Mala nda kwa Səm Təlkur vu Sheba
10
1 Nda mala nda kwa səm təlkur vu Sheba tə ngatə ənda Tlakə tə mərtə tləmər Saloman tə tiwi, ngə cha shili ka cha dzə nyi na Jau inda dza'u. 2 Cha shili Urshalima kə'i njir lə nyi ɗanghəu, ana dləgwam inda kwa hə kar yaji, bəjingha 'ualəu ana hangu daɗədaɗə i'i. Nda cha shili da Saloman, cha shili jau nyi təkəra dəhə sə inda ku jigadəma nyi. 3 Saloman tə wum dəhə jau nyi, a vanya sə da tə ɗa dza'u nə təl ka cho dəkəbiya wa. 4 Nda mala nda kwa səm təlkur vu Sheba nda tə la'a dəhə chul dəma Saloman ana patla nda cha hərtə nda, 5 ana sərsum nyi, ana ənda njirawawa'a nyi kwa ngya, ana kadakaliya nyi ku dzaki tlər kənda, ana njir hə ɗyaɗika nyi ana hatəmachi nə nginda inda cha mər ku mbwa'alə Tlakə nda, kəl cha mər məngəl 'ual'ualəu.6 Ngə cha nar nyi nə təl, <<Sə inda ya ngatə hya tə hə'i ɗa təkəra ngyakəngya ngha ana dəma nghə nda, vəlvələu. 7 Kəl ja, a da ya nənyi jiri nə labar nda wa, kəl nə ya shili la'a na lya ya na. Jiri a da nja dəkar ɗa mada manyi wa, aka dəma ngha ana gəna nghə ndiya tə sə nda ya ngati. 8 Vəlvəl nji ngha ana njir mər tlər nghə inda wa'atanyi huɗə ngha kwa səhimi da dəma ngha, tləhi mənakə uya nda ti. 9 Fal ngyatə nə Tlakəu, Hyel ngha, nda tə dləukər na ka, ga fəu nghə ku dzəga təlkur Isra'ila. Aka nyidar Tlakə nda ba'anawa nə njir Isra'ila, cha fiya nghə ka təl ga ka mər jiri ana jirikur ku nəuma nda ko məra.>>
10 Ngə cha nə nyi talents nə bəjingha 120 nə təl, ana kar yaji 'ualəu, ana hangu inda na səli. A vanya kar yaji da nja zhaka shili nə ɗang wi nda mala nda kwa səm təlkur vu Sheba tə nə nyi nə təl Saloman nda wa.
11 Param wawa'a i'i nə Hiram tə shili na bəjingha hya'atə vu Ofir, ətsə'u nda shili na udzəm almug ɗanghəu ana hangu inda na səli. 12 Ana udzəm almug nda ngə təl Saloman tə ɓatlə shimbal Mbwa'alə Tlakə nda ana patla təl, ətsə'u cha ɓatlətə gulum i'i ana zəmbəl i'i na udzəm almug nda ka njir na miya. A nji da taa la'a ndara nja uya udzəm almug wi nda səkə wa.
13 Təl Saloman tə nə nyi dəhə sə nda mala nda kwa səm təlkur vu Sheba nda tə gwa'a ndara jawa, matsa sə nda cha nə nyi ku gəna təlkur nyi. Ngə mala nda tə ngyar mbwa nda ga ɓəl kə'i mavi'i nyi ya tə hə'i kənda.
Gəna Təl Saloman
14 Kala fa, tədəɓəkura bəjingha nda təl Saloman kwa dləuwa, talent 666, 15 matsa tsachi njir shafili ana njir suku ana tsa dəhə təl nə Arabiya ana ngwamna i'i nə hə'i nda.
16 Təl Saloman tə ɓatlətə ləgə wawa'a 200, kala ləgə zhang nja ɓatlə nyi na bəjingha 600. 17 Ətsə'u cha ɓatlətə ləgə shiɗəɗə 300, kala zhang nja ɓatlə nyi na bəjingha 300. Ngə təl tə piya ku vanya vi nda njo nga Kubu Lebanon nda.
18 Kəl ngə təl tə hərtə dzəga təlkur na hira chiwar, ga ɓəsəndzə nyi bəjingha tsa'amunyi. 19 Mbwar fə hi gyo dzəga təlkur nda kwah, mbwar dəhə dagəryi tsə'u, kəra cha langlanghəu. Mbwar fə chi da təwa chisəm ana matsal, ana səlirma ləvari dzər kala zhang. 20 Səlirma ləvari kwabəmətlə tə mbwar fə hi kwah inda, zhang kyo ɓəlkər kala mbwar fə hi inda. A nja taa ɓatlətə vanya dzəga təlkur pabiya da nda tə vanya patla təl wa. 21 Dəhə ɗyaɗika təl Saloman ana bəjingha nja məra, ya dəhə kar tlər inda ku patla nda njo nga Kubu Lebanon, ana bəjingha tsa'amunyi nja məra. A sə da nda nja mər na azurfa wa, aka səlir azurfa kushi ku bəjir Saloman. 22 Param wawa'a nə shafəli da tsa təl a nya fa'a Tarshish tsa'a na nə Hiram. Zhang ku fa makər param wawa'a inda kwa maka shili na bəjingha, azurfa ana hira chiwar ana gadizhi ka bəlam.
23 Təl Saloman ndər gəna cha gagaɗa, ndər dəma cha tsə'u matsa dəhə alenya ka təl ka təl nə dunəya. 24 Dəhə dunəya kwa gwa'a laku ka shili səhimi da dəma nda Hyel tə nə nyi nə Saloman. 25 Kala ndə ndo shili, kwa shili na nyi ga'a nə sə inda nja ɓatlə na azurfa ana bəjingha, ka ləkutəu, kar pah ana kar yaji, ana taku i'i ana alfadari kala fa.
26 Saloman tə tsəmtə charkaina taku i'i ana taku i'i, Charkaina taku 1,400 ana taku 12,000 tsa cha, inda cha piya ku alenya mələm inda cha fiya ka tsəm charkaina taku nyi i'i, ana a vu Urshalima tsə'u. 27 Təl tə gwa'atə azurfa ɗa nyabə wi hangu vu Urshalima, wur seda tsə'u wi wur mbuɗa inda kya tə dəgəl Yahuda. 28 Njir shafili nə təl Saloman ngə kwa shili na nyi taku hya'atə vu Masar ana Kuye. 29 Ndo səgwa na charkaina taku vu Masar təkəra shekel azurfa 600, taku tsə'u təkəra shekel 150. Ətsə'u ndo təra nə nə dəhə ka təl ka təl nə njir Hiti ana njir Aram.