Saloman tə Hərtə Mbwa'ala
6
1 Fa 480 ahir njir Isra'ila tə ngyar Masar, aku fwaɗəkunya far Saloman ku təlkur təkəra njir Isra'ila, aku hya Ziv, mətləkunya hya, cha ghəya hər mbwa'alə nə Tlakəu.2 Mbwa'alə nda təl Saloman tə hərtə ka tləmər Tlakə nda, pələkəkura cha hi dləkumnyi, dlaɓəkura cha hi makərkumnyi, dzəgamkura cha hi fwaɗəkumnyi parnya tufəu. 3 Mənga nda tə nya cham nbwa'alə nda, hi makərkumnyi, məlməl na dlaɓəkura mbwa'alə nda, ga ndəɗiya na hi kwabətufə a biyamar mbwa'alə nda. 4 Ngə cha mərtə kagapə mbwa'alə nda dlaɓə biyabibiya matsa ənda cha kwakwa. 5 A dzər bangu mbwa'alə nda biyabibiya, cha ɓandə na vi kya tə kəra vanyi jigə makərəu, kala zhang hi məɗəfə na manyi. 6 Vi nda ki hə'i nda, dlaɓəkura cha hi məɗəfə na manyi, nda ta'a təkəri, dlaɓəkura cha hi dləa, makərkunyi nda kya tə kər nda tsə'u hi kum na manyi. Bangu nda kya tə kər nda da səsəm wi nda kya hu'i wa, aka ga vivinyi ngya mənakə a da kəl nja chiya shimbal dza bangu wa.
7 Aku hər mbwa'alə nda, a da nja ngatə kuraka matərka, pəɗəm ndara kala kar tlər inda nja ɓatlə na lyang wa, aka kəl ana hangu inda nja dzəɗəbiya kya tə mbwar huɓə hangu tanyi nja hər mbwa'alə nda ni.
8 Nyavi nda kya hu'i nda təwa holma nə mbwa'alə nda cha, ya nacha ngə lakur təra gyo vi nda tə ghada nda ana gyo makərkunyi nda. 9 Əngə təl Saloman tə wurandə hər mbwa'alə nda, ga mbuya na udzəm seda. 10 Cha ɓandə mbwa'alə nda na vi, dzəgamkura kala vi hi məɗəfə na manyi, nja dləɓəndzə nyi nə mbwa'alə nda ana mədlakə udzəm seda.
11 Ngə ɓwanya Tlakə tə shili nə Saloman bəra, 12 <<Ma ka nəubiya gadlagadla ɗa, ga mər dəhə sə nda ya na, ga ɓəlatə dəhə tsaubar ɗa ga nəubiya, yo nyabiya alkawal nda ya mər nə ada nghə Dauda nda, təwa ngha. 13 Ya yo ngya ku huɗa njir Isra'ila, a da yo ngyar nji ɗa Isra'ila wa.>>
14 Əngə ngə Saloman tə hərtə mbwa'alə nda ga wurandi.
Kar Ta Mbwa'ala
15 Cha bərdləya wur seda dza bangu ku ta cha fwatə ki ta'i ki, ga bərdləya wur fir tə huɗəvi. 16 A gwa da gwa cha tsabiya vanya vi nda njo nga Mbwa Nda Ndiya na Karti, ana wur seda fwatə ki ta'i ki, dzəgamkura cha hi makərkumnyi. 17 Vanya vi da biyamar Mbwa Karti nda, pələkəkura cha hi kwakumnyi. 18 Dəhə ta mbwa'alə nda na wur seda, nja fiɗətə səlirma pəla ana mambəl wu tə wur seda nda, a da njo la'a hangu biya wa.
19 Cha ɓatliya Mbwa Nda Ndiya na Karti ku ta mbwa'alə nda ka ga nja fiya Gwarara Mbandər Tlakə kwa. 20 Dzəgamkura Mbwa Nda Ndiya na Karti nda, hi Makərkumnyi, dlaɓəkura cha hi makərkumnyi, pələkəkura cha hi makərkumnyi. Cha ɓəsəndzə nyi bəjingha tsa'amunyi, ətsəu cha ɓəsəndzə nyi dzəgana nda na wur seda. 21 Saloman tə ɓəsəndzə nyi bəjingha tsa'amunyi nə mbwa'alə nda, cha mbiya dzəra lyang nə bəjingha tə lakur go Mbwa Nda Ndiya na Karti nda da gwa nda, nda nja ɓəsəndzə nyi bəjingha nda.
22 Cha ɓəsəndzə nyi bəjingha nə dəhə ta mbwa'alə nda. Ətsəu cha ɓəsəndzə nyi bəjingha nə dzəgana nda ku ta Mbwa Nda Ndiya na Karti nda.
23 A ku ta Mbwa Nda Ndiya na Karti nda, cha ɓatlətə cherubim mətləu a na wur zaitun, dzəgamkura kala zhang hi kwabətufəu. 24 Cherubim inda kya'a sə zhang nda, kala zhang na babəkə mətləu, pələkəkura babəka kala cherubim hi məɗəfə na manyi, məlna babal ndo pama nyachira babəkə nənna, ya nyachira babəkə ndanda, hi kwabətufəu. 25 Cherubim inda kya'a pabiyadzə nda, ya dəgalkura nda sə zhang. 26 Pələkəkura kala cherubim zhang hi kwabətufəu. 27 Cha fiya cherubim inda ku Mbwa Nda Ndiya na Karti, ana babəka nda wunwunənyi. Babəka cherubim zhang kwa tsəkar bangu bangətiti, babəka vanyi zhang nda kwa tsəkar vanya bangu bangətiti, ngə babəka nda zhang zhang tsə'u tə ɓə tə ghadar vi. 28 Cha ɓəsəndzə nyi bəjingha nə cherubim inda.
29 Cha dzəɗəbiya səlirma cherubim, wur dyabino ana mambəl wu i'i, tə bangu vi nda da gwa nda, ana nda biya nda. 30 Ətsə'u cha ɓəsəndzə nyi bəjingha nə huɗəvi inda kya'a.
31 Cha ɓatlətə sər haɗə nyavi mətləu ka Mbwa Nda Ndiya na Karti ana wur zaitun, kəra sər haɗə nyavi nda ana məngum tufə ti. 32 Cha fiɗətə səlirma cherubim, wur dyabino ana mambəl wua tə nyavi mətlə inda nja ɓatlə na wur zaitun nda, ga ɓəsəndzə nyi bəjingha. 33 Əngə tanyi tsə'u cha ɓatlətə udzəm nyavi mbwa'alə nda na wur zaitun, ana məngum fwaɗə ti. 34 Cha ɓatlətə sər haɗə nyavi mətlə nda njo nau mbəɗiya ana wur fir. 35 Cha fiɗətə səlirma cherubim, wur dyabino ana mambəl wu ga ɓəsəndzə nyi bəjingha məlmələu.
36 Nja hərtə bangu babal mbwa'alə nda na zotamin makər nə hangu ana zotamin mədlakə udzəm seda.