Ndər Mətakər Hya'atə Vu Yahuda
13
1 Təwa tsaubar Tlakəu, ndər mətakər Hyel hya'atə vu Yahuda tə yi Betel, ku bəji nda Jeroboam ta'i dza dzəgana ka cha hatəmachi. 2 Ngə cha na, <<Nakə dzəgana, dzəgana! Janə sə nda Tlakə tə na: <Njo yah vanya zər ku nyandəla Dauda na tləm nyi Josaya. A tə ka, cho handa təmachi na pərist i'i, nə mbwar həsəli inda kya tə dəgəl, inda kwa hatəmachi tangnə sakana, a tə kə njo nginda ɗihi nji.> >> 3 Pəshinda tanyi ndər mətakər Hyel tə nə nda ba'ada bəra, <<Janə sə nda Tlakə tə na, njo wazənda dzəgana nga ba'a pənda pətsəɗə nda ti.>>4 Nda təl Jeroboam tə ngatə ɓwanya ndər mətakər Hyel nda təkəra dzəgana nda vu Betel nda, ngə cha char ndər mətakər Hyel nda na cha cha ga na, <<Səya nyi ma!>> Kəl ja, chi nda cha cha ndər mətakər nda tə ula, nda a tsə'u cho nau həya wa. 5 Ətsə'u, dzəgana nda waza, ngə nja pənda pətsəɗə pətsəɗənyi tang wi sə nda ndər mətakər Hyel tə na, təwa ɓwanya Tlakə nda.
6 Ngə təl tə nar nyi nə ndər mətakər Hyel nda, <<Pətlənya nə Tlakəu, Hyel ngha, cha mbandə cha ya na.>> Aka ənga, ndər mətakər Hyel tə pətlənya nə Tlakəu, kəl cha təl tə mbəa ga ɗa wi nda haaɗa.
7 Ngə təl tə nar nyi nə ndər mətakər Hyel nda, <<Mi təra kyo ki ka ki uya sərsum ka səma, yo nə nghə wazəbar sə nda ka mər tsə'u.>>
8 Kəl ja, ndər mətakər Hyel tə wum nə təl ga na, <<Mada ko na'a mar gəna ngha, a da yo ma'i na kə ndara ya səm sərsum ndara ya sa ɓiti tangnə wa. 9 Aka Tlakə tə tsau ɗa bar bəra, <Əngwa ka səm sərsum ndara ka sa ɓiti ndara ka ɓəl təwa laku nda ka shili tə wa.> >> 10 Aka ənga, cha gəziya vanya laku, a da cha ɓəl təwa laku nda cha shili ku Betel tə nda wa.
11 Ku bəji nda vanya ndər mətəkər halhal da na ngya vu Betel, nguli nyi tə shili dəkar nyi dəhə sə nda ndər mətakər Hyel nda tə mər tangnda pəshinda. Ətsə'u, nda dəkar nyi sə nda cha nar nyi nə təl. 12 Ngə adan nda tə jau nda, <<Laku manə nəu cha?>> Ngə nguli nyi tə char nyi laku nda ndər mətakər Hyel hya'atə vu Yahuda tə nəuwa 13 Aka ənga, cha nar nyi nə nguli nyi inda, <<Sətə ɗa lifarəu tə ya kwara nga.>> Manda nda sətə lifarəu tə ya kwara nda, ngə cha fəlti 14 ga nəu ndər mətakər Hyel nda. Ngə cha həya nyi tə ngya da kiɗa wur tuma ga jau nyi, <<Nakə ngə ndər mətakər Hyel hya'atə vu Yahuda ya?>>
Ngə cha wuma, <<Naya nga.>>
15 Aka ənga, ngə ndər mətakər halhal nda tə nar nyi, <<Mi təra yo ki ka yi səm sərsuma.>>
16 Ngə ndər mətakər Hyel tə na, <<A da yo ɓəl ka ya ma'i na ka, ndara ya səm sərsum ndara ya sa ɓiti na kə tangnə wa. 17 A nar ɗa tə nji təwa ɓwanya Tlakə bəra, <Əngwa ka da səm sərsum ndara ka sa ɓiti ndara ka ɓəl təwa laku nda ka shili tə wa.> >>
18 Ngə ndər mətakər halhal nda wuma, <<Naya ma'a ndər mətakər ya, wi ngə kə nga. Ya chama Hyel tə nar ɗa təwa ɓwanya Tlakə bəra, <Ɓəl na cha shili ku ki ngha tsa'aka cho səm sərsum ba'a sa ɓiti.> >> 19 Aka ənga, ngə ndər mətakər Hyel nda ɓəl tsa'a na cha ga ki səm sərsum ga sa ɓiti ku ki nyi.
