Iliya ana Obadiya
18
1 Ahir bəji 'ualəu, aku makərkunya fa nə tar par nda, ngə ɓwanya Tlakə tə shili nə Iliya bəra, <<Ma'i ka yi char nyi kərnghə nə Ahab, yo sətə par səya tə hə'i na.>> 2 Aka ənga, ngə Iliya tə təra yada Ahab.Ku bəji nda, huɓa ɗatə ual'ual vu Samariya, 3 ngə Ahab tə nga Obadiya, ndər tsakəra patla nyi. Aka Obadiya ndər ləvər Tlakə cha gagaɗa. 4 Ku bəji nda Jezebel kwa kuɗə njir mətakər Tlakə tə inda, Obadiya tə fa'atə njir mətakər 100 ga mbunda nda ku tləl mətləu, nji tufəkumnyi ku kala tləl, cha maka nə nda sərsuma ana ɓiti. 5 Ngə Ahab tə nar nyi nə Obadiya, <<Ma'i mada abari ku hə'i nga, ka zhultə dəhə tsədzəɗəu, ka dakə i'i. Ndara tsə'u ma uya sar ma mbəɗandə pya taku ka alfadari inga, tsa məna da tar kala zhang ku huɗa sərshishi kəmən.>> 6 Aka ənga, nda təkəbiya dza, kala ndə na laku nda cho nəuwa, Ahab kwa ma'i nənyi, Obadiya kwa ma'i nənyi.
7 Nda Obadiya kwa ma'i, ngə cha ɓə na Iliya. Ngə Obadiya tə ngabiya nyi, ngə cha uzhi səya hu'i ga na, <<Tlakə ɗa Iliya, vəlvəl nakə nə ja?>>
8 Ngə Iliya tə ɓəlakə nyi, <<Ah, ma'i ka ki nar nyi nə tlakə ngha, <Iliya tangna.> >>
9 Ngə Obadiya tə jawa, <<Mi sə ɗimi nda ya mər nda tə gwa'atə ko nə nyi ɗa nə Ahab ka cha tsəya ɗa? 10 A səmnda tə ya fəla na tləmər Tlakəu, Hyel nghə nda na pi, a vanya jul nji, ndara təlkur da, nda pa'a tlakə ɗa təl tə sə vanya ndə kya kwa, ka ki gwa'a nghə wa. Ya kala jul nji, ndara təlkur nda tə na a da kə tangnda wa, cho gwa'atə ndo səmnda fəla ənda, a da nda uya nghə wa. 11 Ya nacha ngə sakana ko nar ɗa, ya təra yada tlakə ɗa təl ya yi nar nyi bəra, <Janə Iliya shili ti?> 12 A da yo zəndə ba nda Shanguɗə Tlakə kwa təra na ka, ma ya ngya nghə wa. Ma ya yi nar nyi nə Ahab ya ngə a da cha uya nghə wa, cho tsəya ɗa. Madangə a zəndətə ka ənda mava nghə tə həsəli nə Tlakəu fwatə ku tlakalakur nyi. 13 Tlakə ɗaa, a da ka ngatə sə nda ya mər ku bəji nda Jezebel kwa kuɗə njir mətakər Tlakə inda ma? Ya ɗəwanda njir mətakər Tlakə 100 ku tləl pampam mətləu, nji tufəkumnyi ku kala tləl, ya nə nda sərsuma ana ɓiti. 14 Ya ngə ko nar ɗa sakana ya yada tlakə ɗa ya yi nar nyi bəra, <Janə Iliya shili ti?> Cho tsəya ɗa!>>
15 Ngə Iliya tə na, <<Səmnda tə ya fəla na tləmər Tlakə Ndər Gyalkur nda na pi, vəlvəl yo yi mar Ahab na kərɗa ənya.>>
Iliya kyo Mə Karmel
