1Ka Təl 11

Mahi'i Saloman

1 Təl Saloman tə hə mahi'i shilishili inda pa'a njir Isra'ila ɗanghəu, matsa kwar Fir'auna, cha hə mahi'i ku jul njir Mowab, njir Amon, njir Edom, njir Sidon ana njir Hiti. 2 Saloman tə hə mahi'i ingə hya'atə ku jul nji inda Tlakə tə nar nyi nə njir Isra'ila bəra, <<Ngwa hya da hə ku'i kənda wa, ya ngwa hya da ɗəunda nda ku'i kəhi wa, aka ndo nda gwa'atə hyo həsəli nə katə kənda.>> Dəhə ka ənga, Saloman kwa nyida nda. 3 Saloman tə hə ku'i təl i'i 700 ana kwatəra nyi 300 inda cha fiya ka mahi'i nyi, ngə nda gwa'atə cha shata nyi ga ngyar nəu Tlakəu. 4 Nda Saloman tə hala, mahi'i nyi tə shabiya ɗufwa cha, cha go həsəli nə katə i'i, ya a da cha zhaka nəu Tlakəu, Hyel nyi na dəhə ɗufwa cha, wi nda ada nyi Dauda tə mər wa. 5 Saloman tə go həsəli nə Ashtoret malamalar katə njir Sidon, ana Molek katə hiɗahiɗa nə njir Amon. 6 Saloman tə mər sə ɗimi tə lya Tlakəu, a da cha nəu Tlakə tsa'anyata, wi nda ada nyi Dauda tə mər wa.

7 Saloman tə hərtə vi həsəli nə Kemosh katə hiɗahiɗa njir Mowab, ana Molek katə hiɗahiɗa nə njir Amon, a kya tə dəgəl təwa təɗərpəchi nə Urshalima. 8 Əngə cha hərtə nyi mbwar həsəli nə dəhə mahi'i shilshili inda cha hə inda, ka nda maka hatəmachi i'i nə katə kənda i'i.

9 Ngə huɗa Tlakə tə tla tsa Saloman aka cha ngyar nəu Tlakəu, Hyel njir Isra'ila, nda chabiya nyi dzə zhaka mətləu. 10 Madangə Tlakə tsau nyi tə bar nə Saloman təkəra nəu katə i'i, kəl ja, Saloman da nəu tsaubar Tlakə wa. 11 Aka ənga, Tlakə tə nar nyi nə Saloman, <<Mangə sə nda mərakə ɗatə ɗimi, ya a da ka ɓəlatə mbandər ɗa ana ɓwanya ɗa inda ya tsau nghə bar nə wa, vəlvəl yo dləuya təlkur tsa ka ba'a nə nyi nə zhang ku huɗa njir mər tlər tə patla ngha. 12 Dəhə ka ənga, aka nyida nda ya nyida ada nghə Dauda, a da yo mər ku bəji nda kə na pi tə wa. Ku cha zər nghə yo da dləuya. 13 Madangə a da yo dləuya dəhə tsa cha wa, kəl ja, yo nə nyi nyavi zhang, aka nyida nda ya nyida ada nghə Dauda, ana aka Urshalima mələm nda ya tabiya.>>

Njir Dawa Saloman

14 Tlakə tə gwa'atə nja mər dawa na Saloman, ngə cha gwa'atə Hadad ndər Edom, hya'atə ku nyavi nji təl təl nə Edom tə tləya nyi mwali. 15 Nda Dauda kwa pah ka njir Edom, Joab gau ləvaləva, tə təra ki haɗə njir Isra'ila inda nja kuɗənda, nacha ana nji nyi tə kuɗənda dəhə shili inda vu Edom. 16 Joab ana dəhə njir Isra'ila tə ngya hinda hya kwah, kəl nda nda kuɗənda dəhə shili inda vu Edom. 17 Kəl ja, Hadad tə hwibiya yi Masar nanda kə'i alenya njirawawa'a nə Edom inda tə mər tlər nə ada nyi, Hadad zər cha ku bəji nda. 18 Nda hya'atə vu Midiyan ga təra yi Paran. Ngə nda mar alenya nji kə'i nda gwa Masar, ngə nda ya da Fir'auna təl Masar, ngə Fir'auna tə nə nyi ki nə Hadad ana hə'i ga nə nyi sərsum tsə'u.

19 Fir'auna tə mər hirgyaɗi na hadad gagaɗa, ngə cha nə nyi malbə nyi, kwamənya magira Tapenes, ka cha ɗa ka mala nyi. 20 Kwamənya Tapenes nda tə yiyah nyi zərsal ana tləm nyi Genubat, ngə Tapenes tə handə nyi tə patla təl. A tə patla nda, Genubat tə hə kə'i nguli Fir'auna.

