Nja Shili na Gwarara Tlakə ku Mbwa'ala
8
1 Ngə təl Saloman tə tsəmtə njirawawa'a Isra'ila vu Urshalima, dəhə gau nə nyavi i'i ana njirawawa'a ka ki ka ki, ka nda shili na Gwarara Mbandər Tlakə hya'atə vu Sihiyona mələm Dauda. 2 Dəhə njir Isra'ila tə tsəmtədzə da təl Saloman aku bəjir ladər madləɓa i'i aku hya nə Etanim, nacha ngə məɗəfəkunya hya.3 Nda dəhə njirawawa'a Isra'ila tə dzəva, ngə pərist tə hətə Gwarara Mbandər nda, 4 ngə ka pərist ka njir Levi tə shili na Gwarara Mbandər Tlakəu, Madləɓa Tsəmdza, ana dəhə kar tlər inda kwa. 5 Ngə təl Saloman ana dəhə daɓədzər njir Isra'ila inda huɗə nyi nda, tə tsəmtədzə biyamar Gwarara Mbandər nda, ga handa təmachi na kətəng ana tla ɗang gagaɗa nda a nji da kwa nau tsəfəbiya ndara jigabiya wa.
6 Ngə pərist i'i tə shili na Gwarara Mbandər Tlakə nda ga gwa fiya ku Mbwa Nda Ndiya Na Karti, a da kiɗa babəka cherubim inda. 7 Cherubim inda tə hyanda babəka nda təkəra mbwar ngya Gwarara Mbandər nda ga fəkə nyi shanguɗa nə Gwarara Mbandər nda ana zəwa hə nyi i'i. 8 Zəwa i'i nə hə Gwarara Mbandər nda dzəgam gagaɗa, tə ɗa njo la'a nyachira cha ma ndə ta'i nya Mbwa nda Ndiya Na Karti nda, kəlnda a da njo la'a ma ndə biya wa. Tsəutanyi zəwa inda hinda ba'a ənya. 9 A sə da ku Gwarara Mbandər nda matsa təmbəl fafa mətlə inda Musa tə pəu kwa vu Horeb nda wa. Tangnda ngə Tlakə tə mbandər ka njir Isra'ila ahir nda nda zəbiya vu Masar.
10 Nda pərist inda tə zəbiya ku Mbwa Nda Ndiya Na Karti nda, kəl ləmbəkə tə haɗiya Mbwa'alə Tlakə nda. 11 Tə ɗa a tsə'u pərist inda da kwa nau mər tlər kənda wa, aka ləmbəkə nda, aka səlir Tlakə tə nyandə mbwa'alə nda.
12 Ngə Saloman tə pətlənya ga na, <<Tlakə natə ənda cho ngya ku ləmbəkə ndalndala. 13 Janə ya hərtə tə mbwa'alə nda na səli nə ngha, mbwa nda ko ngya kwa ba'anawa.>>
14 Tsə'utanyi dəhə daɓədzər njir Isra'ila təta'i tangnda, ngə təl tə sha ga səkə nda papa'akur. 15 Ngə cha na,
<<Fal ngya tə nə Tlakəu, Hyel njir Isra'ila, nda tə nyabiya alkawal nda cha mər nə ada ɗa Dauda ana nya cha. Aka cha na, 16 <Fwatə tə bəji nda ya zəbiya na nji ɗa, njir Isra'ila vu Masar, a da ya tabiya mələm ku kala nyavi njir Isra'ila ka nja hərtə mbwa'alə ka tləm ɗa ngya tangnda wa, kəl ja, a tabiya tə ya Dauda cha səm təlkur təkəra njir Isra'ila, nji ɗa.>
