Ben Hadad tə Pah Samariya
20
1 Ngə Ben Hadad təl Aram tə tsəmtə ləvaləva nyi. Ka təl ka təl makərkumnyi parnya mətləu, ana taku kənda ka charkaina taku kənda i'i tsə'u tsa'a na cha, cha ɓandə Samariya ga ɓatliya ka dla'a. 2 Ngə cha sə changhabal gu ta mələm gwa da Ahab təl Isra'ila. 3 Janə sə nda Ben Hadad tə na, <Azurfa nghə ka bəjingha ngha na'a inga, mahi'i nghə inda gumaguma ka ngulisha'a ngha, na'a inga.> >>4 Ngə təl Isra'ila tə wuma, <<Tang wi ngə ka na ngə tlakə ɗa, tələu. Naya ana dəhə sə nda tsa ya nənghə nga.>>
5 Ngə changhabal inda ɓəl səkəu ga yi nar nyi nə Ahab, <<Janə sə nda Ben Hadad tə na, <Ya sə ka na'a Azurfa ngha ana bəjingha ngha, ana mahi'i nghə ka ngulisha'a ngha. 6 Kəl ja, wi sakan zəkəu, yo sə njirawawa'a ɗa ya tə patla ngha ana kyo ki njirawawa'a ngha, ndo yi bakəbiya. Ndo dləuya dəhə sə inda na sakəda ba təra ni.> >>
7 Ngə təl Isra'ila tə tsəmtə dəhə njrawawa'a nə hə'i nda ga na, <<La'a ma ənda ndə nə kwa gwa'a mən na təmachi! Nda cha sə ka nja fa'atə nyi mahi'i ɗa ka ngulisha'a ɗa, azurfa ɗa ka bəjingha ɗa, a da ya ngyar nə nyi wa.>>
8 Ngə dəhə njirawawa'a inda ka nji inda tə wuma, <<Ngwa ka səhimi da cha ndara ka dləukər na sə inda cho gwa'a wa.>>
9 Aka ənga, cha ɓəlakə nyi nə changhabal Ben Hadad inda bəra, <<Nar nyi ma nə tlakə ɗa təl, <Mava nghə kwa mər dəhə sə inda ka gwa'a tangərma inda, kəl ja, nə ko gwa'a sakan na, a da yo nə nghə wa.> >> Ngə nda hya'atə ga ɓəl na wum yi nə Ben Hadad.
10 Ngə Ben Hadad tə ɓəla sə vanya mafakə nə Ahab bəra, <<Ga hyella tsəya ɗa ma a ya yi na nji ɗang ba'a yi wazənda Samariya, nda mada bərbər do həyadzə nda kwa nji ka kala ndə kwa uya zauchi wa.>>
11 Ngə təl Isra'ila tə wuma, <<Nar nyi ma bəra, <Əngwa ndə nda handzə kar pah da bu kərnyi wi ndə nda səɗənda wa.> >>
12 Nda Ben Hadad tə ngatə ngəna mafakə ku bəji nda ndo səm sərsum ku madləɓa kənda i'i, ngə cha nar nyi nə nji nyi, <<Ɓatliya ma ka ki dla'a.>> Aka ənga, nda ɓatliya ka ki dla'a mələm nda.
Ahab tə Kura Ben Hadad
13 Kəl vanya ndər mətakər tə shili da Ahab təl Isra'ila ga bəzəya bəra, <<Janə sə nda Tlakə tə na, <La'a tə hi ləvaləva ɗang ina? Yo nə hi nda ku cha hi ənya, ya hyo zəndə ənda naya ngə Tlakəu.> >>
14 Ngə Ahab tə jawa, <<Kəl ja ya, wa kwa nəu na nja?>>
Ngə ndər mətakər tə wuma, <<Janə sə nda Tlakə tə na, <Ləvaləva nguli duwal inda da kiɗa gau nə mətla i'i.> >> Ngə Ahab tə ɓəla jawa, <<Wa kwa ghəya pah nga?>> Ngə ndər mətakər tə wuma, <<Naka.>>
15 Aka ənga Ahab tə tsəmtə ləvaləva nguli duwal inda da kiɗa gau nə mətla i'i, nji 232 dəhə dəhəu. Ngə cha tsəmtə həyadzər njir Isra'ila, nji 7,000 dəhə dəhəu. 16 Nda gu laku pəchi tangkər, ba'a ka Ben Hadad ana ka təl ka təl makərkumnyi parnya mətlə inda kə'i cha inda, ku madləɓa kənda i'i ndo sa mbadla. 17 Nguli duwal ləvaləva tə biya tangərma.
