Tlakə tə Chabiyadzə nə Saloman
9
1 Nda Saloman tə wurandə hər mbwa'alə Tlakəu ana patla təl, ga wurandə dəhə sə nda cha chim ka cha mərti, 2 ngə Tlakə tə ɓəla chabiya nyi dzə nə Saloman, wi nda cha chabiya nyi dzə vu Gibiyon nda. 3 Ngə Tlakə tə nar nyi,<<A ngatə tə ya pətlənya ngha ana gədi nda ka mər huɗə ɗa, a dzəviya tə ya mbwa'alə nda ka hərtə ka mbwar həsəli na'a ba'anawa. Lya ya kwa ɗa tyakə tanyi təkəra mbwa'alə nga, ya ɗufwa ya kwa ɗa hinda.
4 Nakə tsəu, ma ka ma'i huɗə ɗa na ta zhang ku tsa'atsa'akur wi nda ada nghə Dauda tə məra, ka nəubiya dəhə tsaubar ɗa, ga ɓəlatə ɓwanya ɗa ana gadlagadla ɗa i'i, 5 yo chiya dzəga təlkur ngha, ko səm təlkur təkəra njir Isra'ila ba'anawa, wi nda ya mərtə nyi alkawal nə ada nghə Dauda ku bəji nda ya na, <A da ko tar ndə ku nyandəla kə nda kwa ngya ku dzəga təlkur Isra'ila wa.>
6 Kəl ja, ma naka ndara nyandəla ka, tə shata nda tsa ya ga ngyar ɓəlatə tsaubar ɗa ana ɓwanya ɗa inda ya nə ngha, ga təra ki nəu katəu ana həsəli nə nda, 7 yo fa'anda njir Isra'ila tsa hə'i nda ya nə nda, ya yo ngyar mbwa'alə nə ya dzəviya ka tləm ɗa na. Njir Isra'ila kwa ɗa ka sər gwa'a gyaɗi ana sər ngəl ku huɗa nji. 8 Mbwa'alə na kwa ɗa ka dəgəl kumbwa, kala ndə nda kwa tərabiya kwa saka'a kər cho na, <Mya gwa'atə Tlakə tə mərtə nyi chul sənə nə mələm na ana mbwa'alə nə əna?> 9 Nji kwa wum ndo na, <Aka nda ngyar Hyel Tlakən nda, nda tə zəbiya na jival kənda vu Masar, ga go nəu katəu, ndo həsəli nə nda, nacha gwa'atə Tlakə tə shili na dəhə chul nəna təmachi təkəra nda.> >>
Alenya Sə inda Saloman tə Məra
10 Aku udiyar fa mətləkumnyi nda Saloman tə mər ku hər mbwa'alə Tlakəu ana patla təlkur nda, 11 təl Saloman tə nə nyi mələm mətləkumnyi vu Galili nə Hiram təl Taya, Aka Hiram tə ɗaka nə nyi dəhə udzəm sedar ana fir ana bəjingha nda cha gwa'a ka hər nda. 12 Kəl ja, nda Hiram tə hya'atə vu Taya ka cha ki la'a mələm inda Saloman tə nə nyi inda, ma cha yi la'a, a mələm inda da ɗa mənakə nə nyi wa. 13 Ngə cha jawa, <<Chul mələm manə inə ka na'a zamə ɗa?>> Ngə cha nga mələm inda mələm Kabul, nacha ngə kəla sakəda, ya ba'a ənya əngə njo nga mələm inda. 14 Ngə Hiram tə sətə nyi talent nə bəjingha 120 nə təl.
15 Janə chul tlər tuku nda Saloman tə chiu nji kwa ku hər mbwa'alə Tlakə nda, patla nyi, Milloa ana ɓangtili Urshalima, ana ɓangtili mələm Hazor, Magido ana Geza. 16 Aka Fir'auna təl Masar kwasənya tə Geza na pah, ga handzə nyi hu'u. Cha kuɗənda njir Kan'ana, ga nə nyi mələm nda nə kwa nyi ga'a, ku bəji nda cha ɗəu ga hə Saloman nda. 17 Aka ənga Saloman tə ɓəla hərtə Geza, ga ɓəla hərtə Bet Horon, nda ku dakəu, 18 ana Ba'alat ana Tadmor nda tə dadil takəu ku mələm nyi, 19 ana tsə'u dəhə mələm məɗəwa Saloman ana mələm i'i nda cho pə charkaina nyi ana taku nyi kwa ana dəhə sə inda cha i cha hərtə vu Urshalima, Lebanon ana dəhə mələm inda da kiɗa təlkur nyi.
20 Dəhə həyadzər njir Amori, nji Hiti, njir Perizi, njir Hivi ana njir Jebusi inda pa'a nyandəla njir Isra'ila, 21 nacha ngə nyandəla nda inda tə həyadzə tə hə'i nda, inda pa'a njir Isra'ila tə kuɗənda, Saloman tə chiu nda ku tlər tuku ba'a ənya əngə nda. 22 Kəl ja, Saloman da shandə njir Isra'ila ka mavi'i wa, atəvira ənga alenya nji tə ɗa ka ləvaləva, alenya nji njirawawa'a, alenya nji tə ɗa ka gau ləvaləva nyi, njir dlə charkaina nyi, alenya nji tsə'u njir dlə taku. 23 Ətsə'u, Saloman tə fiya njirawawa'a təkəra tlər nyi, njirawawa'a 550 kwa ndzamə nji inda kwa mər tləra.
24 Ahir mala Saloman kwar Fir'auna tə hya'atə ku mələm Dauda ga shili ku patla nda Saloman tə hərtə nyi nda, Saloman tə ɓəla hərtə Millo, nacha ngə mbwa nda nja nyabiya na hə'i biyabibiya.
25 Zhaka makər ku fa, Saloman kwa hatəmachi nə nginda ana nə daɓəkər tsa'ana sə nda kawa shi'uni kwitkwitəu a tə dzəgana nda cha hərtə nə Tlakə nda. Ana ənga cha wurandə Mbwa'alə nda.
26 Ətsə'u, təl Saloman tə ɓatlətə param wawa'a i'i vu Eziyon Geba, nda ləhə dza Elat a vu Edom, a nya Fa'a Dəzəu. 27 Ngə Hiram təl Taya tə sə njir nau param inda kwa zəndə Fa'a ka nda vala njir ngiɗə param Saloman na ngiɗə param. 28 Nda təra yi Ofir ga yi shili na talents nə bəjingha 420 ga nə nyi nə təl Saloman.