Njir Isra'ila tə Tlə Mwali nə Rehoboam
12
1 Rehoboam tə təra yi Shekem, aka dəhə njir Isra'ila təra tə yi nda ka nda yi fiya nyi ka təl. 2 Nda Jeroboam zər Nebat tə ngatə ənga, ngə cha ɓəl shili hya'atə vu Masar, aka ku bəji nda, tsəutanyi vu Masar banda cha hwi tsa Saloman tə nda. 3 Aka ənga, ngə nda sə nja nga Jeroboam, kəl nacha ana dəhə daɓdzər njir Isra'ila tə təra ya da Rehoboam ga yi nar nyi, 4 <<Ada nghə tə nə ea ɓwaɓwatə ga lidiya ea, kəl ja, sakana, mərtə ɓwaɓwatə kəea cha ɗa kafəu, ka mərtə ngya kəea cha ɗa kusəu, naea tsə'u eo mər tlər nə ngha.>>5 Ngə Rehoboam tə wuma, <<Ma'i ma, ahir hanyi makər hya shili.>> Ngə nji inda tə təra.
6 Ngə təl Rehoboam tə ɓwanya kə'i njirawawa'a inda ɗaka mər tlər nə Saloman ada nyi nda. Ngə cha jawa, <<Aman yo kina wum nə nji inga?>>
7 Ngə nda wuma, <<Macha ko ɗa ka ndər mər tlər nə nji inga, kəl ba'a ka wum nə nda mənakəu, ndo ɗa ka nji ngha.>> 8 Kəl ja, Rehoboam tə ngyar dləukər sə nda njirawawa'a inda tə pə nda, ga ki jau nguli duwal məlnya nyi inda kwa mər tlər nə nyi. 9 Cha jau nda bəra, <<Mi sə nda hya na? Aman məno kina wum nə nji inə tə nar ɗa bəra, <Mərtə ea ɓwaɓwatə nda ada ngha tə fəu ea kwa nə cha ɗa kafa>?>>
10 Ngə nguli duwal inda hə kə'i cha nda tə nar nyi, <<Nar nyi nə nji inga na bəra, <Ada nghə tə fəu ea ku ɓwaɓwatəu, kəl ja mərtə cha ɗa kaf nəea,> nar nda, <Kəkəsə kwar cha ya, tsa sara ada ɗa. 11 Ada ɗa nə hi tə ɓwaɓwatəu, naya, yo nə hi ɓwaɓwatəu matsa nənyi. Ada ɗa tə dəgə hi na wuɗa, naya yo dəgə hi na idah!> >>
12 Ahir hanyi makər ngə Jeroboam ana dəhə nji inda, tə ɓəl shili da Rehoboam wi nda təl tə nar nda bəra, <<Ahir hanyi makər hya ɓəl shili.>> 13 Ngə təl tə ɓwanya nə nda na zandəra. Ga ngyar nəu sə nda njirawawa'a inda tə nar nyi nda, 14 ga nəu nə nguli duwal inda ga na, <<Ada ɗa nə hi tə ɓwaɓwatəu, yo nə hi ɓwaɓwatə matsa nənyi nda. Ada ɗa dəgə hi tə na wuɗa, naya yo dəgə hi na idah.>> 15 Ana ənga, təl da səhimi da gədi nji inda wa, aka Tlakə tə gwa'atə cha ɗa ənga, ga cha nyabiya ɓwanya nda cha pə nə Jeroboam zər Nebat təwa Ahija ndər hya'atə vu Shilo nda.
16 Nda njir Isra'ila tə la'a təl ngyar tə səhimi da nda, ngə nda wum nə təl bəra,
<<Mya həu ea na Dauda!
A mbaɗə da tsa ea tsa zər Jesi wa.
Njir Isra'ila, madawa ɓəl kyo madləɓa nyi!
Dauda, ka ɓəla ki ngha.>>
Aka ənga, ngə nji inda tə təra kyo ki. 17 Kəl ja, njir Isra'ila inda na ngya ku mələm Yahuda, Rehoboam tsəutanyi kwa səm təlkur təkəra nda.