20 Nda nda tə ngya ndo səm sərsuma, ngə ɓwanya Tlakə tə shili nə ndər mətakər halhal nda, 21 ngə cha na na kurakə dzəgamdzəgam nə ndər mətakər hya'atə vu Yahuda nda bəra, <<Janə sə nda Tlakə tə na, <Aka ka ngyar nəu nya Tlakə ga ngyar nəu tsaubar nda Tlakəu, Hyel ngha tə nə ngha. 22 Ngə ka ɓəl ga səm sərsum ga sa ɓiti tangnda cha nar nghə ngwa ka səm ndara sa wa. A da njo haɗə nghə ku hu nji kəhi wa.> >>
23 Nda ndər mətakər Hyel tə wur na səm ana sa, ndər mətakər nda shili na cha nda tə ɓəla sətə nyi lifarəu tə ya kwara nyi. 24 Nda cha ku laku, ngə nda ɓə na ləvari ku laku nda, ngə ləvari nda tsəya nyi, ga vakənda gundəɓər dza cha ku laku, ana kwara nda ba'a ləvari nda kya'a nda tə ta'i dzər gundəɓər dza cha nda. 25 Alenya nji inda kwa tərabiya tə la'a gundəɓər dza cha nda ku laku, ana ləvari ta'i dzəri, ngə nda təra ga gwa nar ku ta mələm ka ndər mətakər halhal nda.
26 Nda ndər mətakər halhal nda tə ngati, ngə cha na, <<Ndər mətakər Hyel nda ngyar nəu ɓwanya Tlakə nda nga. Tlakə ngə tə sə ləvari, ka cha pah nyi cha tsəya nyi, wi nda ɓwanya Tlakə tə nar nyi.>>
27 Ngə ndər mətakər halhal nda tə nar nyi nə nguli nyi <<Sətə ɗa ma lifarəu tə ya kwara,>> ya ngə nda mər ənda. 28 Ngə cha təra ga yi həya gundəɓər dza ndər mətakər Hyel nda, nja vakənda ku laku, ana kwara ba'a ləvari tə ta'i dzəri. A ləvari nda da ɗə ndə tətə nda ndara cha pah kwara nda wa. 29 Aka ənga, ndər mətakər halhal nda tə hətə gundəɓər dza ndər mətakər Hyel nda, ga fətə gya tə ya kwara, ga shili nə ku mələm nyi ka cha haɗiya nyi, cha sə'ingu nyi. 30 Cha haɗiya nyi ku hu kərnyi, ngə nda sə'ingu ndo na, <<Adda, zamə ɗa!>>
31 Ahir cha haɗiya nyi, cha nar nyi nə nguli nyi inda, <<Ma ya tah, haɗiya ɗa ma ku hu nə nja haɗiya ndər mətakər Hyel kwa na, hya piya ɗihi ɗa dza ɗihi nyi. 32 Aka mafakə nda cha pə təwa ɓwanya Tlakə təkəra dzəgana nda vu Betel, ana a təkəra dəhə vi katə inda kya tə dəgəl, ku mələm Samariya, kwa ɗa jiri.>>