17 Ada ɗa Dauda i tə cha hərtə mbwa'alə ka tləmər Tlakəu, Hyel njir Isra'ila. 18 Kəl ja, Tlakə tə nar nyi nə ada ɗa Dauda, <Aka i tə ka ka hərtə mbwa'alə ka tləmər Tlakəu, a mər tə kə tsa'atsa'a ana sə ngə ka har ku ɗufwa kə nga. 19 Dəhə ka ənga, a da nakə kwa hər mbwa'alə ngə wa, kəl ja, zər ngha, nda mashi ngha, nacha ngə ndə nda kwa hərtə mbwa'alə ka tləm ɗa.> 20 Sakana ja, Tlakə nyabiya tə alkawal nda cha məra: a fa'abiya tə ya cha ada ɗa Dauda ya sakana aku dzəga təlkur Isra'ila na ya, tang wi nda Tlakə tə mər alkawal, ya a hərtə tə ya mbwa'alə ka tləmər Tlakəu, Hyel njir Isra'ila. 21 A ɓatliya tə ya mbwa ka Gwarara Mbandər Tlakəu, nda a kwa ngə nja pəu mbandər nda Tlakə tə mər ka jival kəmən ku bəji nda cha zəbiya na nda vu Masar nda.>>
Pətlənya Saloman
22 Ngə Saloman tə hya'atə tə ta'i mar dzəgana Tlakəu a huɗə dəhə daɓədzər njir Isra'ila, ga har cha cha shi huɗamələm 23 ga na,
<<Yawa Tlakəu, Hyel njir Isra'ila, a vanya Hyel da wi nakə ki huɗamələm ana a tə dunəya wa, ka nyabiya mbandər ngha ga char nyi nyida nə mavi'i ngha inda kwa ngya na ta zhang. 24 A nyabiya tə kə alkawal nghə nə mava nghə Dauda ada ɗa; ana nya kə ka mər alkawal, ya janə ka nyabiyatə wi nə cha ənya na.
25 Sakan ja Tlakəu, Hyel njir Isra'ila, nyabiya alkawal nda ka mər nə mava nghə Dauda ada ɗa, alkawal nda ka nə nyi ku bəji nda ka na bəra, <Ma nguli shili ngha wur ɗa na sənam ku dəhə sə nda ndo məra ga ma'i huɗə ɗa wi nda ka məra, a da ko tar ndə nda kwa ngya huɗə ɗa ku dzəga təlkur Isra'ila wa.> 26 Sakan ja, Hyel njir Isra'ila, ngyar ɓwanya nghə nda ka mər alkawal nə mava nghə Dauda ada ɗa nda, cha ɗa jiri.
27 Kəl ja ya, Hyel kwa ngya ku dunəya ya? Mada huɗamələm nda ndiya na səli da kwa nau sar nghə wa, abiyakata Mbwa'alə nə ya hərtə na! 28 Yawa Tlakəu, Hyel ɗa, dəhə ka ənga, ngatə təhuɗə mava ngha ka səhimi da pətlənya ana gədi nyi. Ngatə tiwi ana pətlənya, nda mava nghə kwa mər huɗə nghə ənya. 29 Ga lya ka cha ɗa təkəra mbwa'alə nə vu'i na puchi, mbwa nda ka mər alkawal ko ngya kwa, tsa'aka ko ngatə pətlənya mava ngha, təkəra mbwa na. 30 Ngatə pətlənya mava ngha ana nə nji nghə Isra'ila ma ndo pətlənya təkəra mbwa na. Ngatə ea ka farbikə kəea, tangnda kə na ngya tə ki huɗamələm.
31 Ma ndə tə zandə nyi sə nə təwul nyi, ga gwa'a cha səmfəla ya ngə cha shili, ga shili səmfəla huɗə dzəgana ngha, ku mbwa'alə na, 32 kəl ba'a ka ngatə ki huɗamələm ka mər tlər təkəri. Mər nəuma ku pama mavi'i ngha, ka tlanda nyi nəuma nə ndər bikəu, ka nə nyi bikə nyi, ka chinda ndə kəla bikəu.
33 Ma njir dawa tə kura nji nghə Isra'ila aka nda mərtə nghə səpəla'a, ma nda sha shili da ka ga shili nga tləm ngha, ga pətlənya ga gədi nghə ku mbwa'alə na, 34 kəl ba'a ka ngatə ki huɗamələm ka farbikər səpəla'a nda nji nghə Isra'ila tə məra, ka bəlandə nda shili tə hə'i nda ka nə nyi nə jival kənda.
