16
1 Kəl ngə ɓwanya Tlakə tə shili nə Jehu zər Hanani təkəra Ba'asha bəra, 2 <<Ya hya'andə nghə ku bərbər ga fiya nghə ka gavərma nji ɗa Isra'ila, kəl ja, ka nəu dərpər Jeroboam ga gwa'atə nji ɗa Isra'ila tə mər səpəla'a. 3 Aka ənga, yo tsəya Ba'asha dəhə ka njir ki nyi, yo mərtə ki wi nə Jeroboam zər Nebat nda. 4 Həya i'i kwa ɗənya nji inda nə Ba'asha inda tə kuɗə ku ta mələm, ya eak inda biya huɗamələm kwa tsaku nji inda tə kuɗə ku hə'i nda.>>5 Həyadzər sə inda tə ɗa ku bəjir təlkur Ba'asha, ana sə inda cha məra, nja tsəfəbiya ku likatəkatə labar ka təl ka təl nə Isra'ila. 6 Ba'asha tə tah ngə nja haɗəya nyi vu Tirza. Ngə zər nyi Ela tə dləutsə cha cha ga ɗa ka təl.
7 Mafakə ngə tə shili nə Ba'asha ana njir ki nyi təwa ndər mətakər Jehu zər Hanani, aka dəhə sə ɗimi inda cha mər tə lya Tlakəu, ga gwa'atə huɗa cha tla təwa sə inda cha mər wi nə Jeroboam nda, ana tsə'u cha kuɗənda njir ki Jeroboam.
Ela tə Ɗa ka Təl Isra'ila
8 Aku mətləkumnyi parnya kwakunya far təlkur Asa təl Yahuda ku təlkur, Ela zər Ba'asha tə ɗa ka təl Isra'ila, cha səm təlkur vu Tirza fa mətləu.
9 Ngə Zimri zhang ku huɗa njirawawa'a nə nəu na charkaina Ela, tə haɓətə sə nya ndəla cha. Ku bəji nda Ela vu Tirza cha wi na mbadlə ku ki Arza, ndə nda dəgal təkəra patla vu Tirza. 10 Ngə Zimri tə səgwa dəgə nyi, ga tsəya nyi ku mətləkumnyi parnya məɗəfəkunya far Asa ku təlkur Yahuda. Ngə cha dləutsə cha cha ga ɗa ka təl.
11 Tərkusə cha ngya ku dzəga təlkur ga ghəya təlkur, cha kuɗənda dəhə njir ki Ba'asha. A da cha ngyar sə salsal mada zhang, ndara njikənda ndara bazhi nyi na pi wa. 12 Zimri tə kuɗənda dəhə njir ki Ba'asha, məlməl na sə nda ɓwanya Tlakə tə na təkəra Ba'asha təwa nya Jehu ndər mətakər. 13 Aka dəhə səpəla'a nda Ba'asha ana zər nyi Ela tə məra ga gwa'atə njir Isra'ila tə mər tsəu, tə gwa'atə huɗa Tlakəu, Hyel njir Isra'ila tə tla təkəra katə kəla sakəda kənda inda.
14 Həyadzər sə inda tə ɗa ana sə inda Ela tə məra, nja tsəfəbiya ku likatəkatə labar ka təl ka təl nə Isra'ila.
Zimri tə Ɗa ka Təl Isra'ila
15 Aku mətləkumnyi parnya məɗəfə kunya far Asa ku təlkur Yahuda, Zimri tə səm təlkur vu Tirza hanyi məɗəfa. Ləvaləva njir Isra'ila tə tsəmtədzə ləhə dza Gibeton, mələm njir Filisti. 16 Sakanda njir Isra'ila tə mbwar tsəmdzə nda, ngə nda ngatə ənda Zimri haɓətə tə sə nya ndəla təl ga tsəya nyi, ngə nda bəziya Omri, gau ləvaləva ka təl təkəra njir Isra'ila tə mbwar tsəmdzə nda pəshinda tanyi. 17 Ngə Omri ana dəhə njir Isra'ila inda kə'i cha tə ngyar Gibeton ga ɓandə Tirza. 18 Nda Zimri tə la'a dləuya tə nji mələm, ngə cha təra tanyi gu patla nyi, ga handzə nyi hu'u nə ki təl. Ngə cha tah, 19 aka səpəla'a nda cha məra, cha mər sə ɗimi tə lya Tlakəu, ga nəu dərpər Jeroboam, ana aka səpəla'a nda cha məra ga gwa'atə njir Isra'ila tə mər tsə'u.
