Saloman tə Hərtə Patla Nyi
7
1 Saloman tə mər fa kwabəmakər cho hər patla nyi. 2 Cha hərtə vanya vi nda njo nga Kubu Lebanon, pələkəkura cha hi 150 dlaɓəkura cha hi məɗəfəkumnyi parnya tufəu, ana dzəgamkura cha hi fwaɗəkumnyi parnya tufəu, nja dəhətə na shimbal wur seda i'i zotamin fwaɗəu, shimbal kwabətufəu ku kala zotamin, ana mədlakə nə wur seda kya tə kəra kala zotamin. 3 Nja mbuya kəra cha na udzəm seda a tə shimbal fwaɗəkumnyi parnya tufə inda, kwabətufə ku kala zotamin. 4 Kala bangu na kagapə makər kwa ndzamədza. 5 Dəhə nyavi inda sə zhang ana ngum fwaɗəu, nda kwa ndzmədza, ku zotamin makərəu.6 Ətsə'u, cha latə mənga inda na shimbal, pələkəkura cha hi məɗəfəkumnyi parnya tufəu, dlaɓəkura cha hi fwaɗəkumnyi parnya tufəu, ana vanya mənga nda na shimbal a biyama nyi.
7 Ngə cha hərtə vi dzəga təlkur tangnda cho mər nəuma nə nji, cha mbuya kəra cha na udzəm seda, fwatə ki ta'i ki. 8 Cha hərtə ki nda cho ngya kwa, ana babal biyahir vi nəuma nda. Nja hər nyi papiyada vi nəuma nda. Ngə Saloman tsə'u tə hərtə nyi ki nə kwar Fir'auna nda cha hə ka mala nyi nda, wi vi nəuma nyi nda.
9 Dəhə hər inga ana babal dəgal nda nja mər nyi na hangu gumaguma fwatə ku hya hər nda. Kəl nda nja dəkətə hangu inda təvi nja dzəɗiya, ta cha ana dagərya nda sə zhang. 10 Nja səya hya hər nda na hangu wawa'a, pələkəkura alenyi hi kwabətufəu, alenyi hi kwabəmətləu. 11 Kya tə kəra hya hər nda tsə'u alenya hangu da inda nja dzəɗiya məlməl na wi nda njo i, ba'a mədlakə udzəm seda. 12 Aku ta babal patla nda tsə'u, babal nda ku ta mbwa'alə nda, ana cham mbwa'alə Tlakə nda, bangu da i'i ana mədlakə udzəm seda i'i, nda nja bərdliya aka kala hangu dzəɗədzəɗə makərəu.
13 Ngə təl Saloman tə sə nja shili na Huram ndər Taya, 14 nda ama nyi malatəsal hya'atə ku nyavi Naftali, ada nyi tsə'u ndər Taya yakə fətə ndzəa. Huram ndə tlalwa cha 'ual'ual ku kala chul tlər nda njo mər na ndzəa. Cha shili da təl Saloman ga shili mərtə dəhə tlər nda nja nə nyi.