Ben Hadad wurta sə nji inda tə shili na mafakə bəra, <<Wula nji kwa shili hya'atə vu Samariya.>>
18 Ngə Ben Hadad tə na, <<Macha ku piyarɗufə nda shili, fa'atə nda ma na pi, macha ka dla'a nda shili tsə'u, fa'atə nda ma na pi.>>
19 Ləvaləva nguli duwal tə ghəya biya ku mələm nda ana njir Isra'ila biyahin nda 20 ya kala ndə tə tsəya bazhi pah nyi. Ngə njir Aram tə təra na hwi, njir Isra'ila kwa gədlə nda. Kəl ja, Ben Hadad təl Aram tə hwi tanyi tə ya taku ana alenya nji nyi. 21 Təl Isra'ila tə ndiya dunamar njir Aram ga dləuya taku ka charkaina taku kənda, ga kuɗənda njir Aram ɗang gagaɗa.
22 Ahir ənga, ndər mətakər tə shili da təl Isra'ila ga na, <<Ɓatliya ləvaləva ngha, ka jigadəma mənakə təkəra sə nda ko kina məra, aka saka nənnə pəta, təl Aram kwa ɓəla shili pah ngha.>>
23 Ngə njirawawa'a nə təl Aram tə nar nyi, <<Katə kənda i'i, hyel nə dəgəl cha. Nacha gwa'atə nda ɗa na dunama matsa mən. Kəl ja, ma məna pah nda tə ɓya'ar hə'i, vəlvəl məno ndiya nda dunama. 24 Aka ənga, janə sə nda ko məra. Gədlənda dəhə ka təl ka təl makərkumnyi parnya mətlə inga, ka pətə njirawawa'a ləvaləva tə məngya kənda. 25 Ka tsəmtə ləvaləva wi inda nja kuɗənda inda, ana taku i'i wi inda haaɗa inda, ana charkaina taku i'i wi inda haaɗa inda, mən ki pah nda tə ɓya'ar hə'i. Kəpal da wa, məno ndəɗə dunama kənda.>> Kəl ngə cha dləukər na nda ga mərtə wi nda.
26 Nda fa ɓəla shili ngə Ben Hadad tə tsəmtə njir Aram nda təra gi Afek aka pah njir Isra'ila. 27 Nja tsəmtə njir Isra'ila ga nə nda kar pah, ngə nda biya ka nda ɓə kə'i nda. Njir Isra'ila tə tiyadzə dzuku mətlə wi nguli biri kua, ndo ndzamdzə kə'i nda, daɓə njir Aram tə wiɗiyadzə mada aman ku hə'i nda.
28 Ngə ndəkə Hyel tə shili nar nyi nə təl Isra'ila, <<Janə sə nda Tlakə tə na, <Aka njir Aram kwa har ənda Tlakəu hyel nə dəgəl cha, a da hyel nə dakə wa. Yo tləɗanda daɓdzər ləvaləva inə nə hi, ya hyo zəndə ənda naya ngə Tlakəu.> >>
29 Hanyi məɗəfa nda tiyadzə ndo ndzamdza, pəshir hanyi məɗəfəkunyi nda ghəya pah. Njir Isra'ila tə kuɗənda njir Aram 100,000 pəchi zhang. 30 Həyadzən nda tə hwi ta nda gu mələm Afek, tangnda ɓangtili tə dla səya kəra nji 27,000. Ben Hadad tsə'u tə hwita nyi gu mələm ga gwa mbuta nyi ku vi, a biyahir ki.
