2 Ka Təl 15

Azariya tə Ɗa ka Təl Yahuda

1 Aku fa mətləkumnyi parnya məɗəfəkunya far Jeroboam təl Isra'ila ku təlkur, Ahaziya zər Amaziya təl Yahuda tə ghəya səm təlkur. 2 Fa nyi kwabəkwah ma cha ɗa ka təl, cha səm təlkur vu Urshalima fa tufəkumnyi parnya mətləu. Tləmər ama nyi Jekoliya, hya'atə vu Urshalima cha. 3 Cha mər sə tsa'atsa'a tə lya Tlakəu, tang wi nda Amaziya ada nyi tə məra. 4 Dəhə ka ənga tsəutanyi mbwar nguɗə katə inda kyatə dəgaəl inda, nji tə biyama na hatəmachi ana ngi sə nda kwa shi'uni kwitəkwitə kinda. 5 Ngə Tlakə tə sətə nyi tə bibi tsa'a tə bəjir tə nyi, cha ngya ku vanya ki zhantanyi. Jotam zər təl tə ɗa ka gau patla ga nəu na njir hə'i nda. 6 Alenya sə inda tə ɗa ku bəjir təlkur Azariya, ana dəhə sə inda cha məra, nja tsəfə ku likatəkatə labar nə ka təl ka təl nə Yahuda. 7 Azariya tə tah nja haɗiya nyi ku mələm Dauda tangnda nja haɗiya kə'i jival nyi. Ngə zər nyi Jotam tə dləu cha cha ga ɗa ka təl.

Zakariya tə Ɗa ka Təl Isra'ila

8 Aku fa makərkumnyi parnya chisəkunya far Azariya təl Yahuda, Zakariya zər Jeroboam tə ɗa ka təl Isra'ila vu Samariya, cha səm təlkur hya kwah. 9 Cha mər sə ɗimi tə lya Tlakəu, wi nda ada nyi tə məra. A da sha tsa səpəla'a Jeroboam zər Nebat nda cha gwa'atə njir Isra'ila tə mər nda wa. 10 Ngə Shalum zər Jabesh tə ɓatliya ɗimikur nyandəla Zakariya. Cha pah nyi mart nji, ga tsəya ga dləutsə cha cha ga ɗa ka təl. 11 Alenya sə inda tə ɗa ku bəjir təlkur Zakariya nja tsəfətə ku likatəkatə labar nə ka təl ka təl nə Isra'ila. 12 Ana ənga ɓwanya Tlakə təwa Jehu nda tə na bəra <<Nyandəla ka kwa ngya ku dzəga təlkur Isra'ila tsa'a ku fwaɗəkunya zamin>> tə nyabiyadza.

Shalum tə Ɗa ka Təl Isra'ila

13 Shalum zə Jabesh tə ɗa ka təl ku makərkumnyi parnya dləkunya far Uzaya təl Yahuda, cha səm təlkur vu Samariya hya zhang. 14 Ngə Menahem zər Gadi tə hya'atə vu Tirza ga gi Samariya. Cha gi pah Shalum zər Jabesh vu Samariya, ga tsəya Shalum, ga ɗa ka təl. 15 Alenya sə inda tə ɗa ku bəjir təlkur Shalum, ana ɗimikur nda cha ɗa katsadala kwa nda, nja tsəfətə ku likatəkatə labar ka təl ka təl nə Isra'ila. 16 A tə bəji nda ghəya vu Tapuwa, Menahem tə pah Tapuwa ana kala ndə nda ku mələm ana mələm shiɗəɗə inda ləhə dzəri, aka nda ngyar dləukər na cha. Cha wazənda Tapuwa ga tətiya ta mahi'i huɗəu.

