Salakə tə Nyaməna Iliya
17
1 Vanya ndər mətakər da na tləm nyi Iliya hya'atə vu Tishbi ku mələm Giliyad, tə nar nyi nə Ahab, <<Səmnda təya fəla na tləmər Tlakəu, Hyel njir Isra'ila nda na pi, ndə nda yo həsəli nə nyi, a tsə'u par da kwa təɗə ndara kuchikəpa tlə ku fa yiɗau ingo shili ngə wa, kəl ma ya na.>>2 Kəl ngə Tlakə tə nar nyi nə Iliya, 3 <<Ngyar mbwa na ka təra gwa təwa zədərpəchi, ka yi mbuta nghə ku dlələm Kerit, təwa zədərpəchi nə Urdən. 4 Ko uya ɓiti sa ku dlələm nda, a nar nyi tə ya nə salakə i'i nda nyaməna nghə hinda.>>
5 Aka ənga, Iliya tə mər sə nda Tlakə tə nar nyi. Cha təra gwa nya dlələm Kerit, təwa zədərpəchi nə Urdən, ga gwa ngya kunda. 6 Salakə i'i kwa shili na nyi gwazhilakəu ana kum mbudla na akəu, cho sa ɓiti tsə'u ku dlələm nda.
Vanya Malatəsal vu Zarefat
7 Ahir bəji kushiu ngə dlələm nda tə shi'ua aka a par da təɗə tə hə'i nda wa. 8 Kəl ngə Tlakə tə ɓwanya nə Iliya bəra, 9 <<Kusa təra yi Zarefat ku hə'i Sidon. A tsau nyi tə ya bar nə vanya malatəsal hinda ka cha nə nghə sərsuma.>>
10 Aka ənga cha təra yi Zarefat. Nda cha shili nya lakur gu mələm nda, kəl janə vanya malatəsal kwa gwah shilə'u. Ngə cha nar nyi, <<Kwa nau ka ɗaɗa ɓiti kushi ya satsə ya?>> 11 Nda cho ma'i ka cha ki shili na ɓiti nda, ngə cha nga nyi ga na, <<Maki ga ka shili na ɗa zər gwazhilakə tsə'u.>>
12 Ngə cha ɓəlakə nyi, <<Səmnda tə ya fəla na tləmər Tlakəu, Hyel ngha, gwazhilakə da tsa ya wa, kəl nda zər upə tsaɗə ku təməu, ana mal jevəu, a ku shikə mal. Nacha nə yo gwah shilə'u ka ya ki mərtə ea na zər ɗa, ea səmnya ea kuɗa.>>
13 Ngə Iliya tə nar nyi, <<Ngwa ka da ləvər wa. Ma'i go ki ka gwa mər wi ngə ka na nga. Kəl ja, ka ghəya mərtə ɗa waina tangərma ku sə nda tsa kə ka shili na ɗa, ka dzəgwa mərtə hi nəkəhi na zər ngha. 14 Aka janə sə nda Tlakəu, Hyel njir Isra'ila tə na, <Upə do wur ku təm nghə wa, ya mal do wur ku shikə mal nghə wa, tsa'a tə pəchi nda Tlakə kwa shili na par tə hə'i na.> >>
15 Ngə cha təra ga ki mərtə tang wi nda Iliya tə nar nyi. Aka ənga, Iliya ana mala nda ana njir ki nyi tə uya sərsum kala pəchi. 16 Aka upə nda ku təm nda da tə wur wa, ya mal da wur ku shikə nda tsə'u wa, tang wi nda Tlakə tə ɓwanya təwa nya Iliya.
17 Ahir biji kushiu ngə shiləkə tə səya zər malatəsal nda, ya kəl tsakə shiləkə ndo tsaka, ngə zər nda tah. 18 Ngə cha nar nyi nə Iliya, <<Mya daɓə ma na ka ndəkə Hyel? Ka shili ka ga ka ɗənghatə nyi səpəla'a ɗa nə Hyel, ana ka tsəya zər ɗa ya?>>
19 Ngə Iliya tə ɓəlakə nyi, <<Na'a zər nghə nga.>> Ngə cha dləutsə zər nda tsa cha, ga təra na cha gyo vi nda kya tə kəra vi nda cha na ngya kwa nda, ga gi pinda nyi tə gangər nyi. 20 Ngə cha tiwi nə Tlakəu, <<Yawa Tlakəu, Hyel ɗa, ka mi ka shili na chul nəna təmachi təkəra malatəsal nə yo ngya da cha na, ga gwa'atə zər nya tah?>> 21 Ngə cha piya tanyi ga ndəɗanda kərnyi təkəra zər nda zhaka makərəu, ga na, <<Maki Tlakəu, Hyel ɗa, ngyar pya zər na ɓəl shili!>>
22 Ngə Tlakə tə ngatə tiwi Iliya, ngə pya zər nda ɓəl shili, ngə cha zhəvəra. 23 Ngə Iliya tə hətə zər nda ga səya nə nyi nə ama nyi, ga nar nyi <<La'a, zər ngha na pi.>>
24 Ngə mala nda tə nar nyi nə Iliya, <<Sakan ja, a zəndə tə ya ənda ndəkə Hyel ka, ya ɓwanya Tlakə nda kwa biya ku nya ka, jiri.>>