18 Təl Rehoboam tə sə Adoniram, nda təkəra tlər tuku, kəl ja, dəhə njir Isra'ila tə vəvakənda nyi na hangu cha tah. Təl Rehoboam tə kusa gi tanyi ku charkaina taku nyi ga hwibiya gwa Urshalima. 19 Nacha gwa'atə fwatə ku bəji nda, njir Isra'ila kwa tlə mwali nə ki Dauda ba'a ənya.
20 Nda dəhə njir Isra'ila tə ngatə ənda Jeroboam ɓəl tə shili hya'atə vu Masar, nda sə nja nga nyi shili ku tsəmdza, ngə nda shili mbanda nyi kər ka təl təkəra dəhə Isra'ila. Kəlnda nyavi Yahuda ngə tə ɗa da kiɗa təlkur ki Dauda.
21 Nda Rehoboam tə shili vu Urshalima, ngə cha nga papatəkura nyavi Yahuda ana nyavi Banyami, ləvaləva 180,000 ka nda pah ki Isra'ila, ga nda ɓəlandə nda shili da kiɗa təlkur Rehoboam zər Saloman.
22 Kəl ja, ɓwanya Hyel tə shili nə Shemaya ndər mətakər bəra, 23 <<Nar nyi nə Rehoboam zər Saloman təl Yahuda, a nə dəhə nyavi Yahuda ana Banyami, ana a nə həyadzər alenya nji, 24 <Janə sə nda Tlakə tə na, ngwa ka da ki pah ka zamə nghə njir Isra'ila wa. Ɓəl kyo ki, aka naya nga gwa'atə sə ngə tə ɗa.> >> Aka ənga nda nəu ɓwanya Tlakəu ga ɓəl kyo ki, wi nda Tlakə tə na.
Jeroboam tə Ngyar Nəu Tlakəu
25 Ngə Jeroboam tə fəu Shekem mələm dəgəl dəgəl nə Ifərem ku ɓangtili, ga ngya tanyi tangnda. Ngə cha hya'atə tangnda ga ki fəu Peniyel ku ɓangtili.
26 Ngə Jeroboam tə nar nyi nə kərnyi, <<Təlkur na kwa nau ɓəl yo ki Dauda səkəu. 27 Ma nji inə tə gi hatəmachi kyo mbwa'alə Tlakə vu Urshalima, ɗufwa ndo ɓəl ya da tlakən nda Rehoboam təl Yahuda. Ndo tsəya ɗa ba'a ɓəl ta nda ya da təl Rehoboam.>>
28 Ahir cha ɓwanya na njir dəkə dəma nə nyi, ngə təl tə ɓatlətə zər tla nə bəjingha. Ngə cha nar nyi nə nji inda, <<Urshalima ɗatə naɗə tsa hi. Njir Isra'ila, janə ma hyel kəhi, nda tə zəbiya na hi zəbiya vu Masar ja.>> 29 Cha fiya zhang vu Betel, ana vanyi nda tsə'u cha fiya ku mələm Dan. 30 Sə ngə tə gwa'atə njir Isra'ila tə mər səpəla'a, nji kwa ma'i bətə yo mələm Dan ka nda yi həsəli hinda.
31 Jeroboam tə hərtə vi həsəli kyatə dəgəl i'i, ga fiya pərist i'i ku dəhə jul nji, madangə a da nda njir Levi wa. 32 Jeroboam tə fiya ladər tə hanyi kwabətufə nə hya chisəu, wi nda njo mər vu Yahuda, ga hatəmachi tə dzəgana. Cha mər əngə vu Betel, cho hatəmachi nə nguli tla inda cha ɓatlətə inda. A vu Betel cha fiya pərist i'i tsə'u tə mbwa inda cha ɓatlətə ka həsəli inda. 33 Pəshir hanyi kwabətufə nə hya chisəu, hya nda cha tabiya, cha handa təmachi tə dzəgana nda cha hərtə vu Betel nda. Əngə cha fiya nyi ladər nə njir Isra'ila ga təra ya tə dzəgana ka hatəmachi i'i.