitai, ndər mətakər hya'atə vu Gat Hafa. 26 Tlakə la'atə ənda kala ndə vu Isra'ila, ndara mava ndara dimu kwa sa ɓwaɓwatə ɗimiɗimi, ya a ndər vala nda da wa. 27 Manda a Tlakə da tə na ənda cho zhazhinda tləmər Isra'ila pa'apa'a tə dunəya wa, cha mbəɗandə nda təwa Jeroboam zər Jehoash. 28 Alenya sə inda tə ɗa ku bəjir təlkur Jeroboam, ana dəhə sə inda cha məra, ana sə inda ləvaləva nyi tə uya dəhə ka ənda cha gwa'atə njir Isra'ila tə dləuya Damaskus ana Hamat tsa'akya'a nda haaɗa nə Yaudi inga, nja tsəfətə ku likatəkatə labar ka təl ka təl nə Isra'ila. 29 Jeroboam tə tah, ngə nja haɗiya nyi tangnda nja hadiya alenya təl Isra'ila. Ngə zər nyi Zakariya tə dləu cha cha ga ɗa ka təl.