20 Həyadzər sə inda Zimri tə məra, ana mwali inda cha tləa, nja tsəfəbiya ku likatəkatə ka təl ka təl nə njir Isra'ila.
Omri tə Ɗa ka Təl Isra'ila
21 Kəl ngə njir Isra'ila tə təkəbiyadzə mətləu, manyi kwa i Tibni zər Ginat cha ɗa ka təl, manyi tsə'u kwa i Omri cha ɗa ka təl. 22 Kəl ja, njir nəu Omri tə ɗa na dunama matsa njir nəu Tibni zər Ginat. Aka ənga, Tibni tə tah, ngə Omri tə ɗa ka təl.
23 Ku makərkumnyi parnya zhang kunya far Asa ku təlkur Yahuda, Omri tə ɗa ka təl njir Isra'ila, cha səm təlkur fa kwabəmətləu, aku fa inga cha səm təlkur fa kwah vu Tirza. 24 Cha ɗəlbiya dəgəl Samariya tsa Shemer təkəra talent mətlə nə azurfa ga hərtə mələm kya tə dəgəl nda, ga fəndzə nyi tləm Samariya, Shemer tləmər tlakər dəgəl nda ngə ɗakaɗa.
25 Kəl ja, Omri tə mər sə ɗimi tə lya Tlakəu ga mər səpəla'a ndiya matsa nji inda səm təlkur təvi nacha. 26 Cha nəu dəhə dərpər Jeroboam zər Nebat, ana chul səpəla'a nda cha gwa'atə njir Isra'ila tə məra, nda tə gwa'atə huɗa Tlakə tə tla təkəra katə kəla sakəda kənda inda.
27 Həyadzər sə inda Omri tə məra, ana sə inda cha uya, nja tsəfəbiya ku likatəkatə ka təl ka təl nə njir Isra'ila. 28 Omri tə tah ngə nja haɗiya nyi vu Samariya. Ngə Ahab tə dləutsə cha cha ga ɗa ka təl.
Ahab tə Ɗa ka Təl Isra'ila
29 Aku makərkumnyi parnya chisə kunya far Asa ku təlkur Yahuda, Ahab zər Omri tə ɗa ka təl təkəra njir Isra'ila, ngə cha səm təlkur vu Samariya təkəra njir Isra'ila fa mətləkumnyi parnya mətləu. 30 Ahab zər Omri tə mər sə ɗimi tə lya Tlakəu ndiya matsa kala ndə nda səm təlkur təvi nacha. 31 Manda sə kusə cha nənyi cha nəu dərpər Jeroboam zər Nebat, ngə cha həbiya Jezebel kwar Etba'al təl njir Sidon ka mala nyi, ga go həsəli ana mər tlər nə Ba'al. 32 Cha həriya nyi mbwa'alə nə Ba'al vu Samariya, ga hərtə dzəgana kwa. 33 Ətsəu, Ahab tə hərtə səlirma malamalar katə Ashera, ga mər sə inda tə tliya huɗa Tlakəu, Hyel njir Isra'ila, ndiya matsa dəhə təl inda tə səm təlkur təvi nacha.
34 Aku bəjir Ahab, Hiyel hya'atə vu Betel tə ɓəla hərtə Jeriko. Aku bəji nda cha səya hya hər nda, zə'ualə nyi Abiram tə tah, ku bəji nda cho fə sər haɗə nya mələm tsə'u, ngə adahir nyi Segub tə tah, məlməl na ɓwanya nda Tlakə tə pə təwa Joshuwa zər Nun.