16 Aka ənga, Obadiya tə təra ga ki nar nyi nə Ahab, ngə Ahab tə təra ka cha ki ɓə na Iliya. 17 Nda Ahab la'a Iliya, cha nar nyi, <<Nakə ngə ja ndə nda təɗəkənyi ɓwaɓwatə nə njir Isra'ila?>> 18 Ngə Iliya tə wuma, <<A da naya nga təɗəkənyi ɓwaɓwatə nə njir Isra'ila wa, naka ana njir ki ada nghə nga təɗəkə nda ɓwaɓwatəu. Aka hya ngyar nəu tsaubar Tlakəu, ga nəu Ba'al i'i. 19 Sakan ja, nga dəhə njir Isra'ila nda həya ɗa kyo Mə Karmel. Ətsə'u, ka shili na njir mətakər Ba'al 450 inda, ana njir mətakər Ashera 400 inda Jezebel kwa nə nda sərsum inda.>>
20 Aka ənga, Ahab tə tsəmtə dəhə njir Isra'ila ana njir mətakər a kyo Mə Karmel. 21 Ngə Iliya tə biya ta'i biyamar nji inda ga na, <<Ba'a sakaman hyo ngya na kər mətləa? Macha Tlakə ngə Hyel, nəu nyi ma; kəl ja, macha Ba'al ngə Hyel, ba'a hya nəu nyi.>>
Kəl ja, nji inda da shau wa.
22 Ngə Iliya tə nar nda, <<Naya ngə səɗa ndər mətakər Tlakə nda tə həyadza, kəl ja, njir mətakər Ba'al nənyi 450. 23 Shili ma na gyal tla tsa'a mətləu. Nda tabiya zhang ka kərnənda, nda tlətla'u shiɗəɗə nda pətə gyatə shilə'u, kəl ja, ngwa nda handzə nyi hu'u wa. Yo ɓatliya vanya gyal tla nga, yo pətə gyatə shilə'u, kəl ja, a da yo handzə nyi hu'u wa. 24 Kəl ba hya nga tləmər hyel kəhi, naya tsə'u yo nga tləmər Tlakəu. Ma hyel nda tə wum na hu'u, nacha ngə Hyel.>>
Kəl ngə dəhə nji tə na, <<Sə ngə ka na ngə ɗatə mənakəu.>>
25 Ngə Iliya tə nar nyi nə njir mətakər Ba'al inda, <<Tabiya ma zhang ku pama gyal tla inga, hya ghəya ɓatliya tangərma, mangə ɗang hi. Hya nga tləmər hyel kəhi, kəl ja, ngwa hya handzə nyi hu'u wa.>> 26 Aka ənga, nda hətə gyal tla nda nja nə nda nda ga ɓatliya.
Ngə nda nga tləmər Ba'al fwatə mbudla ba'a nə pəchi tangkər. Ndo na na kurakə dzəgam dzəgaməu, <<Yawa Ba'al, wum nə ea!>> Kəl ja, a da cha sha'u wa, ndə da wum nə nda wa. Ngə nda utsa ndo ɓa dzəgana nda nda ɓatlətə nda.
27 Nda pəchi tə gi tangkər, ngə Iliya tə ghəya pə ɓwanya həyatəvi nə nda. Cha na, <<Har ma kuraka hi 'ual'ualəu! Vəlvəl hyel cha! kwa nau ɗa ku jigadəma dzuɗwakə cha, əngə wa ndara ku vanya tlər cha, ndara cha mər ma'i. Kwa nau ɗa tsə'u, ku hanyi cha, kəl nja hya'andə nyi.>> 28 Aka ənga nda go ləla na kurakə dzəgamdzəgamə, nda tsətsəɗiya dza nda na katsakər ka masəu, wi nda nda tsəlna məra, kəl mashi kwa pəa. 29 Nda biyama na pə kurakəu ba'a akəu tə bəjir hatəmachi nə akəu. Kəl ja, a ndə da shau wa, ya a ndə da nda wum nə nda ndara səhimi da nda wa.
