Iliya tə Hwi yi Horeb
19
1 Ngə Ahab tə nar nyi sə inda Iliya tə mər nə Jezebel, ana ənda cha kuɗənda dəhə njir mətakər Ba'al na katsakər. 2 Ngə Jezebel tə sə changhabal yada Iliya nda nar nyi, <<Ga hyella tsəya ɗa ma a ya tsəya nghə wi ngə ka kuɗənda njir mətakər Ba'al ingə saka nənnə zəkə wa.>>3 Ngə ləvər tə səya Iliya ngə cha hwi na pya cha. Nda cha shili Biyersheba a vu Yahuda, ngə cha ngyar kadakaliya nyi tangnda, 4 nacha zhang tanyi cha ma'i pa'apəchi gwa dadil takəu. Ngə cha shili dza vanya wua ga shili ngya tanyi da kiɗi, ga pətlənya ka ga cha tah. Cha na, <<A nji ɗa tə əngə Tlakəu, dləutsə pya ya, a da ya ndiya jival ɗa inda tə kuɗə wa.>> 5 Ngə cha piya tanyi da kiɗa wu nda ga gu hanyi.
Ɗəɗəu tanyi kəl chama Hyel tə tsəka nyi ga na, <<Hya'atə ka səm sərsuma.>> 6 Ma cha ndzamari, kəl janə waina səlsəl kulkul na hu'u, ana salakam na ɓiti. Cha səm ga sa ga ɓəla piya tanyi səkəu.
7 Ngə chama Tlakə tə ɓəla shili mətləkunyi ga tsəka nyi ga na, <<Hya'atə ka səm sərsuma, ma əngə wa ma'i nə kwa ndiya dunama ngha.>> 8 Ngə cha hya'atə ga səm ga sa ga uya dunama. Cha ma'i hanyi fwaɗəkumnyi ɓupuchi fwaɗəkumnyi kəl nda cha dzəva Horeb, mə Hyel. 9 A tangnda cha gwa tanyi ku tləl ga hənda hanyi.
Tlakə tə Chabiya nyi Dzə nə Iliya
Ngə ɓwanya Tlakə tə shili nə nyi bəra, <<Minə ko mər tangna, Iliya?>>
10 Ngə cha ɓəlakə nyi, <<Tlakəu, Hyel Ndər Gyalkuru, wa'atanyi ya kwa nəu nghə tsa'anyata. Njir Isra'ila ngyartə mbandər ngha, ga huɓənda dzəgana nghə i'i, ga kuɗənda njir mətakər nghə na katsakər. Naya zhang ta ɗa na həyadza, ya janə ndo gwa'a nda tsəya ɗa tsə'u.>>
11 Ngə Tlakə tə nar nyi, <<Ma'i ka gi ta'i tanghə kya tə mə nga a huɗə Tlakəu, aka Tlakə kwa gwa'a tərabiya.>>
Kəl ngə gyang dəgal dəgal nda na dunama tə shili ga tiya mə nda tahəu, ga huhuɓəya hangu inda huɗə Tlakəu, kəl ja, Tlakə nda ku gyang nda wa. Ahir gyang nda kəl ngə hə'i tə dzədzi, kəl ja, Tlakə nda ku dzədzər hə'i nda. 12 Ahir dzədzər hə'i nda, kəl janə hu'u, kəl ja, Tlakə nda ku hu'u nda wa. Ahir hu'u nda kəl jan kurakə ɗəhhəu. 13 Nda Iliya ngati, ngə cha tuləu ləkutəu nyi ku huɗəma cha ga biya ta'i tanyi nya tləl nda.
Ngə kurakə nda tə nar nyi, <<Minə ko mər tangnə Iliya?>>
14 Ngə cha ɓəlakə nyi, <<Tlakəu, Hyel Ndər Gyalkur dəhəu, wa'atanyi ya kwa nəu ngha tsa'anyata. Kəl ja, njir Isra'ila ngyar tə mbandər ngha, ga huɓənda dzəgana nghə i'i, ga kuɗənda njir mətakər ngha na katsakər. Naya zhang ta ɗa na həyadza, ya janə ndo gwa'a nda tsəya ɗa tsə'u.>>
15 Kəl ngə Tlakə tə nar nyi, <<Ɓəl təwa laku nda ka shili kwa nda, ka təra gwa tə dadil takə Dimaska. Ma ka dzəva, ka dzəviya Hazayel ka təl təkəra njir Aram. 16 Ətsəu, ka dzəviya Jehu zər Nimshi ka təl təkəra njir Isra'ila, ka dzəviya Elisha zər Shafat hya'atə vu Abel Mehola tsə'u, ga cha dləutsə cha ka, cha ɗa ka ndər mətakər. 17 Jehu kwa tsəya kala ndə nda mbəɗə tsa katsakər Hazayel, Elisha tsə'u kwa tsəya kala ndə nda mbəɗə tsa katsakər Jehu. 18 Dəhə ka ənga, ka zəndə ənda nji 7,000 da vu Isra'ila, inda undya nda da taa uzhi nə katə Ba'al, ndara nda gaɓə Ba'al wa.>>
Nja Nga Elisha
19 Ngə Iliya təra yi nda ga yi həya Elisha zər Shafat. Cho kuɓə na tla zwa kwabəmətləu, nacha na kərnyi kwa zwa na kwabəmətləkunya tla zwa nda. Iliya tə yada cha ga yi səɗənda lukutə nyi ga chuliya nyi da wulya Elisha. 20 Ngə Elisha tə ngyar tla zwa inda ga nəu Iliya. Ngə cha na, <<Əngwa ya gaɓətə ada ɗa ana ama ɗa ga ya nar nda kəl vanya pəchi, ma dzəgwa təra.>> Ngə Iliya tə ɓəlakə nyi, <<Ɓələu, a da yo katə nghə wa.>>
21 Aka ənga, ngə Elisha tə ngya nyi ga ɓələu. Ngə Elisha tsəɗəkər wulya təkəra tla zwa nyi inda. Ngə cha tagu kumkum nyi na gang dlakə tə wulya nda, ga təkənda nyi nə nji, ngə nda ɗinya. Ngə cha biya ga nəu Iliya ga ɗa ka kadakaliya nyi.