31 Ngə njirawawa'a nyi tə nar nyi, <<A ngatə tə ea, ənda təhuɗə nya ta ka təl ka təl nə njir Isra'ila. A mən ya da təl Isra'ila ana lukutə tata ku sara mən, ana pa da wulya mən. Ndara tsə'u cha ngya nghə na pi.>>
32 Aka ənga nda mbau lukutə tata ku sara nda ga hatə pa da wulya nda, nda yada təl Isra'ila ga yi na, <<Mava nghə Ben Hadad tə na, <Maki ngya ɗa na pi.> >>
Ngə təl Ahab tə wuma, <<Tsəutanyi na pi ya? Nacha ya, wi zamə ɗa cha.>>
33 Ɗəɗəm ma'a sə nda ndo i nda ngatə nga, ngə nda dləubiya ku nya cha bəra, <<Ah, zamə nghə ngə Ben Hadad!>> Ngə təl tə na, <<Ma'i ma hya ki shili na cha.>> Nda Ben Hadad tə shili, ngə Ahab tə nar nyi cha gyo charkaina taku nyi.
34 Ngə Ben Hadad tə nar nyi, <<Yo ɓəlandə nghə mələm inda ada ɗa tə dləuya tsa ada ngha. Ko nau fiya mbwar shafəli nghə vu Dimaska, wi nda ada ɗa tə mər vu Samariya.>>
Ngə Ahab tə na, <<A təkəra ngəna mbandəra, yo ngya nghə ka təra.>> Aka ənga, cha mbandər na cha, ga ngya nyi cha təra.
Ndər Mətakər tə Tsə Ahab
35 Zhang ku huɗa nguli ndər mətakər tə nar nyi nə bazhi ma'i nyi təwa ɓwanya Tlakəu, <<Dəgə ɗa na balmi ngha,>> kəl ja ndə nda ngyari.
36 Aka ənga, ngə ndər mətakər nda na, <<Aka a da ka nəu nya Tlakə wa, tərkus ko hya'atə tangna, ləvari kwa tsəya ngha.>> Ahir ndə nda təra, ləvari tə həya nyi ga tsəya nyi.
37 Ngə ndər mətakər nda ɓə na vanya ndə ga nar nyi, <<Maki, dəgə ɗa.>> Ngə ndə nda dəgə nyi ga takasiya nyi. 38 Ngə ndər mətakər nda biya ta'itanyi nya laku cho səkə təl. Cha baɗənda huɗəma cha na pahuɗə mbakər nyi. 39 Nda təl kwa tərabiya, ngə ndər mətakər nda nga nyi, <<Mava nghə tə biya ki pah, kəl janə vanyi ndə tə shili na ɗa vanya ndə nda cha səya ku pah, ga nar ɗa, <Ɓəla ndə na. Ma cha dləuyadza, a təkəra pya ka, əngəwa ba'a ka kinda talent zhang nə azurfa.> 40 Kəl ja, aku bəji nda mava nghə ɓakəɓakəu, yi tangngə shili, ngə ndə nda hwita nyi.>>
Ngə təl Isra'ila tə na, <<Jangə ka pəbiya tə na nya ka, tlanda nyi nəuma nə kərnghə ja.>>
41 Ngə ndər mətakər nda kusa walnda sə ndo huɗəma cha nda, təma təl Isra'ila tə ngabiya ənda zhang ku huɗa njir mətakər nda. 42 Ngə cha nar nyi nə təl, <<Janə sə nda Tlakə tə na, <Ben Hadad, ndə nda ya na nja tsəya nda, ngə ka ngya nyi cha təra. Aka ənga, a təkəra pya kə ngani, pya nji nghə tsə'u, a təkəra pya nji nyi.> >> 43 Ngə təl Isra'ila tə təra yo ki nyi vu Samariya na huɗatla ɗimiɗimi.