21 Nda labar tə həya Hadad vu Masar ənda, Dauda tə ti, ana ənda Joab gau ləvaləva tə ti, ngə Hadad tə nar nyi nə Fir'auna, <<Ngya ɗa ya ɓəl ya tə hə'i ɗa.>> 22 Ngə Fir'auna tə jau nyi, <<Mi tar kə tangnə nda tə gwa'atə ko gwa'a ka ɓəl kya tə hə'i ngha?>> Ngə Hadad tə wuma, <<Sə da wa, kəl ja, ngya ɗa ya təra!>>

23 Ngə Hyel tə gwa'atə Rezon zər Eliyada, nda tə hwibiya tsa tlakə nyi Hadadezer təl Zoba, tə tliya nyi mwali nə Saloman. 24 Cha tsəmtə nji ga ɗa ka gavərma dzuku njir tlə mwali ku bəji nda Dauda tə kura njir Zoba nda, njir tlə mwali inda tə təra gwa Dimaska, tangnda nda ngyata nda ga fiya Rezon ka təl. 25 Rezon, ndər dawa njir Isra'ila cha ku bəjir Saloman, cha ɓəla tabwal matsa nə Hadad nda. Aka ənga Rezon tə səm təlkur təkəra Aram, ya a da cho i njir Isra'ila wa.

Jeroboam tə Tlə Mwali nə Saloman

26 Ətsə'u, Jeroboam zər Nebat tə tlə mwali nə təl Saloman. Zhang cha ku huɗa njirawawa'a nə Saloman, ndər Ifərem hya'atə vu Zereda, ama nyi malatəsal ana tləm nyi Zeruwa.

27 Ja inə labar mwali inda cha tləa: Saloman tə hərtə Milo ga hərbiya pam nda tə ɓangtili mələm Dauda ada nyi. 28 Jeroboam sal cha, nda Saloman tə la'a ənda tlər nyi nda cha mər mənakəu, ngə cha fiya nyi ka gau təkəra dəhə njir mər tlər tuku nə ki Yusufu.

29 Vanya pəchi Jeroboam kwa biya vu Urshalima, ngə Ahija ndər mətakər hya'atə vu Shilo tə həya nyi ku laku, ana taɗər daura dzə nyi, a ndə da tangnda wa, kəl nanda səkənda. 30 Ngə Ahija tə gəzəya taɗər daura nda dzə nyi nda ga tətau tlaɓə tlaɓə kwabəmətləu. 31 Ngə cha nar nyi nə Jeroboam, <<Fa'atə nyi kum nə kərngha, aka janə sə nda Tlakəu, Hyel njir Isra'ila tə na, <Yo dləuya təlkur ku cha Saloman ba'a nə nghə nyavi kuma. 32 Kəl ja, aka nyida nda yo nyida mava ɗa Dauda ana mələm Urshalima, nda ya tabiya ku huɗa dəhə ka nyavi ka nyavi nə Isra'ila, cho uya nyavi zhang. 33 Yo mər ənga, aka nda ngya ɗa ga həsəli nə Ashtoret malamalar katə njir Sidon, ana Kemosh katə njir Mowab, ana Molek katə njir Amon, a da cha nəu nya ya, ndara cha mər sə nda tsa'atsa'a tə lya ya, ndara cha ɓəlatə tsaubar ɗa ana gadlagadla ɗa, wi nda Dauda, adanya Saloman tə mər wa.

34 << <Kəl ja, a da yo dləuya dəhə təlkur tsa Saloman wa, yo ngya nyi cha səm təlkur ku dəhə ngya nyi aka nyida nda yo nyida mava ɗa Dauda, nda ya tabiya, nacha nda ɓəlatə gadlagadla ɗa ana tsaubar ɗa. 35 Yo dləuya təlkur tsa zər nyi ba'a nə nghə nyavi kuma, 36 yo nə nyi nyavi zhang nə zər nyi tsa'aka mava ɗa Dauda da kwa tar nyandəla cha nda kwa səm təlkur vu Urshalima, mələm nda ya tabiya ka ga ya fiya tləm ɗa kwa wa. 37 Ana ənga, naka, yo hətə ngha, ya ko səm təlkur təkəra dəhə sə nda ko chima, ko ɗa ka təl njir Isra'ila. 38 Ma ka mər kala sə nda ya tsau nghə bar, ga ma'i tsa'atsa'a ku laku ɗa, ga mər sə nda tsa'atsa'a tə lya ya, təwa ɓəlatə tsaubar ɗa ana gadlagadla ɗa, wi nda mava ɗa Dauda tə məra, yo ngya tsa'a na ka. Yo mərtə nyavi təlkur nghə kwa ngya ba'anawa wi nda ya mərtə nyi nə Dauda nda, ya yo nə nghə təlkur Isra'ila. 39 Yo tlanda nyi nəuma nə nyandəla Dauda aka səpəla'a Saloman, kəl ja, a da ba'anawa wa.> >>

40 Saloman tə gwa'a Jeroboam ka cha tsəya nyi, kəl ja, Jeroboam tə hwibiya gwa Masar, gwa da təl Shishak, ga gwa nygata nyi ku nda kəl nda Saloma tə tah.

Tər Saloman

41 Ngə nja tsəfəbiya həyadzər tlər Saloman, ana dəhə sə inda cha məra, ana dəma nyi, ku likatəkatə labar Saloman. 42 Saloman tə səm təlkur vu Urshalima təkəra dəhə Isra'ila fa fwaɗəkumnyi. 43 Ngə Saloman tə tah, ngə nja haɗiya nyi ku mələm Dauda. Ngə Rehoboam zər nyi, tə dləutsə cha cha ga ɗa ka təl.