30 Ngə Iliya tə nar nyi nə dəhə nji inda, <<Shili ma da ya tangnə ja!>> Ngə nda shili ɓandə nyi, ngə cha ɓatlətə dzəgana Tlakə nda nja wazənda nda. 31 Iliya tə ɗəmtsə hangu kwabəmətləu, zhang ka kala nyavi nə nyandəla Jakop, nacha nda Tlakə tə nar nyi bəra, <<Tləm nghə kwa ɗa ka Isra'ila.>> 32 Ana hangu inda cha hərtə dzəgana ku tləmər Tlakəu, ga ɓandə na gangam nda kwa nau hətə ɓiti shala gwadəl zhang. 33 Cha bərdləya shilə'u, cha tlətlau gyal tla nda shiɗəɗəu ga pətə gyatə kəra shilə'u nda. Ngə cha nar nda, <<Nyandə ma giɗa fwaɗə na ɓiti hya pəkər təkəra sər hatəmachi nga ana shilə'u inga.>>
34 Ngə cha na, <<Ɓəla ma pəkər mətləkunyi wi nda səkəu,>> ngə nda pəkəri.
Ngə cha ɓəla na, <<Ɓəla ma pəkər makərkunyi,>> ngə nda pəkəri. 35 Ngə ɓiti nda hwi səya hya'atə kya tə dzəgana nda ga nyandə ma'a gangam nda.
36 Tang tə bijir hatəmachi nə akəu, ngə Iliya ndər mətakər tə ya dzər dzəgana nda ga pətlənya bəra, <<Yawa Tlakəu, Hyel nə Ibrahim, Ishaku, ana Isra'ila, maki, mərtə nja zəndəbiya ənya, ənda nakə ngə Hyel vu Israila, ya naya tsə'u mava ngha, ya dəhə sə inə ya mər na, məlməl na ɓwanya nghə nani. 37 Wum na'a ja Tlakəu, wum na'a, məlna nji inə kwa zəndə ja, Tlakəu, ənda nakə ngə Hyel, ya təwa ənga, ko ɓəla shandə ɗufwa nda shili da ka.>>
38 Ngə hu'u hya'atə tsa Tlakə tə səya ga nginda sər hatəmachi nda, dəhə ka shilə'u inda, hangu inda ana hə'i, ga shi'ubiya ɓiti nda ku gangam nda.
39 Nda dəhə nji inda tə la'a sə nda, ngə nda piya puruɓə na ta nda hu'i ndo tiwi ndo na, <<Tlakəu, nacha ngə Hyel! Tlakəu, nacha ngə Hyel!>>
40 Ngə Iliya tə nar nda <<Səya ma njir mətakər Ba'al inga, ngwa hya da ngyar mada zhang hwi tanyi wa!>> Ngə nda səya nda, ngə Iliya tə təra na nda yo dakə Kishon, ga yi kuɗənda nda hinda.
41 Ngə Iliya tə nar nyi Ahab, <<Ma'i, ka ki səm ka sa aka jangə kuraka madegulɓa par kwa shili.>> 42 Aka ənga Ahab tə təra ka ki səm ana sa, kəl ja, Iliya tə təra gyo kəra Mə Karmel, ga gi uzhi hu'i ga mbuwu huɗəma cha ku pama undya cha.
43 Ngə cha nar nyi nə kadakaliya nyi, <<Ma'i ka yi ndzamar gwa təwa fa'a nga.>> Ngə cha təra ga yi ndzamari.
Ngə cha na, <<Sə da hinda wa.>>
Zhaka məɗəfa Iliya tə nar nyi <<Ɓəl yi.>>
44 Nda cha yi məɗəfəkunyi, ngə cha na, <<Ləmbəkə da tlaɓə wi huɗə cha ndəu kwa hya'atə kwa tə fa'a.>>
Ngə Iliya tə nar nyi, <<Ma'i ka ki nar nyi nə Ahab, <Ma'i go charkaina taku nghə tsa par da ba tsanda ngha.> >>