Abija tə Ɗa ka Təl Yahuda
15
1 Aku kwabəchiskunya far Jeroboam zər Nebat ku təlkur Isra'ila, ngə Abija tə ɗa ka təl Yahuda, 2 cha səm təlkur vu Urshalima fa makərəu. Tləmər ama nyi Ma'aka kwar Abishalom.3 Cha mər dəhə chul səpəla'a inda ada nyi tə məra, a da cha ɗa kəriwa nə Tlakəu, Hyel nyi, wi nda Dauda jival nyi tə mər wa. 4 Kəl ja, aka nyida nda Tlakə kwa nyida Dauda, Tlakə tə nə nyi zər nda tə ɗa ka təl vu Urshalima nə Abija, zər nda dləutsə cha cha ga ɗa ka təl ga kukuya Urshalima. 5 Aka Dauda mərtə sə nda tsa'atsa'a tə lya Tlakəu, ya a nəubiya tə cha tsaubar Tlakə dəhə ku ngya nyi, kəl nda sə nda cha mərtə nyi nə Uriya ndər Hiti nda.
6 Aku dəhə ngyar Abija kəl pah tanyi ngə ku pama ka Rehoboam ana Jeroboam. 7 Həyadzər sə inda tə ɗa ku bəjir təlkur Abija, ana dəhə sə inda cha məra, nja tsəfəbiya ku likatəkatə labar ka təl ka təl nə Yahuda. Kəl pah tanyi ngə ku pama Abija ana Jeroboam. 8 Ngə Abija tah, ngə nja haɗiya nyi ku mələm Dauda. Ngə zər nyi Asa tə dləutsə cha cha ga ɗa ka təl.
Asa tə Ɗa ka Təl Yahuda
9 Aku mətləkumnyikunya far Jeroboam təl njir Isra'ila ku təlkur, Asa tə ɗa ka təl njir Yahuda, 10 cha səm təlkur vu Urshalima fa fwaɗəkumnyi parnya zhang. Tləmər aji nyi mala, nacha ngə Ma'aka kwar Abishalom.
11 Asa tə mər sə nda tsa'atsa'a tə lya Tlakəu, wi nda jival nyi Dauda tə məra. 12 Cha gədlənda shili inda kwa mər kasali ku vi katə tə hə'i nda, ga huhuɓənda katə inda kə'i jival nyi tə ɓatləti. 13 Cha hənda ma'a ama nyi Ma'aka tə mbwar ngya magirakur, aka cha ɓatlətə malamaar katə hiɗahiɗa nə Ashera. Asa tə gəganda katə nda ga nginda ku dakə Kidron. 14 Madangə a da cha fa'anda vi katə inda kya tə dəgəl inda wa, dəhə ka ənga Asa tə ɗa kəriwa nə Tlakə ku dəhə ngya nyi. 15 Cha fa'atə sə inda nja ɓatlə na azurfa ana bəjingha, ana alenya kar inda nda dzəviya nanda na ada nyi nda, shili ku mbwa'alə Tlakəu.
16 Kəl pah tanyi ngə ku pama Asa ana Ba'asha təl njir Isra'ila ku dəhə bəjir təlkur kənda. 17 Ba'asha təl njir Isra'ila tə pah Yahuda ga hərəu Rama ku ɓangtili tsa nja da biya ndara gwa ku hə'i Asa təl Yahuda.
18 Ngə Asa tə fa'atə dəhə azurfa ana bəjingha inda ku məɗəwa mbwa'alə Tlakəu, ana ku patla nyi. Cha tsau nyi ku cha njirawawa'a nyi, ga sə nda nə yi nə Ben Hadad zər Tabrimon, zər Heziyon, təl Aram, nda kwa səm təlkur vu Dimaska. 19 Ngə Asa tə na, <<Mən mbandər ku pama mən kə'i hi, wi nda tə ɗa ku pama ada ngha ana ada ɗa. La'a, janə yo lətə nghə ga'a nə azurfa ana bəjingha. Sakana ɓəlnda mbandər nghə na Ba'asha təl Isra'ila tsa'aka cho biya ku hə'i ɗa.>>
20 Ngə Ben Hadad tə dləukər na təl Asa, ga sə njir nəu na ləvaləva nyi nda yi pah njir Isra'ila. Nda kura Ijon, Dan, Abel Bet Ma'aka, Keneret ana dəhə mələm inda ku hə'i Naftali. 21 Nda Ba'asha tə ngatə sə nda tə ɗa, ngə cha ngyar hər Rama ga təra yi Tirza. 22 Ngə təl Asa tə sə kurakə nə dəhə njir Yahuda a vanya ndə da kəla kwa wa, ngə nda fa'anda hangu ka udzəm inda Ba'asha kwa mər tlər nə hinda, hya'atə vu Rama. Ngə Asa tə hərtə Geba a vu Banyami ana Mizpa na sə inda.
23 Həyadzər sə inda tə ɗa ku bəjir təlkur Asa, ana dəhə sə inda cha uya, ana dəhə sə inda cha məra, ana mələm inda cha hərti, nja tsəfəbiya ku likatəkatə labar ka təl ka təl nə Yahuda. Madangə ku halhalkur nyi shiləkə hi tə səya nyi. 24 Ngə Asa tə tah ngə nja haɗiya nyi ku mələm Dauda. Ngə zər nyi Jehoshafat tə dləutsə cha cha ga ɗa ka təl.
Nadab tə Ɗa ka Təl Isra'ila
25 Ngə Nadab zər Jeroboam tə ɗa ka təl njir Isra'ila aku mətləkunya far Asa təl Yahuda ku təlkur, ngə cha səm təlkur təkəra njir Isra'ila fa mətləu. 26 Cha mər sə ɗimi tə lya Tlakəu, ga nəu dərpər ada nyi Jeroboam, ga gwa'atə njir Isra'ila tə mər səpəla'a.
27 Ngə Ba'asha zər Ahija hya'atə ku nyandəla Isaka tə ɓatliya kwakunakur ka cha tsəya Nadab, cha tsəya nyi vu Gibeton mələm njir Filisti, ku bəji nda njir Isra'ila tə ɓandə na pah. 28 Ba'asha tə tsəya Nadab aku makərkunya far Asa ku təlkur Yahuda ga dləutsə cha cha ga ɗa ka təl.
29 Tərkus cha ghəya təlkur, cha kuɗənda dəhə njir ki Jeroboam. A da cha ngyar kala ndə nda kwa səpi wa, kəl ja, cha kuɗənda nda dəhə wi sə nda Tlakə tə na təwa nya mava nyi Ahija ndər Shilo. 30 Sə ngə tə gwa'atə huɗa Tlakəu, Hyel njir Isra'ila tə tla, aka səpəla'a inda Jeroboam tə məra, ga gwa'atə njir Isra'ila tə mər tsəu.
31 Həyadzər sə inda tə ɗa ku bəjir təlkur Nadab, ana dəhə sə inda cha məra, nja tsəfəbiya ku lukatəkatə labar ka təl ka təl nə Isra'ila. 32 Kəl pah tanyi ngə ku pama Asa ana Ba'asha təl Isra'ila ku dəhə bəjir təlkur kənda.
Ba'asha tə Ɗa ka Təl Isra'ila