Takər Ahija Təkəra Jeroboam
14
1 Aku bəji nda, shiləkə tə səya Abija zər Jeroboam, 2 ngə Jeroboam tə nar nyi nə mala nyi, <<Ɓatliya kərnghə ku laku nda a da njo ngabiya nghə ənda mala Jeroboam kə wa. Kəl ba'a ka təra yi Shilo. Ahija ndər mətakər hinda, ndə nda nar ɗa yo ɗa ka təl təkəra nji ina. 3 Ka hətə gwazhilakə takwara kuma, waina ana salakam mwamwa, ka ya da cha. Cho yi nar nghə sə ndo ɗa na zər ngha.>> 4 Aka ənga, mala Jeroboam tə mər sə inda cha na nda ga təra yo ki Ahija vu Shilo.Ahija tsə'u do la'a sə wa aka a haltə cha. 5 Kəl ja, Tlakə nar nyi tə nə Ahija bəra, <<Jangə mala Jeroboam kwa shili jau nghə təkəra zər nyi, aka a da cha yiying wa, ya ma cha shili, janə ənda ko wum nə nyi. Nda cha shili, cha shili mərtə kərnyi wi vanya mala ngə paməu.>>
6 Aka ənga, nda Ahija tə ngatə hya cha biya nya vi, ngə cha na, <<Səgwa, mala Jeroboam. Mya gwa'atə ka mərtə kərnghə əna? Nja sə ɗa na labar ɗimi nə ngha. 7 Ma'i, ka yi nar nyi nə Jeroboam ənda janə sə nda Tlakə tə na, <Ya tabiya nghə ku huɗa nji ga fiya nghə ka gavərma təkəra nji ɗa, Isra'ila. 8 Ya dləuya təlkur tsa ki Dauda ga nə ngha, kəl ja, a da kə wi mava ɗa Dauda wa, Dauda ngə ndə nda tə ɓəlatə tsaubar ɗa ga nəu ɗa na ta zhang, cho mər sə nda tsa'atsa'a tə lya ya. 9 A mər tə kə səpəla'a 'ual ndiya matsa nji inda səm təlkur təvi naka. Ka ɓatlətə nyi katə i'i nə kərngha, katə inda nja ɓatlə na lyang, ka gwa'atə huɗa ya tla, ngə ka ngya ɗa.
10 << <Aka sə nga, yo shili na təmachi təkəra ki Jeroboam. Yo kuɗənda dəhə nguli shili inda ku nyandəla Jeroboam vu Isra'ila, mavi'i ana dimur nji. Yo nginda ki Jeroboam wi ngə njo ngi kuɓwa, kəl nda wur dəhəu. 11 Həya i'i kwa ɗinya nji inda nə Jeroboam inda kuɗə ku ta mələm, kwadəga i'i tsə'u kwa tsakunya nji inda kuɗə ku hə'i nda. Naya Tlakə ngə tə na!> >>
12 <<Nakə nə ngha, ɓəl yo ki. Ma ko gu hə'i nda, zər ndo tah. 13 Dəhə njir Isra'ila kwa haɗiya nyi, ba'a sə'ingu nyi. Nacha ngə wur ndə nda njo haɗiya tsa'atsa'a ku huɗa nji inda nə Jeroboam, aka nacha ngə wur ndə nda Tlakəu, Hyel njir Isra'ila tə uya sə mənakə ku cha, ku ki Jeroboam.
14 <<Tlakə na kərnyi kwa fiya təl təkəra Isra'ila nda kwa kuɗənda njir ki Jeroboam. Ya sə ngə kwa ghəya na ɗa ənya, mada sakan ma'a. 15 Tlakə kwa tlanda nyi nəuma nə Isra'ila, tsa'aka cho dzədzə wi walang nya dəl. Cho təsənda Isra'ila tə hə'i mənakə nə cha nə nyi nə jival kənda na, ba'a wiɗənda nda biya tə ya Dəl, aka nda tliya huɗa Tlakə təwa ɓatlə malamalar katə Ashera. 16 Cho ngyar njir Isra'ila, aka səpəla'a nda Jeroboam tə məra, ga gwa'atə njir Isra'ila tə mər ma'a nanda.>>
17 Ngə mala Jeroboam tə hya'atə ga təra yi Tirza. Ma cho go ki nda ngə zər nda tah. 18 Nda haɗiya nyi, dəhə njir Isra'ila tsə'u tə sə'ingu nyi, wi nda Tlakə tə na təwa mava nyi Ahija ndər mətakər Hyel.
19 Alenya sə inda Jeroboam tə mər ku bəjir təlkur nyi, pah inda cha pah ana ənda cha mər təlkur, nja tsəfətə ku likatəkatə labar ka təl ka təl nə Isra'ila. 20 Jeroboam tə səm təlkur fa mətləkumnyi parnya mətlə ngə cha tah. Ngə Nadab zər nyi tə dləutsə cha cha ga ɗa ka təl.
Rehoboam tə Ɗa ka Təl Yahuda
21 Rehoboam zər Saloman ngə təl vu Yahuda. Fa nyi fwaɗəkumnyi parnya zhang ma cha ɗa ka təl, ngə cha səm təlkur fa kwabəməɗəfa a vu Urshalima, mələm nda Tlakə tə tabiya ku dəhə nyavi njir Isra'ila ka cha fiya tləm nyi kwa. Tləmər ama nyi Na'ama, nacha kwa Amon cha.
22 Njir Yahuda tə mər sə ɗimi tə lya Tlakəu. Təwa səpəla'a nda nda məra, nda hya'andə huɗətla nyi ndiya matsa nda jival kənda tə məra. 23 Nda ɓatliya nyi mbwar həsəli nə kərnənda, katə hərhəra ana malamalar katə Ashera kya tə kala dəgəl ana a da kiɗa kala wu nda na hyali tlələfəu. 24 Ana ma'a zawar shili nə vi katə da i'i a tə hə'i nda, nji kwa mər dəhə sə hiɗahiɗa nə alenya jul nji inda Tlakə tə gədlənda mar njir Isra'ila.
25 Aku tufəkunya far Rehoboam ku təlkur, ngə Shishak təl Masar tə dla'a Urshalima. 26 Cha fa'atə dəhə sər sakəda nda ku mbwa'alə Tlakə ana sər sakəda nda tə patla təl. Cha fa'atə dəhə səu, dəhə ka ləgə bəjingha inda Saloman tə batlətə inda. 27 Aka ənga, Rehoboam tə ɓatlətə ləgə ndzəa, ngə a ɗa təvira inda Shishak tə fa'atə nda, ga tsau ku cha njirawawa'a ləvaləva tsakəra patla, inda na tlər tə lakur gwa tə patla təl. 28 Kala bəji nda təl kwa yo mbwa'alə Tlakəu, kəl ləvaləva inda kwa tsakəra patla nda kwa fa'atə ləgə inda, ba'a nəu nyi ni, ahir ənga ba'a nda ɓəlandə gu vi njir tsakəra patla.
29 Alenya sə inda ɗa ku bəjir təlkur Rehoboam, ana dəhə sə inda cha məra, nja tsəfətə ku likatəkatə labar ka təl ka təl nə Yahuda. 30 Wa'atanyi, Rehoboam ana Jeroboam kwa pah. 31 Ngə Rehoboam tə tah, ngə nja haɗiya nyi ka jival nyi ku mələm Dauda. Tləmər ama nyi Na'ama, kwa Amon cha. Ngə Abija zər nyi tə dləutsə cha cha, ga ɗa ka təl.