Manahem tə Ɗa ka Təl Isra'ila

17 Aku makərkumnyi parnya dləkunya far Azariya təl Yahuda ku təlkur, Manahem zər Gadi tə ɗa ka təl Isra'ila, cha səm təlkur vu Samariya fa kuma. 18 Cha mər sə ɗimi tə lya Tlakəu. Aku dəhəkura bəjir təlkur nyi a da sha tsa səpəla'a Jeroboam zər Nebat nda cha gwa'atə njir Isra'ila tə mər nda wa. 19 Ngə Pul təl Asiriya tə shili ka dla'a hə'i nda, ngə Menahem tə nə nyi talent nə azurfa 1,000 ga cha vala nyi təlkur nyi ɗa na dunama. 20 Menahem tə uya kwaba nga tsa njir gəna nə Isra'ila. Cha chiu dəhə njir gəna na tuku kala ndə cha kinda shekel azurfa tufəkumnyi nə təl Asiriya. Ana ənga təl Asiriya tə ɓəlta nyi yatə hə'i nyi. 21 Alenya sə inda tə ɗa ku bəjir təlkur Menahem, ana dəhə sə inda cha məra, nja tsəfətə ku likatəkatə labar nə ka təl ka təl nə Isra'ila. 22 Menahem tə tah nja haɗiya nyi. Ngə zər nyi Pekahiya tə dləu cha cha ga ɗa ka təl.

Pekahiya tə Ɗa ka Təl Isra'ila

23 Aku kwabətufəkunya far Azariya ku təlkur Yahuda, Pekahiya zər Menahem tə ɗa ka təl Isra'ila vu Samariya, cha səm təlkur fa mətləu. 24 Pekahiya tə sə ɗimi tə lya Tlakəu. A da sha tsa səpəla'a Jeroboam zər Nebat nda cha gwa'atə njir Isra'ila tə mər nda wa. 25 Zhang ku huɗa gau ləvaləva nyi na tləm Peka, zər Remaliya, ba'a njir Giliya tufəkumnyi tə ɓtliya ɗimikur nyandəla cha. Nda tsəya Pekahiya tsa'a na Argob ana Ariye ku patla nyi vu Samariya. Ana ənga Peka tə tsəya Pekahiya ga ɗa ka təl. 26 Alenya sə inda tə ɗa ku bəjir təlkur Pekahiya, ana dəhə sə inda cha məra, nja tsəfətə ku likatəkatə labar nə ka təl ka təl nə Isra'ila.

Peka tə Ɗa ka Təl Isra'ila

27 Aku tufəkumnyi parnya mətləkunya far Azariya təl Yahuda ku təlkur, Peka zər Remaliya tə ɗa ka təl Isra'ila vu Samariya, cha səm təlkur fa mətləkumnyi. 28 Cha mər sə ɗimi tə lya Tlakəu. A da sha tsa səpəla'a Jeroboam zər Nebat nda cha gwa'atə njir Isra'ila tə mər nda wa. 29 Aku bəji Peka təl Isra'ila, TiglatvPilesar təl Asiriya tə dləuya Ijon, Abel, Bet Maaka, Janowa, Kedesh ana Hazor. Cha dləuya Giliyad ana Galili, dəhə ka hə'i naftali, ga fa'atə dzəva Asiriya. 30 Ngə Hosheya zər Ela tə ɓatliya ɗimikur nyandəla Peka zər Remaliya. Cha pah nyi ga tsəya nyi, ga ɗa ka təl aku mətləkumnyi kunya far Jotam zər Uzaya. 31 Alenya sə inda tə ɗa ku bəjir təlkur Peka, ana sə inda cha məra nja tsəfətə ku likatəkatə labar ka təl ka təl nə Isra'ila.

Jotam tə Ɗa ka Təl Yahuda

32 Aku mətləkunya far Peka zər Remaliya ku təlkur Isra'ila, Jotam zər Uzaya təl Yahuda tə ghəya təlkur. 33 Fa nyi mətləkumnyi parnya tufə ma cha ɗa ka təl, cha səm təlkur vu Urshalima fa kwabəkwah. Tləmər ama nyi Jerusha kwar Zadok. 34 Cha mər sə inda tsa'atsa'a tə lya Tlakəu, tang wi nda ada nyi Uzaya tə məra. 35 Kəl ja, mbwar nguɗə katə inda kyatə dəgəl nda tsəutanyi, nji tə biyama na hatəmachi ana ngi sə inda kwa shi'uni kwitəkwitə kinda. Jotam tə ɓəla hərtə Nyavi Mbwa'alə nda da gi nda. 36 Alenya sə inda tə ɗa ku bəjir təlkur Jotam, ana sə inda cha məra, nja tsəfətə ku likatəkatə nə labar ka təl ka təl nə Yahuda. 37 Aku bəji nda ngə Tlakə sə Rezin təl Aram ana Peka zər Remaliya ka nda pah Yahuda. 38 Jotam tə tah, ngə nja haɗiya tangnda nja haɗiya ka jival nyi ti. Ngə Ahaz tə dləu cha cha ga ɗa ka təl.