35 Ma huɗamələm tə haɗənda dzə a par da wa, aka nji nghə tə mərtə nghə səpəla'a, ma nda pətlənya ndo ndzam mbwa na ga nga tləm ngha, ga sha tsa səpəla'a kənda aka ɓwaɓwatəu nda ka nə nda, 36 kəl ba'a ka ngatə ki huɗamələm ka farbikər səpəla'a mavi'i ngha, nji nghə Isra'ila. Dlədləɓətə nda ngya tsa'atsa'a, ka shili na par tə hə'i nda ka nə nyi nə nji nghə ka sərfa'aki.
37 Ma huɓə tə tləa, ndara təmachi tə shili tə hə'i, ndara məwuvəu ndara sə zwazwa kənda kwa kəuwa, ndara ɓiti tə sanya, ndara ndzəkwa ndara gadəɗəm tə ɗinya sə zwazwa kənda, ndara njir dawa kənda tə ɓandə nda ku kala mələm kənda, kala chul təmachi ndara shilkə nda kwa shili, 38 ma kala ndə zhang ku dəhə nji nghə Isra'ila tə pətlənya ndara gədi, ga har chi ya kəra Mbwa'alə na, 39 kəl ba'a ka ngatə ki huɗamələm tangnda kə tə na ngya. Farbikə kənda ka mər tlər təkəri, ka nəu na kala ndə məlməl na dəhə sə nda cha məra, mana kwa zəndə kə ɗufwa cha (aka nakə zhangtang ngə kwa zəndə ɗufwa nji), 40 tsa'aka ndo ləvər nghə ku dəhə ngya kənda ku hə'i nda ka nə nyi nə kə'i jival kənda.
41 Kə'i ba'a ndə shilishili nda pa'a ku huɗa nji nghə Isra'ila tə shili hya'atə tə vanya hə'i naɗəu aka tləm ngha, 42 aka nji kwa ngatə tləm nghə nda dəgaləu ana chi nə gyalkur ngha, ana səshinshin wawa'a inda ka mər nə nji ngha, ma cha shili ga pətlənya cho ndzam mbwa'alə na, 43 kəl ba'a ka ngatə ki huɗamələm tangnda kə tə na ngya, ka mərtə kala sə nda ndə shilishili nda tə gədi ngha, tsa'aka dəhə njir dunəya kwa zəndə tləm nghə ndo ləvər ngha, wi nda nji nghə Isra'ila kwa məra, ya ndo zəndə ənda mbwa'alə nə ya hərtə na mbwar həsəli nə nghə na.
44 Ma nji nghə tə biya ki pah njir dawa kənda, banda ka sə nda ti, ma nda pətlənya nə Tlakəu ndo ndzam mələm nda ka tabiya ana mbwa'alə nə ya hərtə ka tləm nghə na, 45 kəl ba'a ka ngatə pətlənya ana gədi kənda ki huɗamələm, ka hagwa nda chi.
46 Ma nda mərtə nghə səpəla'a, aka a ndə da kəla kwa mər səpəla'a wa, ya ngə huɗaka tla tsa nda ga ngyar njir dawa kənda tə fa'atə nda ka mavi'i kya tə nəkənda na hə'i, ndara ləhəu, ndara naɗəu, 47 ma nda tubi fwatə ku ɗufwa nda, ga pətlənya ku hə'i nda nja fa'atə nda kya kwa ka mavi'i nda, ga dəkəbiya səpəla'a kənda ga na, <A mərtə ea səpəla'a, a mərtə ea bikəu, a mərtə ea sə ɗimi,> 48 ma nda sha shili da ka ana dəhə ɗufwa nda ana pya nda ku hə'i nda njir dawa kənda tə fa'atə nda kya kwa ka mavi'i nda, ga pətlənya ndo ndzam mələm nda ka nə nyi nə jival kənda, təwa mələm nda ka tabiya ana mbwa'alə nda ya hərtə ka tləm ngha, 49 kəl ba'a ka ngatə pətlənya ana gədi kənda ki huɗamələm tangnda kə na ngya ti, ka hagwa nda chi. 50 Ka farbikər nji nghə inda tə mərtə nghə səpəla'a, far na dəhə bikə inda nda mərtə ngha, ka mərtə njir dawa kənda ngatə təhuɗə kənda, 51 aka nanda nji nghə nda, sərfa'aki nghə inda ka zəbiya nə vu Masar, hya'atə ku ɓwaɓwatə ɗimiɗimi.