15 Cha ɓatlətə shimbal ndzə mətləu, dzəgamkura kala zhang hi mətləkumnyi parnya məɗəfa, ta shimbal nda fwanghəu, ana dangwangkura cha hi kwabəchisəu. 16 Ngə cha ɓatlətə sər ɓəl kəra shimbal mətlə na ndzəa, kala sər ɓəl kəra shimbal inda hi məɗəfə na manyi. 17 Cha tsatə dzəra lyang ga ɓatlətənyi ɓatlə nə kala sər ɓəl kəra shimbal ni, dzəra lyang tsatsa məɗəfə nə kala zhang. 18 Cha tətə səlirma pomegəranet ku zotamin mətləu nda tə ɓandə dzəra lyang tsatsa nda, ga cha kwaɗətə sər ɓəl kəra shimbal nda. Əngə cha mər na dəhə sər ɓəl kəra shimbal inda. 19 Sər ɓəl kəra shimbal inda, nja ɓatlə nyi pabiya mambəl laku, dzəgamkura kala zhang hi kwah. 20 Kyo kəra shimbal mətlə inda, ta'a təkəra dzəra lyang tsatsa buɗəchi nda, vanya sə da pabiya səlirma pomegəranet 200 ku zotamin mətləu tə ɓandə sər ɓəl kəra shimbal inda. 21 Huram tə hya'andə shimbal inda biyamar lakur gwa ku Mbwa'ala, nda təwa holma nda, nja fəndzə nyi tləm Jakin, nda təwa vwa nda tsəu, nja fəndzə nyi tləm Boaz. 22 Sər ɓəl kəra shimbal inda pabiya mambəl laku. Əngə nja wurandə tlər ɓatlə shimbal inda.
23 Huram tə fətəbiya giɗa dəgal nə ndzə langlanghəu, nda njo nga Fa'a. Bangəlyangkura cha hi kwabətufəu, ndzuɗwakəkura cha hi məɗəfə na manyi, bangkura cha hi fwaɗəkumnyi parnya tufəu. 24 Nja ɓandə wulya giɗa nda na pəla ku zotamin mətləu, pəla kum ku kala hi kwabətufəu, nja fətəbiya daɓədaɓənyi na giɗa dəgal nda.
25 Nja fiya giɗa nda njo nga Fa'a nda tə ɗagərya səlirma daləu kwabəmətlə nə ndzəa, inda bama nda ka zəbiya ka zəbiya, bama məkər təwa holma bama makər təwa zədərpəchi. 26 Səsəmkura giɗa dəgal nda wi dlaɓəkura huɗəchi, nja ɓatlətə nya cha wi nya ɗyaɗika, wi mambəl mbəlmbəla. Giɗa dəgal nda kwa hətə ɓiti kwa ɗa pəla 10,000.
27 Ngə Huram tə ɓatlətə sər ta'i nə ndzə kuma, nda njo nau mbəlari, dzəgamkur ana dlaɓəkura kala zhang hi kwah, pələkəkura nda tsə'u hi fwaɗə na manyi. 28 Janə ənda nja ɓatlə sər ta'i inda: Nja ɓatlətə palai nə yimbilya cha fwaɗə inda məlmələu. 29 Nja mərtə səlirma ləvari i'i ana nə daləu i'i ana nə cherubim i'i a tə palai fwaɗə inda. A tə mədaɓə nda tsəu, gəgə'u da, nja tətə səlirma mambəl mbəlmbəl da kiɗa ləvari inda, ka daləu inda. 30 Kala sər ta'i na hya cha fwaɗə nə ndzəa, wi nə charkaina taku ana zuwa ndo gəzə hya cha inda, aku məngum fwaɗə tsə'u kətas da ta'a təkəra sə ndo kəka nda fwaɗəu, nja tətə mambəl mbəlmbəl i'i ti. 31 Aku ta sər ta'i nda nja ɓatlətə vanya shimbal langlang wi gəgə'u, ndzuɗwakəkura cha hi zhang. Nya cha langlanghəu, ndzuɗwakəkura cha hi mətlə na makəmar manyi. Nja təbiya nya shimbal nda tsə'u. Palai nyi məngum fwaɗəu, a da langlang wi gəgə'u wa. 32 Hya cha fwaɗə inda tsə'u, a da kiɗa palai inda nda, məkasə hya cha inda tsə'u nja daɓtə na sər ta'i nda. Dlaɓəkura kala hya cha inda, hi mətlə na makəmar manyi. 33 Hya cha inda tə pabiya da hya charkaina taku, ya məkasə hya cha inda, ganga kənda, zəwa kənda ana haghima kənda, dəhə ana dzə nja fətəbiya.