52 Maki Tlakəu, ndzamar nji nghə Isra'ila, ka ngatə gədi kənda ana nə mava ngha, ka səhimi da nda ma dəhə sakanda nda tiwi nə nghə ti. 53 Yawa Tlakə Ndər Gyalkur Dəhəu, nakə nga tabiya nda ku huɗa dəhə jul njir dunəya ka nda ɗa ka sərfa'aki ngha, tang wi nda ka na təwa mava nghə Musa, ku bəji nda ka zəbiya na kə'i jival kəea vu Masar.>>
Batəbatər Pətlənya Saloman
54 Ahir Saloman tə wurandə dəhə pətlənya ana gədi tsa Tlakəu, cha hya'atə mar dzəgana Tlakə nda, tangnda cha uzhi tanyi tə undya cha ga hatə cha cha shi huɗamələm nda. 55 Cha ta'i ga səkə nyi papa'akur nə dəhə daɓədzər njir Isra'ila nda na kurakə dzəgamdzəgaməu cho na:
56 <<Fal ngya tə nə Tlakəu, nacha nda nə nyi ɓəlsar nə nji nyi Isra'ila tang wi nda cha mər alkawal. Mada ɓwanya zhang nə dəhə alkawal mənakə nda cha mər təwa mava nyi Musa da pa'a tə nyabiyadzə wa. 57 Ga Tlakəu, Hyel kəmən ngya tsa'a na mən wi nda cha ngya kə'i jval kəmən, ngwa cha da ngya mən ndara cha təkə na mən wa. 58 Kəlnda cha shabiya ɗufwa mən shili da cha, tsa'aka məno nəu nyi ba'a ɓəlatə tsaubar nyi, ana ɓwanya nyi ana gadlagadla nyi inda cha nə nyi nə kə'i jival kəmən. 59 Ga Hyella i gədi ana pətlənya ɗa inə ya mər huɗə Tlakə na, cha ngya tsa'a na Tlakəu, Hyel kəmən vu'i ana puchi, tsa'aka wa'atanyi cho hagwa nyi chi nə mava nyi ana nə nji nyi Isra'ila. 60 Məlna dəhə njir dunəya kwa zəndə ənda a vanyi Hyel da wa kəl Tlakə zhang tanyi. 61 Kəl ja, tuku ɗufwa hi cha ɗa tsa'a na Tlakəu, Hyel kəmən, hya ngya wi sə nda ɓwanya nyi tə na, hya ɓəlatə tsaubar nyi wi nə hyo mər ənya na.>>
Nja Dzəviya Mbwa'ala
62 Ngə təl ana dəhə njir Isra'ila inda tangnda kə'i cha tə handa təmachi i'i huɗə Tlakəu. 63 Saloman tə handa təmachi nə piyarɗufəu nə Tlakəu, tla 22,000 ana kətəng ka kua 120,000. Təwa ənga təl ana nji Isra'ila tə dzəviya Mbwa'alə Tlakəu.
64 Pəshinda tanyi təl tə dzəviya ghada babal nda biyamar mbwa'alə Tlakə nda, aka hinda cha handa təmachi nə nginda, nə səuhiuhi, ana mal nə sərhatəmachi nə daɓəkər nda, aka dzəgana ndzə nda huɗə Tlakə nda kushi gagaɗa, a do sar sər hatəmachi nə nginda, nə sə uhiuhi ana mal sər hatəmachi nə daɓəkər nda dəhə wa.
65 Ngə təl Saloman ana dəhə njir Isra'ila, daɓədzər nji ɗang inda tə hya'atə vu Hamat təwa vwa, tsa'a ku ɓəlkər Masar təwa holma tə dzəviya mbwa'alə nda ku hanyi məɗəfa, ga səm ladər madləba i'i hanyi məɗəfa, a huɗə Tlakəu, Hyel kənda. 66 Vanya zəkəu cha səu nji ku laku. Nda fal təl ga təra kyo ki na hirgyaɗi aka dəhə papa'akur nda Tlakə tə mərtə nyi nə mava nyi Dauda ana nji nyi Isra'ila.