34 Kala sər ta'i na sər gəzə nyi fwaɗəu, zhang ku kala məngum, dləɓədləɓənyi tə sər ta'i nda. 35 A kya tə kəra sər ta'i nda vanya sə da wi gəgə'u, ana ndzuɗwakəkura cha mar zhangtəchi. Məkasə nyi nda ana palai inda nja daɓtə na kəra cha nda. 36 Cha tətə səlirma cherubim, ləvari i'i ana wur debino a tə məkasə inda ana a tə palai inda, ana a tə kala mbwa nda pa'a sə ti, ana səlirma mambəl wu dəhə dza cha. 37 Əngə cha ɓatlətə sər ta'i kum inda. Dəhəkura nda məlmələu, ya takəndi kənda sə zhang.
38 Huram tsə'u tə ɓatlətə kətas wawa'a nə ndzə kuma, bangkura kala zhang hi kwah, ya kwa hətə ɓiti kwa ɗa pəla 240. 39 Ngə cha piya sər ta'i inda tufə təwa holma nə mbwa'alə nda ana tufə təwa vwa. Ngə cha fiya giɗa dəgal nda ku məngum pama holma ana zədərpəchi nə mbwa'alə nda. 40 Cha ɓatlətə kətas i'i tsə'u ana choɓur i'i ana kətas wawa'a.
Əngə Huram tə warandə dəhə tlər nda təl Saloman tə nə nyi ku mbwa'alə Tlakəu,
41 Huram tsə'u tə ɓatlətə shimbal mətləu,
kətas wawa'a mətləu,
sər ɓəl kəra shimbal, zotamin mətləu nda tə paɗətə kətas wawa'a mətlə inda kyo kəra shimbal inda;
42 səlirma pomegəranet 400 aka sə inda nja tsatə dzuku mətlə inda (zotamin mətlə nə pomegəranet i'i aka kala sə inda nja tsatə inda, kətas mətlə inda kyo sər ɓəl kəra shimbal inda);
43 Sər ta'i kuma ana kətas kənda kuma;
44 giɗa dəgal nda ana səlirma daləu kwabəmətlə inda da kiɗa cha nda;
45 təm inda, choɓur inda ana kətas inda.
Huram ngə tə ɓatlətə dəhə sə ingə nə təl Saloman, aka Mbwa'alə Tlakəu, ana ndzə tsa'amunyi. 46 Təl tə na nja dla'abiya sə ingə a tə babal Urdən, a tə hə'i nyingha nda ku pama Sukkot ana Zaretan. 47 Saloman da dəkətə kar tlər inda wa aka ɗang gagaɗa, aka ənga a da njo nau har ndara aman tədəɓəkura ndzə inda wa.
48 Saloman tə ɓatlətə dəhə kar tlər inda ku mbwa'alə Tlakəu:
dzəgana bəjingha,
teɓər bəjingha aka gwazhilakə nda nja dzəviya;
49 chaka'i təkəsə nə bəjingha tsa'amunyi, tufə təwa chisəm tufə təwa matsal, a biyamar Mbwa Nda ndiya na Kartikur,
səlirma mambəl wu i'i, təkəsə i'i ana sər chaku kum i'i.
50 Ɗyaɗika i'i nə bəjingha tsa'amunyi, sə nda njo chi təkəsə nə i'i, kətas wawa'a, kətas i'i nə ɗəzə sə nda kwa shi'uni kwitəkwitəu, kətas ta hahir hu'u,
sə inda kwa gəzə nyavi nə Mbwa Nda Ndiya Na Karti ana nə vi dəgal nə mbwa'alə Tlakəu.
51 Nda Saloman tə wurandə dəhə tlər mbwa'alə Tlakə nda, ngə cha shili na dəhə sə inda ada nyi Dauda tə dzəviya inda, nanda ingə ka azurfa ana bəjingha, ana kar tləra, ga shili pəu ku mbwa'alə Tlakə nda.